خرج فهد من عند الرائد رابح بعد ما كملو الهدرة وسرحو باش يروح المهمة تاعو غير خرج خبط يدو فلحيط وقال
- علاش ، علاش هاداك
وزاد خبط يدو شحال من خطرة ورفد تيليفون وعيط لمهدي وقالو
- وين راك
رد عليه مهدي وهو يمضغ فالماكلة
- راني فجاهناما تجي معايا
كوبا عليه نحا مهدي تيليفون من ودنو وقاعد يغزر فيه وقال
- ياخي حمار تبهديلة تع موقبيل ويزيد يكوبي في وجهي
حط تيليفون وقاعد يكمل الماكلة حتى قعد قدامو وقالو عندي هدرة معاك
دارلو مهدي شنوفة تع دراري صغار وقالو
- متهدرش معايا
-بركا من تبهليل تاعك راني سيريو مهدي
دار ليه مهدي والله عاقد جبهاتو و رجليه يطلعو ويهبطو من بعد شاف يدو لقاها تسيل بدم عطاه مهدي بابي وقالو
- يدك راهي تسيل بدم وهاني نسمع فيك قول وشنو دار لفهد وقعد مقابلو وولا فمونك سيريو وعقد جبهاتو يستنى في فهد يهدر
وقالو فهد
- اسمع راح يبعتوكم لتيبازا عند هداك
دهش مهدي وجاوبو
- علاش ماشي ندوهوم عندنا هكا محطوط فشوروط
- نورمالمو ايه يجيو لعندنا مي رائد رابح راح يروح معانا انا وهلال المهمة تعنا وصدر أمر رائد الاركان انو ينتقلو لتيبازا بيدما نكملو لمهمة تعنا
زبط يدو مهدي وقالو
- على بيها هداك الزربوط لقيتو يدور هنا كي لكلب
- شكون هادا
- هدا دراعو ليمين
- راهو هنا مهم مهدي راح نسيي نكمل لمهمة هادي في أقرب وقت ممكن راك تعرفهم صحاب الكازيرنا هادوك بلا منحكيلك عليهم ولبنات هادوما بنات فاميليا عسهم كتر من روحك مهدي
- مكلاه توصي فهد مايا تان راح تكون معانا هاديك متخافش عليها
- ايه هاديك علابالي بها قادرتلها مي لبنات هادوما راهم لا حول ولا قوة
- ايه عندك الحق ... ايه حقا قولي سينيات بو راس يابس
- لالا مسينياتش راح الرائد يهدر معاها دورك
- الله يجعل الخير ان شاء الله تفرى خير ما تطلع للفوق وتولي كبيرة
- ايه ان شاء الله تفرى
- ونتا دورك راح تستنى رائد وتروح معاه
- لالا نروح نسبقو راني قولتلو بلي نسبقك مع انو هو كان حاب نطلعو كيف كيف مي كل ما كنا رابيد فهاد المهمة كل ما كملناها بكري
ناض مهدي وعنق صاحبو وعطاه بدبزة للكرش وقالو هادي تع تبهديلة تع موقبيل
ضحك فهد عليه وقالو كان علابالي راح تدرب متخليهاش في جلدك لحكاية مهم مهدي بلا منوصيك
- متخممش راهم في عينا تهلالي في روحك وف هلال ومتتهوروش
- شوف شكون راه ينصح فيا ويقولي متتهوروش شكون لي كان يزدم كي لكبش دايمن يا راسا
- ههههه هه روح متبهدلنيش دورك نتا
- هيا نخليك دورك راهي جات هليكوبتار تاعي نتلاقو عن قريب ان شاء الله
- ايه ان شاء الله
تقاسمو فطريق فهد راح جيهة سطاج ومهدي راح باش يبدا بالاجراءات لي لازم يديرهم وهو فطريق رايح حتى سمع كلام فالكولوار فلجيهة لوخرة
.....واش زين وين بيها راح نكونو فنفس لبلاصة وش رايك لوكان نديرو فيها موعد 😏😘
مردتلوش مايا وكملت طريقها وراح شدها من يدها وقالها
.....وشبيك مزروبا معجباتكش واقيل
عوجتلو يدو وهبطتلو راسو للرض وقالتلو مايا
-مزال مولداتوش يماه لي يمسني احمد ربي جيت يد ليمنا تع رائد عبد الحق لوكان راني قبرتك في بلاصتك واعمل مليح متدناش لجيهتي سينو لمرة لجايا متحصيش وش نديرلك يا حيوان
وخبطتلو راسو فلرض وكملت طريقها تخبا بجيها مهدي باش متشوفوش وجازت عليه ومحستش بيه وهداك قعد يتكور كي لزربوك وشاد راسو
راح ليه مهدي وطابس عندو وشدو من ليكول تع تريكو وطلعو لعندو وين قابل وجه مهدي مع وجهو وزير على سنيه وقالو
