لعبة الحرية بالهجة الجزائرية freedom game

🌠 الحلقة ~ 5 ~ 🌠

فتحت عينيها صفاحي 😳😳 وغزرت فيه بالخلعة وقالتلو
- وشنو هدا ؟!
غمض عينيه فهد وهبط راسو ومغزرش فيها وفتحهم وغزر فلرض ولم يديو على شكل دبزة
نرمين قاعدة تغزر فيه من لخلعة
ومننساوش رحيل واسما كانو نفس الجازست مخلوعين لواش قراو مي اسما بدات تبكي
وتقول
- وعلاش هكا قولي وعلاش وشنو هادا كيفاش
هي تهدر وتبكي وكل كلمة تقولها كانت فيها غصة كبيرة وخطرة يتقطع صوتها من شهقة تع لبكية
ورحيل تان كانت ردت فعلها كيما اسما ونفس السؤال المطروح وقالت
- وعلاش هاد الشروط وشنو هو السبب وعلاش هكا وش درنا حنا باش تديرولنا هكا
نروحو عند نرمين
خبطت يدها وكانت زعفانة ڨراف وقالتلو
- راني نهدر معاك وشنو هدا وشنو هاد الشروط تع لخرا تاعكم راكم تشوفو فينا منسواوش و نديرو وش تحبو نتوما سكتت تهدي روحها وعضت شفتها التحتانية وكرفست هداك الدوسي وقالتلو
- نتوما أصلا للدرك مقولتولناش علاش رانا هنا وجاي تعطيني هاد الدوسي وجهكم صحيح لهاد الدرجة
فهد قعد مهبط راسو ومغزرش فيها هي تنارفات وعلا صوتها مي كانت فيها غصة تع راهي تسيي تخبي البكية تاعها بسيف
رفدت هداك الملف وخبطاتو عليه وناضت وكي ناضت طاح الكورسي فلرض وخبطت يديرها بينزوج فطابلة وقالتلو راني نهدر معاك ماشي مع حيط وسمك هو غزر فيها وكانو عينيه حمورة تع ليوم الفينڨا
نرمين دخلت فهيستيرا مولاتش تشوف قدامها
ضحكت ضحكة تع استهزاء وقالتلو
- وعلاش راك تغزر فيا هكا راح تدربني واقيل
ناض فهد من زعاف وحكمها في وجها من جيهت لحيا راكم فهمتو
ولسقها فلحيط وقاعد يزير على سنانو ويهدر
- متخلينيش نقبرك هنا
-تبسمت وردتلو
- ديرها وش راك تستنا جدهم واحد تقتلني دورك ولا نطبق شروطكم
تخلع من درجة البرودة لي راهي فيها وطلقها حبطت للرض باسكو كي شدها طلعها شويا
راحت جيهت لكورسي تاعها ورفداتو وقعدت فوقو ورمات دوسي فلرض وقالتو مانيش موافقة على لخرا تاعكم هدا ادي زبلك وقول لي دار شروط هادي يجي يقابلني
اووووه رولاكس بنتي راكي زودتيها طايحة رجلاوي ولا واش جايبتها بعقليت راس راس
غزر فيها مليح وهو مزالو فهاديك البوزيسيون متحركش من بعد جاه إرسال في ودنو
وقالولو انتقل الخطة البديلة خلي نشوفو الرجلة تاعها الا تقعد ولا نو
فهد نحا هداك الجهاز من ودنو ورماه ودنا لعندها ووقف عند راسها وقاللها خممي مليح نتي ذكية اقرايها من كل الاتجاهات نروح على ساعة ونولي نسحق جوابك وراني قولت خميي قبل ما تقرري راح تندمي
رفد الدوسي وحطو فوق الطابلة وخرج
غزرت فيه مليح ومدارت حتى ردت فعل قعدت غايسة فيه وتخمم
خرج فهد وقعد فنفس لكولار ومن بعد خرج مهدي خمس معاه وتنهد وقالو مهدي
- ياخو بدات تصعاب
تنهد فهد وقالو
- ايه والسؤال لي راهو مطروح حنا معلابالناش جوابو
غزر فيه مهدي وقالو
- وكيفاش راهي مولات راس ليابس
غزر فلرض فهد وقالو
- حالتها متعجبش كامل كي قرات شروط دخلت في هستيريا من بعد سكتت دربة وحدة
قالو مهدي بتبهليل
- ياجدك دربا لا تكون مسكونا
