مروا يومين و الأوضاع في الخرطوم لسه ما هديت و كل يوم ماشي للأسوأ ، قتل ، سرقه ، نهب مسلح ، خالي قال لينا خايف الإنفلتات الأمنيه دي تصل الولايات ، عشان كدا حفاظا عليكم و قبل ما الفاس تقع في الراس ح أوديكم البلد ، تقعدوا هناك مع اعمامي لحدي ما الله يفرجها ، في البدايه كنت رافضه رفض تام بس خالي كان مصر شديد ، حتى إنو اتصل و كلم أمي و قالت لي آيي كدا احسن ،، الصباح جاب لينا بوكسي و ركبنا كلنا ، اصلا قريتنا قريه من الأبيض ، ساعه أو تلت ساعه ، وصلنا البلد و هو رجع عشان يحرس بيتو في الأبيض ، مرتو حنستو و قالت ليهو ما ترجع اقعد معانا هنا لحدي ما ربنا يهونها ، قال ليها لا انا ح أرجع الأبيض ما بخلى البيت فاضي و فعلا رجع في نفس اليوم .
مر على قعادنا في البلد يومين ، في يوم جاتني بعد أهلنا في بيت عمة أمي ، قالت لي مها عليك الله أرح معاي نشوف غنمنا مشوا وين من أمبارح ما جوا راجعين ، قلت ليها طيب أرح ، مشينا مساااافه بعيده من الحله ، قلت ليها عائشه انا خلاص تعبت والله ما بقدر اكمل والله ، قالت لي خلاص تعالي نقعد تحت شجرة "الهجليج"دي ، قعدنا تحتها مسافه و نزلنا منها لألوب ، اكلناه و كملنا طريقنا ،، قلت ليها عائشه غنمكم ديل بمشن وين عليك الله ، ياخ انا فترت والله ، قالت لي خلاص قربنا ، شايفه "المضخه "ديك ؟ قلت ليها آيي شايفاها و ان شاء الله الغنم ديلك حقاتكم ؟قالت لي آيي ياهن ذاتنا ارح ليهن ،، المضخه كانت مليانه ناس كتار و أي زول سايق غنمو و بقروا و جاي بيهم و في ناس جايبين معاهم الجمال بتاعتهم ، طبعا انا بخاف منها شديد ، وقفت بعيد منهن و قلت ل"عائشه" بستناك هناك ، سوقي غنمك و تعاليني ،، مشت شربت و شربت غنمها و جابتهم معاه ،، قالت ليها هسي تاااني نقطع المسافه دي كلها عشان نحصل الحله 😭 ما بقدر والله ، قالت لي اصبري هسي بجيك ، مشت و جابت معاها حمارين ، قالت لي بتعرفي تركبي في الحمار ؟قلت ليها حتى لو قدرت اركب فيه ما ح اقدر اتحكم فيه و احتمال يوقعني و ديل اصلا حمير منو ، انت بتسوقي حمير الناس ساي ؟ قالت لي المهم نوصل بيهم و هم حيرجعوا من محل ما جوا ، طيب خلينا نركب في حمار واحد ، قلت ليها لكن أوعك توقعينا ، قالت لي اركبي بس ، ساعدني في ركوب الحمار ، جرت جابت ليها فرع شجره كبير و ركبت قدامي و بقت تكش في الغنم و هي راكبه في الحمار ، سقناهم لحدي ما وصلنا بيهم الحله ، نزلنا و خلينا الحمار يرجع ، قالت لي ارح خشي معاي بيتنا ، قلت ليها نعسانه انا ماشه أنوم ، قالت لي و بيتنا مالو ما فوقو عنقريب 😏قلت ليها ما كدا ...ولا اقول ليك ارح ارح ياخ ، مشيت معاها بيتم قلت ليها أمك و اخوانك وين ؟ قالت لي أمي في الفريق الوراني بترجع بعدين و أخوانك ما بجوا إلا بعد المغرب و فتحيه و عرفه في بيت العرس ، المهم دخلنا < التكل < الدردر < القطيه > و نمنا هناك لحدي العصر ، بعد صحينا صلينا العصر و قلت ليها بعد دا انا ماشه جدي و مرة خالي بكون بفتشوا علي ، قالت لي ما حيفتشوا عليك لأنك ما في فجه غريبه ديل كلهم أهلك ، قلت ليها انا ماشه عشان اشوف خالي اتصل ولا لا عايزا اسألو عن أمي ، قالت لي سمح اتغدي معاي و امشي ، جاتني راجعه و شايله معاها حاجه لونا غامض كدا و ختتها قدامي ، قلت ليها دا شنو ؟ قالت لي أكل !! عاينت ليها بإستغراب و قلت ليها معمول بشنو و اسمو شنو ؟ قالت لي الأكله دي اسمها "قوقر"بنعملها بالدخن و لمن تنجض بنكب ليها سكر و مرات بنعمل معاها لبن ضوقيها طعمها حلو ، في البدايه كنت متردده ، شلت منها حته بس لقيتا سمحه ، ضربت ضرب نضيف ياخ طعمها كان حلو شديد ، قلت ليها يلا بعد دا انا ماشه ، قالت لي ما تنسى بعدين تجي المسيد بعد صلاة المغرب ، قلت ليها طيب ما ح انسى ، رجعت البيت الفيهو جدي و مرة خالي رانيا ،، قالت لي كنتي وين من قبيل ، قلت ليها مشيت مع عائشه نجيب غنمهم ، قالت و ان شاء الله لقيتوهم و ما سرقوهم ! قلت ليها لا لقيناهم ، بعدها دخلت الراكوبه لقيت ريم نايمه ، أمها قالت لي ما بتفتر من النوم دا كلو كلو التقول فاطمنها بمريسه ، ضحكت و قلت ليها شكلو كدا....قلت ليها خالي عمر ما اتصل ؟ قالت اتصل قبيل و لقاك ماف ، قلت ليها اها ماف خبر عن ناس أمي ؟ قالت لي قال الأوضاع بدت تهدى هناك و الشرطه ولا الإسمهم شنو ديل بدوا يشيلوا في الجنوبيين و يرجعوهم الجنوب اظن حتى الفي الولايات حيرجعوهم ، قلت ليها لا ياخ ، قالت لي لييه العملوا هين ؟ قلت ليها لكن ما كلهم العملوا كدا....طوالي اتذكرت ناس كريستينا زعلت علشانهم والله 💔كانوا طيبين شديد والله.
