- السندباد ، توفيق ، ابتهال ، شوفوا ابوي جاب لي شنو ، كلكم ما عندكم زي اللعبه العندي دي و كمان جاب لي مصاصات كتييييره و ما ح اديكم معاي .
= ما عايزين ألعابك دي ، بابا جاب لي مسدس و ملابس كتيره و توفيق أبوهو جاب ليهو جزمة سوداء جديييده ، و ابتهال أمها جابت ليها فستانين و أبوها جاب ليها تلفون بغني ، حاجاتنا اسمح من حقاتك .
- لكن مها ما جابوا ليها حاجه ، واااا تستاهل ، واااا ما اشتروا ليها حاجه ، واااا ما عندها أبو ، ابوها مشى خلاها 😝
بتذكر اليوم داك زعلت زعل و بكيت جنس بكى ، كلهم قعدوا يكاوا فيني و يغيظوني بألعابهم الجديده ، في الزمن داك كنت بقرا في أولى روضة و ابتهال في تانيه روضة ، و توفيق في تانيه ابتدائي و حيدر في خامس ابتدائي ، ديل أولاد اعمامي ، نحنا 5 أسر ساكنين في 5بيوت متداخله مع بعضها ، أولاد اعمامي كتار في القدري و في الأصغر مني و في الأكبر مني لكن(توفيق و السندباد و ابتهال و حسام )هم أكتر ناس كنت بلعب معاهم من أولاد اعمامي و هم اكتر ناس بتشاكل معاهم و دايما بغيظوني و بضحكوا علي و ما بخلوني إلا ابكي و امشي لأمي .
♦️
يمه يمه ابوي وينو ؟ مش قال ماشي يجيب لي مصاصه و ملابس العيد و جاي ؟ليه ما جا تاني ؟ اضربي ليهو خليهو يجي و يجيب لي معاهو فستان العيد ، ناس رغد و ابتهال و مرام كلهم اشتروا ليهم ملابس جديده للعيد إلا انا يا أمي ، اضربي ليهو قلت ليك اضربي ليهو 😭😭
- ضربت ليهو قبيل و قال جاي بكره ، و حيجيب ليك معاهو ملابس العيد و معاهم ألعاب كتيييره ، لكن انتي ما تبكي سمح ؟
= طيب ما ببكي لكن قولي لبابا يجي بسرررعه ، عشان ناس ابتهال يشوفوا ملابسي الجديده و ما يضحكوا علي و يقولوا لي ابوك ما جاب ليك ألعاب زينا 😔
-سمح يا بتي بكلمو ، هسي انتي نومي و الصباح رباح ....
✨
✨
حيييي انا يا قلبي ما تذكريني ، اقسم بالله واجعني وجع يا فوزيه ، دهبي كلو سرقو لي ، الله لا كسبو الخاين .
- ما براك يختي السرق منك ، كلنا سرقنا حتى مرتو ما سلمت منو ، طعن اخوانو الخايب و سرق قروشهم و دهب نسوان أخوانو ، هسي دا بسموه أخ عليك الله ؟! اخوانو قصروا معاهو في شنو عشان يعمل عملتو دي و يهرب ؟ القدموهو ليهو شويه ؟ بيتو دا بنوهو ليهو طوبه طوبه و ما شالوا منو ولا قرش أحمر و في النهاية باع بيتو و سرقنا كلنا و هرب ، بعد دا كلو أخوانو ما رضوا يفتحوا فيهو بلاغ ، كان هو نسى رابطة الأخوه البيناتم هم ما نسوها و عمرهم ما حيعملوا فيه العملو فيهم ، لليوم مافي منو خبر غطس غطسة ماف ليها أثر ، ولا كلف نفسو يتصل و يطمئن على اسرتو الخلاها وراهو هل هم حيين ولا ميتين ، جيعانيين ولا عطشانين ، غيتو عملتو دي ماف زول عاقل بيعملها .