غزر فيه فهد بنص عين 😒😒 تع منيتك
من بعد خرج كريم من عند راحيل مي كان رافد الدوسي في يدو
غزرو فيه فهد ومهدي وكمشو حبهتهم حايرين كيفاش كريم راه راقد الدوسي نورمالمو يخليهولها حتى تخمم وصل عندهم وقالو مهدي
- واش علي بابا علاه راك رافد الدوسي
جاوبو كريم وهو ينفخ فروحو
- انا خلاصت مهمتي يا وليدي سينياتلي على الشروط
حلو فمهم مدهوشين 😮😮😮 كيفاش سينيات على لورق ووافقت على هادوك الشروط
وقالو فهد
- كيفاش حتى سينسات هادي مليحة من راسها ماخممتش ميمبا
رد عليه كريم
- ساهلة عطيتلها دوسي بدات تبكي مع لول من بعد قولتلها خممي مليح باسكو لوكان متوافقيش راح تدخلي لحكاية تشيني عليهم بسيف عليك
عطاه مهدي على قفا راسو بسقلة وقالو
- وعلاه هددتها يا الحابس
حك راسو جيهت الدربة ورد عليه
- مهددتها ما والو قولتلها الصراحة مزدت من عندي ما والو علاه ماشي راح يسينيو عليهم بسيف عليهم ولا راني غالط
قاعد مهدي يجيب ويرد مع كريم فالهدرة واما فهد ارتكز على الحيط ورفد رجل وقعد غايس فلرض ويخمم وقال فقلبو
- راسها يابس على لحجرة وراني متأكد مراحش توافق عليهم هادوك الشروط
مهدي قاعد يروشلو في وجهو ومن صفق 👏 باش يفطن
غزر فيه فهد وقالو
وشبي قسامك دوركا نتا
ردلو مهدي
- افطن ياوليدي افطن جات دالتي باش ندخل عند مولات راس اليابس ونتا ادخل عند اسما راهم يقولو بلي هادي آخر فرصة باش نهدرو معاهم وادا مقبلوش ننتقلو للخطة البديلة
وقالو كي تدخل اقرالها شروط بصوت مسموع
غزر فيه فهد وردلو
- و علاه حمير هوما ميعرفوش يقراو
جاوبو مهدي
- متسقسينيش انا وليدي اشكيلهم هوما
تنهد فهد وقالو
- هيا راني حاب نخلصو هاد المهمة راسي راح يطرطق
من بعد تعاكشو كل من مهدي وفهد ودخل مهدي قبل فهد وكي وصل فهد عند الباب غزر فيها وهي قاعدة فنفس البوزيسيون متحركتش كامل تنهد وقال متيبسيش راسك
وغلق مهدي الباب ودخل هو تان عند اسما صابها تغزر فلورق وعيونها وديان و جلبابها مشمخ كامل من كترت الدموع
راح عندها طلعت راسها غزرت فيه وقالتلو
لوكان مانوافقش وش راح يديرولي
قعد ساكن ونحالها لورق من يدها وقعد في الكرسي لي مقابلها وقاللها صحبتكم راحيل سينيات على لورق ووافقت على هادوك الشروط
فتحت عينيها من الدهشة وقالتلو ونرمين وافقت
تبسم وردلها
- نتي في ميزك نتي
- حركت راسها بلا وقالتلو مراحش توافق حتى وتعرف بلي سينات رحيل حتى ونكون انا مراحش تعاندني
رد عليها وقاللها
- المهم راح نعاود نقرالك الشروط بصوت مسموع
هبطت راسها وقعد ساكتة
الشرط الاول:

🌠
🌠
🌠
ـ

ــــــــــــــــــــــــــــــــــــــــــــــ

المهم راح نحبس البارتي هنا باسكو مشتش تشجيع وكاين لي راهو يشوف وميديرش فوط ابار زوج بنات برك لي راهم يكومنتيو @MaNel5318
@Mayakail
Et @Inessaboud

بالاك الرواية معجبتكمش باسكو مفيهاش الحب والدرامة زايدة انا مدرتهاش على اساس درامة والحب كيما كامل الروايات حبيت ندير عفسة مختلفة مي معوالاسف مشتش تشجيع
مهم دمتم في رعاية الله وحفظه
سلام