سلام بنات انا راح نحط هاد الحلقة الثالثة ونحبسها باسكو على حساب وش راني نشوف انو معجباكمش لحكاية مع انو مزال مدخلتش لصح
هاد البارتي راح نحاول فيه وين راح نبدا فالتعمق شويا فلحكاية وادا زدت شفت مكانش تفاعل فيها راح نحبسها
وشكرا 😁
________________________
مهدي : هلال
عيط على طول صوتو وراح شدلو يدو وورالو تصويرة
غزر هلال فتصويرة وعاود غزر في نرمين ومبين حتى رد فعل
عدل روحو ووقفها وهي مزالها تبتسم وكانها تقول مراحش تهزمني
مسكينة مزل ماعلابالهاش وش راهو يستنى فيها
وقف بكل كريزما وقال بنبرة صوتو لخشينة لي تزعزع جبال وقال:
لقينا العضو السادس ادوها
نرمين مقاومتهمش مي قاعدة تتسال علاه قال العضو السادس و علاه راهم راح يدوهم مي هي ميبنت والو بالعكس كانت جامدة
رفدوها ودخلوها فالفورڨون تاعهم 🚐 ( هداك لزرق راكم عرفتوه)
كان ظلمة مشافت والو تواقي ( شبابيك ) مغلوقين مكانش كيفاش تشوف طريق مهم ديمارا الفورڨو لمدة طويلة وهي قاعدة تستنى وتسمع صفارة تع سيارات الشرطة قريبا ليهم وكي تشوف زاد فالفيتاس تعرف بلي راهم فلوطورت
وفجأة حبس لفورڨون وقاعدة تغزر من جيهة الباب وقلبها يخبط وتفتح لباب وجاتها ضو تع برا بزاف قاوية غمظت عينيها وتطلع وحدة دنات في ودنها وقالتلها
......: متخافيش لازم نغطيلك عينيك ومن بعد راح نمشيك انا
نرمين : 😒😒مانيش خايفة ديري شغلك
غطاتلها عينيها وهبطتها من لفورڨو وقاعدة تمشي فيها وكل ما تكون درجة ولا كاش حاجة تنبهها ومنبعد وصلوها لوحد البيت ونحاتلها على عينيها وقالتلها
....: اقعدي هنا دورك يجو ليك
هزتلها براسها بمعنى ايه وقعدت وقاعدة تشوف فلبيت كانت بيضاء كامل وفيها طاولة وزوج كراسة وكأنها غرفت استجواب
قعدت وكانت مريا كبيرة مقابلتها قاعدة تفيزيتي فالغرفة وتخزر في كل الجيهات من بعد قاعدة تمتم بفمها وتقول
نرمين : ايتش ؛ ني ؛ سان ؛ يون ؛ ڨوو ؛ رُوكو ، روكو كاميراني ؟! ( علابالي بلي مفهمتوش وش راهي تقول هي راهي تقول فالارقام باليابانيا لي من واحد لستة )
نكملو
وهي ساهية ويتفتح الباب ويدخل بكل هدوء ويقعد قدامها وهي مركزة معاه ومنحاتش عينيها عليه
فهد : سلام عليكم
نرمين : وعليكم سلام
فهد : ان شاء الله منكونوش خوفناك
قالهالها وهو يبتسم بكل لاطافا ألعبها كيوووت
مننكروش انو هو زلون بقلاوة مسكرة
مهم قاعدة نرمين مدارت حتى رد فعل ومجوباتوش
تبسم وكمل يهدر
فهد : انا علابالي بلي راكي تتسالي علاش راكي هنا وش هو السبب لي خلاهم يجيبوكم لهنا
نرمين ركزت على يجيبوكوم وقالتلو
نرمين : يجيبونا ؟!
