طبعا الدنيا كانت ليل و وجوه الناس الجايين علينا ما ظاهره ، لحدي ما وصلونا انا ما وقفت بكي ، كنت منزله راسي و ببكي ، فجأة سمعت زول قال ليهم أرفع يدك يا زول ، رفعت راسي و استغربت لمن شفت ناس البوكسي نزلوا و مسكوا الحرامي حتى هم جايين بأسلحتهم ، واحد هرب و التاني ما قدر يجري لأنهم ماسكنوا ، خفت زياده و قلت أكيد ديل اكعب منهم ، واحد جا علي و قال لي انتوا كويسين ؟ عاينت لعم جلال و هو واقع جنبي ، الراجل انتبه ليهو و نادى الرجال المعاه و جوا رفعوه قال لي ارح اركبوا معانا ، هزيت ليهو براسي بمعنى لا ، قال لي ما تخافي يا بتي والله ما بنعمل ليكم حاجه ، نحنا اصلا كنا جايين من عرس و سبحان الله الطريق دا نهاي ما حصل جينا بيهو لأننا عارفين البيه و العليهو ، ربنا رسلنا ليكم و جعلنا سبب في نجاتكم ، قومي يا بت الناس ، الله يرضى عليك يمكن هسي يجونا هنا و يقتلونا كلنا ، هم رفعوا عم جلال و انا جبت ميري و ركبنا معاهم ،، بعد مساااافه طويله وقفوا جنب قريه و نزلوا هناك ، واحد منهم قال ليهم الحرامي دا نعمل بيهو شنو ؟ التاني قال ليهو وديهو لمزمل و بعرف يتصرف ،، اكبر راجل فيهم قال ليهم انا بسوق الضيوف ديل معاي البيت ، بس ساعدوني و شيلوا لي الراجل دا ، فعلا شالوا عم جلال و وصلونا لبيت كدا في وسط القريه ،، دخلوه جوه راكوبه و نحنا ذاتنا دخلنا معاه ، بعد شويه جاتنا مره عجوز كدا و معاها وحده بتكون في التلتينات ، سلموا علينا و ساقونا معاهم لحوش النسوان ،، بعد ما ضيفونا المره العجوز عاينت لي مساااافه و قالت لي ما تخافي على أبوك ، منصور ولدي دا و ناس الحله ما حيقصروا منكم والله ، اتخلعت لمن قالت لي أبوك بس ما حبيت أوضح ليها ،، عاينت لميري مساااافه و سكتت ، حسيتها زي الكانت عايزه تسأل بس ما قدرت ،، نادت على سليمه ، دي المره الكانت معاها و قالت ليها فرشي ليهم عشان يرتاحوا و ينوموا ...
- قالوا ليك شنو يا طارق؟ ما زول شافها ؟ ماف زول عرف عنها حاجه ماف...
= قالوا شافوها قبل كم يوم في السوق دا
- متأكد !! معناها حتكون هنا أو في منطقه قريبه من السوق دا خلينا نمشي نفتش عليها
= روووق يا حيدر المنطقه دي كبيره و القرى فيها كتيره ، حتصل على باقي عناصر الشرطه و ح ارسلهم على القرى المجاوره .
🌻
- اشربن يا بنيات الشاي دا ما يبرد
قلت ليها طيب ، شلت كبايه و أديت ميري كبايه و قعدنا نشرب بهدوء و المره العجوز بتسأل فينا ، قالت لي انتوا كنتوا جايين من وين يا بنيه ؟ قلت ليها و انا بفكر سااااي ، كنا جايين من قريه قريبه من هنا ، قالت لي المعاك دي منو ؟ ما ظنيت إنها اختك ، قلت ليها دي بت جيران ، قالت ليها اهااا سمح جيتوا من قرية شنو يمكن بعرفها ، في سري قلت دي شنو المره الجنها اسئله كتيره دي ، هسي اقول ليهو شنو و انا اصلا ما بعرف اسامي القرى دي ، قلت ليها ما بعرفا مشيت ساي مع أبوي ، قالت لي سمح قول لي القريه الأنتوا ساكنين فيها ولا كمان ما بتعرفي اسمها ،، قلت ليها بتردد اسمها ، اسمها هناي ياخ ، فجأة جات سليمه و قالت لي أبوك بناديك ، ما صدقت لقيت زول خلصني من المره النقناقه دي ، طوالي مشيت ليهو و معاي ميري ، لقيت معاهو 3 راجل و بقى احسن من أمبارح بس راسو كان ملفوف بقطعة قماش ، صبحت عليهو و قلت ليهو بقيت كيف ؟ قال لي بخير الحمدلله ، لكن بعد دا لازم نمشي ، واحد من الرجال قال ليهو اقعدوا معانا لحدي ما تبقى كويس ، و نحنا بنوصلك لحدي باب بيتك ، قال ليهم مشكورين والله و كتر خيركم ، ما قصرتوا معانا ، لكن لازم نمشي والله ، عندي بناتي خليتهم في البيت براهم ، قالوا ليهو كان كدي خلاص ما مشكله لكن نحنا حنوصلكم ، ما قصروا معانا وصلونا لحدي بيت العم جلال ، قال ليهم اتفضلوا معاي و اصر عليهم شديد عشان يدخلوا لكن رفضوا و قالوا ليهو مستعحلين والله بنجيك المره الجايه ، بعد دا بقينا أهل و حبايب قال ليهم ما عندكم مشكله تشرفوا في أي وقت ، أول ما دخلنا بيت عم جلال لقينا راجل كبير في السن بس ظاهر عليهو الهيبه و الوقار و دقنو طويله و لونا أبيض و معاه راجلين ، عم جلال سلم عليهم و على صوت السلام دا سجده و توسل جوا طالعين و سلموا على أبوهم ، قال ليهم سوقوا ديل معاكم جوا ،، أول ما دخلت سجده قالت لي بغيييظ كدا اها ان شاء الله مشيتي الجنوب 😏 ما رديت عليها ، توسل قالت لي الحصل معاكم شنو ؟ عليك الله احكي لينا ، حكيت ليهم الحصل كلو ، سجده قالت لي بزعل ابوي اتعوق بسببك انتي ، ما عارفه ليه شال ليك هم و مشى يلحقك التقول بتو ، خلانا نحنا هنا برانا و مشى لحقك ، توسل قالت ليها بنهره سجده ، قالت ليها ما بسكت ليلتين كنا ح نبيتهم برانا لو ما جدي دا جا و قعد معانا لحدي ما أبوي جا ،، لو عايزا تجيبي لنفسك مصيبه أو عايزا تموتي عليك الله موتي بعيد مننا ،، و قامت طلعت ،، زعلت شديد من كلامها و قربت أبكي ،، توسل قالت لي ما تزعلي من كلامها ساجده متعلقه شديد بأبوي و ما بترضى فيهو ،، فجأه كدا انتبهت و قلت ليها بعد ما أخدت لي نفس و مسحت دموعي ، انتوا أمكم وين ؟ من جيت ما شفتها و هسي ما شايفاها ! توسل سكتت و ما اتكلمت بس دموعها جرت ، قالت لي أمي ماتت قبل 3 سنوات و استمرت في البكى ، قطعت لي قلبي والله ،، قلت ليها ربنا يرحمها و يجعل قبرها روضة من رياض الجنه ، ما كان اسألك السؤال دا و اخليك تبكي ، قالت لي و هي بتمسح في دموعها عادي ولا يهمك و قامت طلعت ، حنيت عليهن والله ، أمهن ماتت و خلتن و هن في العمر الصغير دا ، طبعا هن الإتنين اصغر مني ، توسل أكبر من سجده . بعد شويه جات سجده جاريه و هي بتبكي و بتنادي على توسل ، طلعت ليها برا و قلت ليها بخوفه في شنو مالك يا سجده ؟ جات توسل جاريه و قالت في شنو ؟ سجده قالت ليها و هي بتبكي أبوي أبوي ...ما انتظرناها تكمل كلامها و طوالي جرينا عليهو ، لقينا الرجال الكانوا معاه و المن ضمنهم جد سجده و توسل ، بسندوا في العم جلال و هو ما واعي ، توسل جرت عليهم و قالت ليهو جدي أبوي مالو ، قال ليها هسي كان كويس فجأه كدا تعب و ماشين بيهو المستشفى ، انتوا ما خليكم هنا و كلمي خالتكم فردوس خليها تجي تقعد معاكم ، سجده جات و حلفت إلا تمشي معاهم ، جدها قال ليهم بنهره خشوا جوه و ماف وحده فيكم حتعتب معانا الباب دا ،، بعد ما هم طلعوا سجده و توسل انفقعوا بالبكى ، انا ذاتي بقيت ببكي معاهم ،،، قلت ليهم بدل نقعد و نبكي دا احسن نصلي و ندعي ليهو ، اتوضينا و صلينا الضهر و قعدنا ندعي ليهو ،، انتبهت إنو ميري من قبيل ما معانا ، قمت خشيت الغرفه الكنا قاعدين فيها ، لقيتا راقده في السرير و بتقلب في ليها في صور ، قربت منها و قلت ليها ميري عيب ما تفتشي حاجات الناس ، شلتهم منها و قلت ليها طلعتيهم من وين ؟ أشرت لي على الدولاب ، دخلتهم جوه الدرج و لمن جيت على ميري انتبهت إنو في صوره وقعت منهم ، رفعتها و ما كان في نيتي أشوفها ، بس بالصدفه عيني وقعت على الناس الفي الصوره ،، وقفت قريب الدقيقتين و انا بحاول استوعب في البشوفو ،،، تلقائيا دموعي جرت و بقيت ما مصدقه عيوني ، يعنى العم جلال أبوي ؟ ولا بعرف أبوي ؟ الصوره دي الجابا هنا شنو ؟(الصوره دي فيها انا لمن كنت صغيره شديد و معاي أمي و أبوي ) قديمه شديد الصوره دي حتى صورة أبوي ما واضحه فيها شديد ، أمي عندها نسخه من الصوره دي و في كميه من الصور لي و لأبوي و أمي بس من زمااااان ،، شلت الصوره و مشيت بيها لسجده و توسل كنت ح اسألهم عنها بس اتراجعت لمن شفتهن ببكن و مهمومات ، قلت دا ما وقتو يا مها ، احسن انتظر لحدي ما العم جلال يبقى كويس و اسألو عن الصوره دي و عن أبوي ، ان شاء الله يطلع بعرفو و يقدر يوصلني ليهو 😭💔.
🌻"يارب لا تُطفئ حماسي للأشياء القادمة ولا تبعث من يطفئها ولو كان أقرب من قلبي لي. لا تجعلني أهتز مع كل ريح، يا الله اجعل أيام الضعف تولي ظهرها لي، آتني من قوتك، ابعث لي الحلم والأمل ولا تجعلني من المنطفئة قلوبهم 💛🦋."
يتبع.....