- إياك ونزيد نصيبك دور بنحيتها لمرة لجايا ندفنك ونتا حي راك فاهمني ولا نفهمك بلغة وحدوخرة
- ونتا وش دخلك راك عاقد عليها
خبطو فلحيط وخنقو فرقبتو وبدا يفرفط بين يديه كي لكبش لمدبوح وولى وجهو حمر وقالو مهدي
- ماشي شرط نعقد عليها باش نديفوندي عليها هي زميلتي وتتسمى جزء مني يمال تمسها هي يتسما مسيتني انا ديرها فمخك لمتقوب هادا مليح هاد الهدرة ونزيدلك هاد الهدرة تشمل لبنات لي راهم حايجو تماك نلقاك تدور بوحدة فيهم نمحيك راك فاهم
طلقو وهداك هبط للرض قاعد يرجع فنفس بسيف وبدا يسعل وراح مهدي وخلاه وبدا هداك يقولو بين وبين روحو راح نوريلك شكون انا ياحمار ولا ميسمونيش توفيق رفد روحو بسيف وسڨم حوايجو وخرج
مهدي راح من جيهة لي راحت فيها مايا ودقدق فلمكتب تع الرائد ودخل صابها قاعدة دايرة رجل فوق رجل كي شافتو هبطتها ( الاحترام ياخويا ياخويا يامايا 😜😜) هو قعد مقابلها ومهدر حتى كلمة هي كانت منارفيا مي ميبينتلوش وهو مغزرش فيها وقاعد يزغد في رجلو بزعاف
وقالت في روحها وشبي جدو هدا شد سيريو ولا واش موالف ياخد طريحة على يدي وكي يشوفني ينسى ويقعد يتبهلل كلي مصرا والو ودورك راهو مطلع شواربو لسما
مي هي نعلابالهاش بلي مهدي راهو مقلق من هداك الزوبيا تع توفيق 🤫🤫 متقولولهاش خليها باش تدير حسابها
غاست فيه وقالت في قلبها ( ياجدك حتى ويكون زعفان شباب ) نفضت راسها من الافكار لي جاوها وقالت بصوت مسموع - اووووف مايا وش راكي تخممي
هو طلع راسو غزر فيها مليح وقال
- ياخي مهبولة تهدر وحدها كي لمجنونة
- حبست لجديب تاعها وغزرت فيه وقالتلو
- ونتا وش دخلك ياسيدي التها بأمورك ماشي خير ليك
- شكون قالك راني سامع بيك انا أصلا بقالي همك باش نديرلك حساب
هي تشوكات من هدراتو مي هو كي ستفزاتو جاوبها هكاك مي جوباتو
- حتى انا مانيش نقول ب لي راك دايرلي حساب ولا راني نخمم بلي نتا دايرلي حساب نتا بالنسبة لي زميل لا أكثر ولا أقل وهادا المهمة من الاحسن كل واحد يحترم روحو ويدير لي عليه متوقف في طريقي منوقف في طريقك باسكو لمرة لجايا نقتلك ومنخمم في والو
- مليح كي خدمتي مخك هداك وقولتلي حاجة تصلح
وهو يتناقشو دخل عليهم رائد رابح كان رافد دوسي في يدو غزر فيهم وشاف فيهم مليح ناضو وادولو التحية راح كمل طريقو وقعد فالبيرو دار ليه مهدي وقالو - شاف سينيات نرمين على لورق
- إيه سينيات
- ياخاه وش درتلها شاف كاش أية قريتها عليها ولا كاش سحر باسكو جميع طرق لي دناهالها وهكاك وموافقتش
- مقريتش عليها حتى حاجة انا فهمت وش كانت تحوس
ولبيتلها رغبتها
Flash back
دقدق فلبابا ودخل وقال
- السلام عليكم ورحمة الله وبركاته
ردت السلام بلا متغزر فيه
- عليكم السلام
راح قعد مقابلها وهي مغزرتش فيه من بعد نطق وقاللها
-نعرفك بروحي انا رائد رابح ×××× ونتي هي نرمين ××××××
غزرت فيه وجوباتو
- ادا راك جاي باش تقنعني بشروطكم نقولك متعبش روحك حاولو لي قلبك و مستفادو بوالو تاخد راي متضيعش وقتك معايا رايي مراحش يتبدل
جاوبها
-بصح انا ماشي كيما لوخرين أصلا شوفي قعدتي غير نتي لي ماسينييتيش شوفي اسما ورحيل سينياو
ورالها ليدوسي تاعهم وهي ضحكت وردتلو
- ايه وين راه المشكل سينياو ربي يسهل عليهم
دنات فطابلة وقالتلو
- راسي وراسهم ماشي فشاشية وحدة حتى وراني عرفت بلي سينياو رايي ميتبدلش انا وهوما ماشي كيف كيف .