فهد : ايه يجيبوكم مراكيش غير نتي هنا مي السؤال لي راهو يتطرح بكثرة ووجهلها صبعو بتجاه المرايا نرمين : ولي هو
فهد : سبب هدوءك راكي هادئة بطريقة غريبة لوكان معلابالناش بلي نتي مواطنة بسيطة عايشة حياة بسيطة كنا راح نحطو انو نتي عميلة متدربة بطريقة جيدة
معطاتو حتى رد فعل ومدارتش على كلامو وقالتلو
نرمين : جاوب على سؤال لي طرحتو من الاول
فهد تبسم وعرف وش تقصد بهدرتها مي لعبها مفهمهاش
فهد : وشمن سؤال
ضيقت عينيها وجاوباتو
نرمين : وعلاش جبتوني لهنا
تبسم فهد وقاللها
فهد : 😏😏 من بعد تعرفي متتقلقيش
فتح الدوسيي لي كان في يدو وقالها
فهد : راح نعطيك وحد المعلومات ونتي جاوبيني بإيه ولا لالا
أولا نتي نرمين ******'
نرمين : ايه
ثانيا في عمرك 22 سنة مولدة في سيدي امحمد
نرمين : ايه
ثالثا تدرسي ثالثة جامعي محاسبة ومالية
نرمين : ايه
رابعا عندك اب و ام
نرمين : ايه
خامسا شحال نتوما فدار
نرمين : ستة أفراد
فهد : ولي هوما باباك والام تاعك واخوك وزوجته وابنه
نرمين : ايه
فهد صاحا راح نعرضلك بعض صور وقوليلي اسكو تعرفيهم
حطلها خمسة صور قدامها وهي حلت عينيا على وساعهم ولخلعا حكمتها رفدت ودة من تصاور وقالت
نرمين : هادي اسما صحبتي وهادي رحيل وهدا عيسى لي كان معايا ليوم وهدا محمد وهدا ياسين
فهد : تعرفيهم
نرمين : أكيد نعرفهم
فهد : وكيفاش تعرفيهم
نرمين : قرينا كيفكيف فليسي ( ثانوية )
وزيد هادي صحبتي اسما وعيسى جارنا
ومن بعد غزرت فيه وسترجعت كلمة يجيبوكم في بالها وقالت
نرمين : اصبر دقيقة كي كنت تقصد بكلمة يجيبوكم انو هادو لي راهم فتصاور راهم هنا
فهد صفقلها وتكا على الكرسي وعدل قعداتو وقال
فهد : ذكية انا قولتلهم بلي هاد الهدوء يكون وراه ذكاء خارق ههههه ، ايه راكم هنا كامل مي للدرك مزال ميعرفوش بلي لي وريناهولهم راهم هنا من غيرك نتي
نرمين : وعلاه رانا هنا ووش تسحقو منا
فهد : قلبك بيض راكي تهدري بصفة الجميع وماشي غير على روحك
خبطت الطابلو بيدها وعيط
نرمين : سقسيتك جاوبني متبداش تطلق فجياحتك
زير على يدو وزبل طلعلو من كلمة جياحتك مي هي مزغدتش عينيها وقاعدة تغز في عينيه بدون تراجع
تبسم وقالهلها
فهد : 😏 لسانك كبير عليك
عدلت قعدتها وتكات على لكورسي وجاوباتو
نرمين : لساني قدي باسكو كي زدت زاد معايا مزادش قبلي
فهد : هههههههههههههه جايحة
نرمين : كيما نتا
فهد : واقيلا حسبتلك انا خوك فدار احتارمي روحك راني للدرك مكالمي معاك
نرمين : مليح راك تدير فشغلك ماشي انا لي طلبت منك تتساهل معايا
فهد : اللهم صبرني. يارب
رفد روحو ووقف وهي غزرت فيه تع وش راح يدير
خبط الكرسي فلرد وراح خرج زبل طالعلو لرأس باسكو لوكان زادت كلمة كان علابالو بلي راح يكرفسها
هي غير شافتو خرج خبطت يدها فطالبلة وقالت
نرمين : جايح
وقاعدة تغزر فالملف لي حطو قدامها وبدات تتفحص فيه لاحظت انو فيه كل صغيرة و كبيرة عليها حتى ادق التفاصيل
وقالت في قلبها
نرمين : ياربي وعلاه جابونا لهنا وش كاين
ومن جيهة اخرى
رافد كاس قهوة وقاعد في بيروه والشاشات قدامو يغزر فيهم كامل بين ستة
ودخلو عليه كل من فهد و مهدي و امين و رانيا و نزيم و كريم
قاعدو فطاولة الاجتماع وكل واحد شد بلاصتو وهو ترأس طاولة الاجتماع وقال ل امين تفضل امين نبداو بيك
امين : انا استجوبت اسما **** هي طفلة بزاف عاقلة وملي جبناها وهي تبكي محبتش تسكت وكانت خايفة بزاف وتعرفت على تصاور كامل واكدت بلي قراو كيف كيف في ثانوية نرمين تكون صديقة مقربة ليها وعيسى اخ صديقتها
