مملكه الراقي

اول يوم غربه

مملكه الراقي
البارت الثالث والثلاثون
اول يوم غربه

القرب منك جنه ما يعرفش معناها غير الي جرب وصالك وحبك لان الي زيك مش كتير انت مالكش شبيه اتمنيتك وحبيت اكمل حياتي معاك بس للاسف انا عارف انك مش ليه بس هحاول جاهد علي قد ما اقدر اسعدك واكون كل الدنيا ليك مهما طال الامد وكنت عايش علي وجه الارض عمري ما هفرط فيك لانك انت اساس حياتي وروحي وقلبي معاك واعتقد ان مافيش حد في العالم يقدر يعيش من غير روحه وقلبه بس حابب اقلك حاجه بالله عليك بطل تغيب وبطل انك متكلمنيش لاني بكمل يومي بنظره عنيك وبتحلي ايامي بسماع صوتك العذب الجميل محتاجك جنبي علي طول يانعمه ربنا ليا يافرحه قلبي وعنيا ياكل ماليا يااحلي حبيب

مملكه الراقي....... اول يوم غربه ...... الراقي

ياغالي انا مش عاوز  ازعجك معايه
ياباشا مافيش ازعاج
انا والله هشوف فندق للصبح
فندق ليه ده اقل فندق الليله ب١٠٠ دولار
عادي
وليه بس ياعم انا بيتي مفتوح لك وهي كلها كام ساعه والنهار يطلع وابقي روح شغلك وشوف انت هتعمل ايه
ياعم والله مش عاوز ازعجك
يوووه انت دماغك ناشفه قوي ليه انت صعيدي ياعم ولا ايه
ومالهم الصعايده
اجدع ناس ياابوو عمووو
تسلم
يالا بقي بيتي قريب اهوو مش بعيد وبعدين احنا مصريين زي بعض ياجدع لو مكناش نشيل بعض في الغربه مين هيشيلنا
تسلم ياغالي
اسم الكريم ايه
اخوك كمال وانت
انا اخوك حسين
اهلا بيك ياحسين
اهلا بيك ياكمال وكمال منين
من اسكندريه
اجدع ناس
تسلم يارب وانت منين ياحسين
انا من البحيره
اهلا وسهلا جنب بعض يعني
ايوه
طيب ياعم فرصه سعيده
انا اسعد والله
وادي ياسيدي وصلنا البيت
والله مش عارف اشكرك اواي
ياكمال عيب ما تقلش كده متزعلنيش منك
تمام ياحسين
اتفضل
يزيد فضلك

دخل حسين وكمال الشقه وكان مافيش حد فيها خالص حط شنط كمال وفاتحه اوضه وقاله اتفضل ريح هنا والحمام عندك ادخل خودلك دوش شكلك هلكان قوم غير هدوم ونزل تراب السفر من علي جسم  دخل كمال اخد دوش وغير هدومه وطلع من الحمام لقي حسين مجهز اكل والا واللازم يفطروا رفض كمال وقاله انه مش جعان بس حسين اسر علي ذلك كل كمال وحمد ربنا وحسين عملهم شاي شرب الشاي وقله قوم بقي يانجم نام ليك ساعتين دخل نام وضبط المنبه علي الساعه ١٠ هما ٣ ساعات الي نامهم بس وفعلا نام نوم عميق جدا لانه كان تعبان بجد ومكنش عارف لو ملقاش حسين ده كان هيعمل ايه ...

صحي كمال الساعه ١٠ غسل وشه واتوضا وصلي ولبس هدومه كان حسين نايم في سابع نومه وكمال متردد يصحيه ولا ياخد شنطته ويمشي مش عارف يعمل ايه ولما فكر قال لو مشيت من غير ما قول للراجل اني ماشي قله ذوق مني وحسين مقصرش معايه حتي مش معايه رقم تلبفونه وفي النهايه قرر انه يسيب شنطه ويروح الشركه يشوف وضعه ويبقي يرجع لما حسين يصحي ويشكره وياخد شنطه ويروح سكن الشركه