- نرمين باش تخرجي منا بساهل راني نظمنلك مراحش تكون بساهل
- ربعت يديرها وضمتهم لصدرها وتكات على لكورسي وقالتلو
- إيه وانا راني واجدة نتحمل مسؤلية افعالي متخممش عليا
-صار هكا متأكدة من كلامك
- متأكدة 💯%
- والديك
دم نشف في عروقها مي مبينت والو دارت روحها عادية
وجوباتو ببىورودا
- ايه وشببهم راح تهددوني بيهم علابالي ساهلة نتوما أصلا راح تسهلوها عليهم وعليكم هوما يدخلو للجنة ونتوما ترفدو دنوبهم
دهش من ردت فعلها ودرجت برودها مع انو كلاهما خرج من فوق قلبها مي كان لازم عليها تقول هكا باش توصل لوين راهي حابة
- راكي عارفة وش راكي تهدري نرمين
- ايه علابالي وراني واعية على كل حرف قولتو دنيا هادي أخرتها موت ادا مماتوش ليوم يموتو غدوة يمال يموتو شهداء ويدخلو للجنة خير ما يموتو نورمال ويتحاسبو .
- تع صح نتي مقدرتلكش صراحتا وراني مشوكي من ردت فعلك هادي وبرودتك التامة
تبسمت على جنب 😏😏
وقاللها رائد رابح
- يمال لازم يكون كاين حل يرضي الطرفين
ردت عليه
- بما انو وعلى حساب وش فهمت انو انا حتى ويقتلو والديا مراحش تطلقوني صح ؟! حتى نوافق
- ايه حتى توافقي
- وانا بما انو أعز حاجة قدرت نستغنى عليها يمال رايي مراحش يتبدل
- والحل
- الحل ساهل
دنات لعندو وحطت يديها فوق الطابلة وقالتلو
- لازم ندير شروط توالمني باش نوافق على شروطكم
فتح الرائد رابح عينيه صفاحي
وكملت نرمين
- ومدام لحقتو وين كنتو راح تهددوني بوالديا حظرت الرائد يمال معندكمش الوقت اللازم باش تجيبو وحدوخرة باسكو راكم جزتو على هدا المصاعب مهمة خلاصة لقول باش نوافق لازم نحط شروطي ونورمالمو كنت متوقع هاد الشيء ولا راني غالطة ؟!
غمض عينيه وجاوبها
- ايه كنت متوقع هاد الشيء مي مكنتش متوقع الجرئة تاعك تكون لهاد الدرجة
وقال فقلبو
مدام أكدو عليك نتي كاين حاجة مهمة فيك نتي باش أكدو عليك لهاد الدرجة مي وشنو هي وشنو هاد الارحية فكلامك وكل حرف راكي تخرجي فيه راكي واثقة من نفسك جامي قابلت وحدة كيفك مي مراحش نتعمق فهادو صوالح عندي مهمة راهي نستنى فيا لازم تكملها من بعد راح نعرف وشنو هو السر فيك نتي يا نرمين
هي قاعدة تغزر فيه وشافتو يخمم مهدرت والو قاعدة نستنى فيه وش راح يدير
خرج من عالم تفكيرو وقاللها
تفضلي وشنو هوما شروطك نرمين
- لا مراحش نقولهم
تعجب من رفضها ورد عليها
- وعلاه كيفاش راح نعرفو شروطك هادو
- شروطي تكتب وتمضي عليهم مانقولش شورطي فلهوة حظرة الرائد
✳️
✳️
✳️
✳️
#
NANTI
أنت تقرأ
لعبة الحرية بالهجة الجزائرية freedom game
Romanceشخصين متناقضين 🙄😒 ♂️ الرجل ❌♀️ النساء ♀️ و المرأة ❌♂️ الرجال شخصين لايطيق احدهما الاخر هل سيكون هناك حب بينهما ياترى 🤔 ؟! هل ينذمج الزيت مع الماء ؟ هل ينذمج بين سليطت اللسان و قسوة الرأس بين الجبروته وبرودة دمه وكرهه الشديد لنساء ؟ ...