دار لمهدي وجاوبنو
مهدي : انا ستجوبت محمد **'**** كان خايفة بزاف وقاعد يكرر في كلمة انا مدرت والو علاه جبتوني لهنا وكي ورينالو تصاور تعرف برك على دراري مي لبنات عرف زوج اسما ****
ونرمين ****** اما رحيل ***** متعرفش عليها
دورك رانيا : انا ستجوبت عيسى ****** كان مرتبك وخايف تان وقاعد يسقسي علاه راني هنا مدرت والو وعندي اهلي يستناوني خلوني نخرج مهم كي شاف تصاور هو تعرف على لولاد ولبنات تعرف غير على نرمين واسما وقال بلي نرمين جارتو واسما صديقة اختو
تفضل فهد ، نفخ فهد بالقاوي من قوة راهو قلقان
فهد انا ستجوبت نرمين ******* اول حاجة لسلنها طويل ومتزيدش تبعتني ليها باسكو نقبرها مهم هي كانت هادئة بزاف ومدارت حتى رد فعل جابوتني على اسئلتي وكي شافت تصاور تعرفت عليهم كامل وحتى اسماوتهم كانت تعرفهم وقالت بلي اسما صديقتها و عيسى جارها وزيد قراو فثانوية كيف كيف كامل راح عند نزيم وكريم قالهم أعطوني لخلاصة
نزيم قال : تان ستجوبت رحيل كانت تبكي مع لول وسقساتني نفس السؤال المطروح وتعرفت على تصاور كامل وكيما قالو لوخرين
كريم : انا ستجوبت ياسين كان خايفة لدرجة انو بكا وكيما قالو دراري لوخرين تعرف على كامل تصاور هو تان مي الاسماوات تفكر غير دراري واسما لبنتين متفكرهمش
هز راسو بمعنى ايه نطقت رانيا
دورك حظرت الرائد وش نديرو
غزر فيها وجاوبها
هلال : راح نخطو الخطوة الثانية
رانيا : مي راح تكون قاسيا عليهم
غزر فيها غزرة تع موت
هلال : واحد ماخدا رايك تفضلو خلاص الاجتماع
هبطت عينيها ومجاوباتوش وناضو جاو خارجين ونطق
هلال : مهدي اقعد نسحقك
خرجو وقعد مهدي معاه
مهدي : واش جلول ارخف روحك راك كليتها طفلة
هلال : متطلقش حلاوتك اسمع انا راح نروح ليوم راح يكون كلشي بأمانتك تفاهمنا
مهدي : تحدد الموعد ؟!
هلال : إيه غدوة انسب يوم
مهدي : ولوكان تبان راح يفشل كلش
وغزر فالكاميرا وقال
هلال : متخممش مشكيتش تبان
مهدي : وش لي يخليك مأكد بلي واحد من هادو تكون هي ولا هو
هلال : مانيش متاكد مي راح يبان كلش مع لوقت حنا أصلا مجبناهمش باش يبان جبناهم بأمر من رئيس الجمهورية وراح نطبقو لي قالو بالتفصيل ومهمتي خارجة على هذا ، مهم مهدي راح يكونو بأمانتك رد بالك
مهدي : متخممش صحبي راح يكون في عينيا ابار هاديك مول لسانك طويل
تبسم وجاوبو
هلال : هاديك مينخافش عليها من عينها تبان متخافش
مهدي : هوووووي هووووي واش مون فرار طايح فيها عشقة واقيل
رفد قرعة ما وخبطو بيها
هلال : قولتلك بركا من جياحتك
مهدي : تهدرو نفس الهدرة فولة وتقسمت على زوج شوف ياخو ادا معجباتكش انا نديها انا نحب لبنات لواعرات
دربو بدبزة للكرش
هلال : اسمع راهم كي خواتاتنا لازم نخزرو فيهم كيما هكا رد بالك تهرب عينك
مهدي : علابالي متخممش مي اسمع اقعد شافي على هاد الهدرة راح نشيفهالك كاش نهار
وهرب مهدي باسكو علابالو لوكان زاد قعد لوكان راح يوصلو لسبيطار
ــــــــــــــــــــــــــــــــــــــــ
خلاص هنا البارتي تع ليوم وراني كيما قولت ادا شفت كاين تشجيع راح نكملو وادا مكانش راح نحبسو
شجعونا شويا ياخي باطل 😋😋😋
تهلاو في روحك سلام
أنت تقرأ
لعبة الحرية بالهجة الجزائرية freedom game
Romanceشخصين متناقضين 🙄😒 ♂️ الرجل ❌♀️ النساء ♀️ و المرأة ❌♂️ الرجال شخصين لايطيق احدهما الاخر هل سيكون هناك حب بينهما ياترى 🤔 ؟! هل ينذمج الزيت مع الماء ؟ هل ينذمج بين سليطت اللسان و قسوة الرأس بين الجبروته وبرودة دمه وكرهه الشديد لنساء ؟ ...
