احلام فتاة شرقية

الفصل الرابع الجزء الاول

كانت تبكى إلى أن دخل عليها والدها لينظر لها متعجبا من بكاءها هذا ليتجه ناحيتها متسائلا
فيه ايه مالك يابت؟؟

نظرت له بألم ثم سألته
انت بجد عاوز تعرف مالى؟؟

نظر لها ثم زجرها بغضب من فرط رعبه من بكاءها ذاك
بت انتى انا مش ناقص وفيا إللى مكفينى ما تقولى مالك حد ضربك او عمل لك حاجة ايه إللى حصل

نظرت له ثم اجابت بكلمة واحدة
وليد

زفر بارتياح ثم سألها
ماله

بكت أكثر وهى ترتمى بين احضانه قائلة
اهانى يا بابا قاللى انى اقل من مستواه المادى والاجتماعى وقال لى انى شكلى وحش كمان وانه شكله احلى منى انا مش عاوزاه يا بابا

قطب جبينه ثم أبعدها عنه زاجرا اياها
ودة إللى مضايقك انه قالك انك مش من مستواه طيب ما دى الحقيقة انتى مش شايفة الحى إللى ساكنين فيه ولا شقتنا دة احنا قاعدين فى منطقة الناس راكبة فوق بعضها وبعدين ايه يعنى لما يقولك وحشة اهو بيهزر معاكى اية الراجل ميعرفش يفك معاكى بكلمتين
ثم صرخ بعلو صوته صارخا
فاطمة يا فاطمة

جاءت زوجته تركض مهرولة ثم سألته بذعر
مالك يا حليم ايه إللى حصل يا اخويا

نظر لها ذاك المدعو حليم ثم صرخ
شوفى بنتك إللى اتجنت دى عاوزة تسيب خطيبها علشان قالها كلمة ضايقتها

نظرت له ثم قالت بألم من بين دموعها المنسابة
مش احسن من انى اطلب الطلاق بعد ما اتجوز لانه ضربنى

نظر لها ثم صرخ
انتى اتجننتى هيضربك ليه مكانش كلمة الراجل قالهالك بطلى تفاهة هتسيبيه علشان قالك شكلك وحش ايه الجنان دة لازم تدينى سبب مقنع

صرخت به ببكاء
واهانته ليا مش سبب مقنع

لا مش مقنع وبعدين ما اهانكيش الأهانة إللى هى ومضربكيش

لطمت خديها دون شعور منها وهى تصرخ ببكاء
وهو انا هستنى لما يضربنى

زجرها بنظره ثم صرخ
بت اتلمى كدة وتعقلى وبعدين اهى كلمة ومش هتتكرر وانا هكلمه ومش هيعمل كدة تانى

نظرت له ببكاء وهى تقول
يعنى كمان هتقل كرامتى قدامهم مش كفاية انك مطنش وناسى كرامتى لا كمان عاوز تعرفه انك عارف ومعملتش حاجة ولا هامك الموضوع ليه مصر تستقل بيا كدة ليه مصر متخليش ليا قيمة قدامة انتو ماسكين فيه ليه وعايزين تجوزونى ليه ليه

صرخ بها باندفاع وكلمات كانت كالسياط تحرق قلبها قائلا
وليه لا مش العريس الوحيد إللى جالك مش كفاية انك وصلتى لنص العشرين ومفيش واحد بص فى خلقتك ومخللة جنبى
ثم اكمل بسخرية قاتلة
وبعدين هيأذيكى فى ايه عريس كامل مكمل معاه كليه وهيعيشك فى شقة لوحدك فى حته نضيفة وبيكسب كويس وشكله مش وحش ولا أقرع ولا بكرش زى ما انتو بتتمنو لازمها ايه التفاهة دى وفوق كدة دخل البيت من بابه