- يا ريتهم فتحوا فيهو بلاغ ، الزي دا ذاتو ما يستاهل يعملوا فيه حسنه كلو كلو ، من يومو ما بتحمل ليهو مسؤولية و اسهل حاجه عندو السرقه ، انا من شوفتي ليهو قلت لعباس اخوك دا ما تمام ، تصرفاتو كلها تصرفات زول طايش ساي و شبهو شبه ناس المخدرات و البنقو ، قال لي بالحرف هوووي يا مره دا اخوي و اوعك تاني تتكلم عنو بالطريقه دي ، لا قدامي لا وراي مفهوم الكلام دا ؟ و من اليوم داك بقيت بس بشوف بعيني ، اظنهم براهم لاحظوا لعمايل أخوهم و في النهايه كلموا أبوهم ، بدل يقعد مع ولدوا و يوري الصح من الغلط مشى و عرس ليهو ، اها في النهايه عمل شنو ؟ سرق مننا كلنا و باع بيتو و هرب و خلى وراهو أسرتو لا عندهم تالي لا والي ، ما عارفه قلبو في الساعه ديك قال ليهو شنو .
- و فوق دا مضطرين نسكن مرتو معانا ، ما كفايه العملوا فينا راجلها ، دا كلو من عمي هو المشى و جابها و سكنها معانا ، غيتو في البيت دا غبينة ساي بكتلنك .
♦️
♦️
جيت متأخره من المدرسه ، دخلت البيت و ما لقيت أمي ، مشيت لحبوبه في مظلتها سلمت عليها و قلت ليها أمي وين ، قالت لي من الصباح ما شفتها ، امشي على بيوت اعمامك ديل احتمال تلقيها هناك ، قلت ليها سمح بمشي اشوفها هناك ، طلعت منها و ما مشيت اشوفها في بيوت اعمامي لأني متأكده انها ما هناك مافي شي بقعدها معاهم مشيت استحميت و غيرت ملابسي و جيت صليت ، انتظرت أمي شويه كدا و لمن ما جات ختيت لي أكل و فطرت ، بعد شويه سمعت صوت حبوبه و هي بتناديني (طبعا انا و امي ساكنين مع حبوبتي و جدي في بيت واحد و جنبنا بيوت اعمامي)، قمت مشيت ليها ، قلت ليها ، قالت لي أمك دي لسه ما جات ، قبل ما أرد عليها امي جات داخله ، قلت ليها هدي ليها جات ، كان باين عليها تعبانه و مهمومه ، دخلت سلمت علينا و قعدت مع حبوبه ، جريت جبت ليها مويه و اديتا تشرب ، قلت ليها كنتي وين من قبيل بفتش عليك ، قالت لي مشيت على ناس سعيده اخت راجلها دي اتوفت ليها اسبوع و مشيت أديها الفاتحه ، قلت ليها طيب ماشه اجيب ليك أكل ، قالت لي سمح امشي جيبيهو ، جهزتو و جيت شايله الصينيه قبل ما أدخل سمعت حبوبة فاطمه قالت لأمي قالوا جاي بعد اسبوع معقوله ما كلمنك ؟! امي قالت ليها انتي عارفه علاقتهن بي متوتره ، والله ما بكلمني بأي حاجه ، حبوبة قالت ليها انتي اعملي العليك و ما تتلومي معاهن يا بتي كان هن كعبات انتي ابقي احسن منهن و تقصري منهن ، امي قالت ليها بري والله ما بقصر منهن و العلي بعملو ، دخلت و قلت لحبوبه منو الجاي بعد اسبوع ؟ قالت لي دا حيدر قال جاي السودان الأسبوع الجاي ، عاينت ليها بإستغراب و انا بسأل نفسي حيدر منو ، امي ضحكت و ضربتني في راسي و قالت لي السندباد نسيتيهو ؟!! يادااااب جمعت و اتذكرت ، زماااان كنا مسمنو السندباد ، لأنو بحب قناة اسبيستون دي شديد و تحديدا كرتون سندباد ، عندو جملة دايما بقولها يلي هي " انا السندباد "حتى و هو نايم بقولها 😂 شويه شويه لحدي ما كلنا بقينا نقول ليهو السندباد ، اسمو دا انا نسيتو خالص و اتمسح من ذاكرتي ، قلت لأمي