احلام فتاة شرقية

الفصل العاشر

ويهمك فى ايه ان شاء الله

نظرت له لتجيبه بقوة
يهمنى يهمنى انك صديقى الوحيد ليا هنا يهمنى فى انك ارجل واحد عرفته فى البلد دى يهمنى فى أن انت الوحيد إللى بعرف اتكلم معاه عن نفسى من غير ما اهتم هيبصلى ازاى لانى عارفة انه مش هيبصلى بطريقة وحشة ومش هيفهمنى غلط
قاطع حديثها قائلا
وانا يهمنى انه يحصل معايا نفس الكلام يهمنى لما اتكلم مع حد ابقى واثق انه مش هيفهمنى غلط ابقى واثق انه مش هيفسر كلامى ب الف معنى من حقى لما اعمل موقف جدعنه مع حد والموقف واضح والمعنى واضح ما يبقاش زى إللى مستنيلك  على غلطة وان ملقاش يعمل من الخير شر ويحور الواضح لالف معنى يهمنى الموضوع دة، يهمنى لما اعمل فعل الاقى ليه رد فعل كويس بمقدار الخير إللى عملته مش الاقى ليه كلام مختلف انا يهمنى أن إللى عاوز يتكلم معايا وعاوز يسمعنى.. يسمعنى لانى اهمه مش علشان يروى فضول فيه تجاه مكان مشافوش انتى بتقولى انى شفتك زى ما انتى وشوفتكيش على انك مين وبنت مين بس انتى ماشوفتنيش، بتقولى انى اعرفك كويس علشان كدة بتتكلمى معايا من غير ما تكونى خايفة من حاجة بس انا للاسف معرفتكيش انتى عاوزة ودان بس تسمع من غير ما يهمك هى مين او هى تتمنالك الخير ولا لا، انتى كل إللى يهم انك تحسى انك موجودة فى حياة حد من غير ما يهمك أن كان وجودك شئ اساسى ولا مجرد شكليات ولا حتى وجودك ليه أهداف تانية، انتى هبلة يا لوجين عاوزة تحسى انك موجودة فى حياة الناس بس مش واثقة اذا كنتى موجودة فى حياتهم ولا لا، انتى بتوهمى نفسك بوجودك وانتى واثقة ومتأكدة انك مش كدة علشان كدة مع اول غلطة بتتوقعى منهم الخيانة لأنك عارفة انك مش موجودة فى حياتهم ولا ليكى اساس عندهم، انتى هبلة يا لوجين لأنك يهمك يكون حواليك ناس من غير ما تهتمى اذا كانو عاوزينك تبقى احسن ولا نفسهم يوقعوكى ولا حتى متفرقيش معاهم، انا مختلف عنك تماما يا لوجين انا يهمنى انى اكون حتى لو فى حياة إنسان واحد بس.. بس هو يعمل اى حاجة علشان يشوفنى احسن ويشوف سعادتى وما يهمنيش العدد بس يهمنى الوجود ممكن يكون واحد اهم من عشرة على سبيل المثال انتى يهمك انك تحبى وتتحبى ف اخترتى اول واحد سمعك واهتم بيكى  بس مش متأكدة اذا كان بيحبك ولا لا كل إللى يهمك انه يقولك كلام حلو ويخرج معاكى بس يا ترى ينفع يكون زوجك؟؟ الحب أفعال مش أقوال يعنى لو بيحبك بجد وشاف راجل بيكلمك كان غار عليكى، لقاه بيزعقلك وطريقته واضحة انه غضبان منك كان وقف قدامك وحماكى منه، لقاكى خارجة وسيباه كان جرى وراكى او حتى وصلك علشان يطمن عليكى، مكانش سمح لحد يزعقلك، لكن دة ما اهتمش هل يا ترى لو اتجوزتيه واثقة انه هيخاف عليكى حتى لو من الهوا الطاير هيكون اب حقيقى وزوج بجد ولا مجرد تافه كل إللى يهمه الفسح وان مكانش معاكى يبقى مع غيرك؟؟ هل يا ترى واثقة انه معاكى علشانك ولا علشان فلوس باباكى؟؟ واثقة انه عقليته زى مامتك كل إللى يهمه الحب رغم اختلاف الثقافات ولا اول موقف هيحصل هيشتمك بانك عربيه ولا انك لا ترقى ل مستواه؟؟ عمرك فكرتى فى حاجة زى كدة ولا بالنسبالك الحب مجرد كلمة حلوة وخروجة وفسحة وأمير وسيم يخطفك على حصانه الابيض ويطير بيكى فوق السحاب؟؟