هو كان مسافر وين ذكريني ، قالت لي خلاص بقيتي تمسحي ، 100 سنة ساكنه في البيت دا و ما عارفاهو سافر وين ، قلت ليها خليتو ما عايزا اعرف ، حبوبه ضحكت و قالت لي يا حليلو سافر قبل 10 سنوات لخالو في قطر و كمل جامعتو هناك و اشتغل هناك ، كان بسأل منك طوالي لمن أمشي ليهم في الحوش البهناك ، عاد انتي كعبه و جافيه شديد ولد عمك ما حصل مرة سألتي عنو ، لمن يتصل علينا بتكلم معانا كلنا نفر نفر إلا انتي دايما غايبه ، بري منك انتي دي كعبه شديد و جافيه ، قلت ليهم ندمتوني على السؤال ، قايمه أخليكم و اشوف قرايتي وين ، أمي قالت لي بمناسبة القرايه لقيت استاذه سوسن ، قالت لي عندكم معسكر بادي ليهو اسبوع و سألتني مها ليه ما بتحضر المعسكر ، انتي يا بتي ليه ما كلمتيني ، قلت ليها المعسكر دا قروش ساي و ماف داعي ليهو ، الحصص المدرسية كفايه علي ، قالت لي انا قلت ليك ما قادره أدفع قروش المعسكر ؟ جيت شكيت ليك ؟ انا ما شلت هم القروش انتي البشيلك همهم شنو ؟ قلت ليها لكن يا أم.. قاطعتني و قالت لي من بكرا تقعدي و تحضري المعسكر و إياك تجي راجعه مالم ينتهى المعسكر ، هسي امشي و كملي قرايتك ، مشيت منهم و انا زعلانه شديد ، عارفه امي حتبذل جهدها عشان توفر لي قروش الحصص الإضافيه دي و انا ما عايزا اضغط عليها و احملها فوق طاقتها .
في العصريه جوني بنات اعمامي ابتهال و مرام ، و قعدوا يتونسوا معاي ، طبعا بتماسخ معاهن و برد عليهن ببرود بإختصار شديد ، انا من نوع الناس البخرب علاقتو مع أي زول بتربطوا علاقه مع زول ما بطيقوا ، بنات اعمامي ديل ما بحب اقعد معاهن ولا بحب اتونس معاهن ، ما بمشي ليهم في بيتهم إلا لو حبوبه رسلتني أو في حاجه ضروريه مع إنو بيوتهم متلاصقه مع بيت حبوبه و في بيناتنا أبواب كل بيت فيهو باب نص بوديك للبيت التالي ليهو ، ابتهال قالت لي السندباد قال جاي بعد اسبوع ، قالت كلامها دا و هي فرحانه ، عاينت ليها و قلت ليهو ببرود اي عارفه حبوبه فاطمه قالت لي ، قلت كلامي دا و رجعت عاينت لكتابي و انا بمشي القلم فيهو ، مرام قالت لي طبعا بقى رهيب و وجيه ، العيون عسليه و اللون اسمر فاتح و الشعر اسود و ناعم ، وووبعلي من سماحتو 🙈 و قال حيجيب لينا معاهو حاجات من هناك ، امبارح لمن اتصل علينا سألنا عايزين شنو من هناك ، كل وحده فينا قالت العايزاهو حتى عماتي طلعن ما هينات و قالن عايزات كريمات ، إلا انتي يا مها ، عشان ما كنتي قاعده معانا امبارح ، قلت ليها انا ما عايزه أي حاجه من زول ، سكتت و عاينت لإبتهال ، بعديها استمروا في الونسه عادي و كلامهم كلو كان عن حيدر لمن عملوا لي صداع ، زهجت منهن زهجة ، فوق الصداع العملوه لي ما خلوني اقرا بمزاج ، ما صدقت لمن مشوا مني ، اخيرا ارتحت من كلامهن الكتير و وجع الراس ،، بعد يومين كنت جايه متأخره من المدرسه عشان بقيت احضر المعسكر زي ما قالت لي أمي ، طبعا ضاغطننا ضغط الجن ، كلو عشان ممتحنين و دي آخر سنه لينا في الثانوي ، لقيت جدي خاتي ليهو كرسي في الشارع و بلعب في الشفع الصغار سلمت عليهو و دخلت البيت ، طبعا من الباب بنادي على أمي ، زي و زي كل السودانيين أول ما نجي داخلين البيت أول كلمه بنقول "أمي" سمعت صوتا جاي من المطبخ و هي بتنده علي مشيت عليها و سلمت و قلت ليها بتعملي في شنو ؟ قالت لي عماتك ديل عاملات قعدت صندوق ، قلت اسوي الشاي و الجبنه ديل و اشيلهم معاي ، ختي شنطتك و شيلي لي الكبابي ديل ، قلت ليها حبوبه ذاتا هناك ؟ قالت لي آيي هناك ، ختيت شنطتي و شلت ليها الكبابي غصبا عني لأني ما عايزا امشي ليهم بهناك ، دخلنا ب"باب النص" كانوا في نسوان كتار قعدات في البيت ، وقفت لأمي جنب باب الغرفه و قلت ليها بقيف ليك هنا ، خشي و تعالي شيلي مني الكبابي ديل ، قالت لي ليه مالك ؟ قلت ليها النسوان كتار و ما عايزا اخش ، قالت لي طيب اقيفي هنا لمن اجيك ، دخلت و جات راجعه شالت مني الكبابي ، قلت ليها يلا انا راجعه البيت ، قالت لي سمح ، سخنت ليك الغدا ، أكل و اشربي العصير العملتو ليك ، صلي و نومي طوالي و ...قاطعتها و قلت ليها بتعب حااااضر يمه ، ضحكت و دخلت تشرب الجبنه مع النسوان ، اثناء ما انا طالعه من بيت عمي ، سمعت صوت مرام و هي بتناديني من جوه غرفتهم ، في سري قلت هسي العارض دي طلعت لي من وين ، رفعت ليها يدي و ماشه ، جاتني طالعه و قالت لي تعالي اتونسي معانا كلنا ملتمين في الغرفه ديك بنشرب في شاي و جبنه برااانا و بمزاج ، قلت ليها ما قادره والله بجيكم يوم تاني ، هسي انا ياداب دي دخلتي ، تعبانه و مرهقه ، ماشه ارتاح شويه ، بجيكم بعدين ، قالت لي كذااابه ما حتجي ، يلا تعالي معاي ، جرتني غصب معاها ، دخلت سلمت على بنات اعمامي كلهن ، كانوا بتونسوا و بمشطوا في شعر بعض ، و كالعاده ونستهم لا تخلو من الإسمو حيدر دا ، سلمى بت عمي قالت ليهم ملاحظه انو ونستكم كلها بقت عن السندباد أخوي لو بتفكرن فيهو فأحسن تصلحن علاقتكن معاي و بس 😌قامت مرام قالت ليها سوسو اكب ليك جبنه ولا شاي يا عيوني ، قاموا كلامهم ضحكوا ، قلت ليهم عن اذنكم انا ماشه بعد دا ، سلمى قالت لي يخسسسي عليك متين قعدتي ؟ قلت ليها مضغوطه والله ، المره الجايه ، ابتهال قالت لي عاد التقول كتلنا ليك زول نحنا دقيقه ما بتعديها معانا ، قلت ليها لا ما كده والله ، بس تالته دي عايزا ليها قرايه كتيره ، نمارق قالت ليها خليها على راحتها الأباك ريحك ، ردت زحل و قالت لي ما براك الممتحنه هسي في منى و تسابيح برضو ممتحنات و نحنا القدامك ديل امتحنا و سبقنا ، لكن ما عملنا البتعمليهو أبدا ما قاطعنا زول ، نمارق قالت ليهم يا جماعه بت الناس ما عايزا تقعد معاكم تغصبوها ليه ؟ عاينت لي و قالت لي امشي امشي ما يأخروا ساي ، طلعت منهم و انا مغيوظه من كلامها ، قلت ما اشتغل بيها دي وحده كريها ساي ، رجعت البيت صليت العصر و أكلت و شربت العصير ، قلت احسن انوم و أخد لي راحه شويه ، جبت توب أمي و اتغطيت بيهو
✨
ليسَت يداي من كانت تلوّح لكَ عند الوداع كلّما مشيتَ مبتعداً خطوةً، بل قلبي المُستوطن في راحة يدي من كانَ يُلوّح راجياً إيّاكَ أن تبقى بالجوار.♥️
يتبع........