بعد صلاة المغرب مشيت المسيد و المرة دي ريم مشت معاي ، مسيدنا عباره عن سور من الشوك على شكل دائره ، كل واحد فينا بجيب معاهو عود كبير عشان نولع بيهو النار ، بنقعد كلنا على شكل دائرة و في نصنا بكون قاعد الشيخ ، بسمع لينا كلنا بالدور بالدور ، بعد ما المسيد انتهى ريم قامت بسرعه و قالت لي انا نعسانه ماشه سريع قلت ليها خلينا ننتظر باقي البنات عشان نمشي كلنا سوا ، عايني المكان ضلام كيف ، طبعا قريتنا ضلاااام و شجرها كتير و البيوت كلهم من قش ، يعنى لو حشره ساي مش في القش دا انت بتسمع صوتا ، قالت لي ما بنتظرهم والله عايني عائشه لسه بتفتش لنعلينها ، ننتظرهم كلهم لمتين ؟ لو ماشه معاي ارح و اذا لا فعلى كيفك ،، قلت ليها ارح طيب ، قلت لناس عائشه حنتقدم ليكم...مشين برانا و الحله دي صانه ما فيها أي صوت ، بقينا ماشين سرعه سرعه ، و ضربات قلوبنا بدت تزيد و بقينا بنسمع صوت أنفاسنا ، قلت لريم بصوت واطي على شكل همس هسي في داعي ؟مش كان ننتظر ناس عائشه ؟ سكتت و ما ردت علي من شدة الخوف بعد شويه ريم بدت تمشي بسرعه ، شويه شويه لحدي ما جرت و خلتني ، و انا لا عرفت أجري وراها لا عرفت أرجع المسيد ، في النهايه جريت وراها و الإتنين بقينا جرايين ، لحدي ما فجأة طلع لينا شي أسود ، صرخنا بأعلى حس عندنا ، لحدي ما ناس الحله ديل كلهم جوا جاريين و ناس المسيد أي زول جا جاري بعود فيهو نار ، شيخ عوض قال لينا بسم الله في شنو يا بنات ، أشرنا ليهم على الحاجه السوده ، لمن قربوا الإضاءه طلع دا حصان ، شيخ عوض ضحك و قال لينا عشان تاني تمشن براكن ، المهم أي زول رجع بيتو و نحنا قدمونا لحدي البيت ، دخلنا صلينا العشا و حكينا لجدي و مرة خالي الحصل ضحكوا و قالوا لي عشان تاني تسمعي كلام ريم .
في اليوم البعديه طوالي جاتني عائشه ، قالت لي أديني عبايه منك برجعها ليك بعدين ، قلت ليها ماشه وين انتي ؟ قالت لي ماشه مع أختي سوق "الدبكر"قالت اسرعي بعد شويه البوكسي حيصل ، قلت ليها انا ذاتي عايزا أمشي معاكم قالت لي طيب اجهزي سرعه ، أديتا العبايه و مشت بيتهم ، كلمت مرة خالي و قالت لي امشي ، قلت لريم انتي ما ماشه ؟ قالت لي و أخلي النوم لمنو ؟ ضحكت و قلت ليها صحي والله تخليه لمنو ، المهم جهزت نفسي و شلت معاي قروش و مشيت لناس عائشه لقيتم جاهزين ، مشينا قعدنا تحت شجرة نيم كبيييره و انتظرنا البوكسي لحدي ما وصل و ركبنا معاه ، طبعا السوق كان زحمه مباااالغه دي أول مره أجي فيها للسوق دا ، دخلنا مكان بتاع تياب عشان فتحيه أخت عائشه قالت عايزا تياب لأمها ، حومنا حوامه في السوق دا ، في النهايه انا فترت قلت ليهم ما بقدر احوم تاني ، فتحيه قالت لي خلاص انتظرينا تحت الشجره ديك جنب عمو الطيب بتاع البطيخ ، قلت ليها لكن انا ما بعرفو ، ساقتني ليهو سلمت عليهو و قالت ليهو عمو الطيب ممكن تخلي بت أهلنا دي معاك لحدي ما نجي راجعين ؟ قال ليها طوالي ما عندي مانع يا بتي
مشت هي و أختها و خلوني معاها في البدايه كنت خايفه و متوتره مع إنو الناس حولينا كتار ، الراجل بدا يتكلم معاي و يسألني جيتي من وين و لشنو و...الخ كنت بختصرو في الردود لكن لما لقيتو راجل طيبان و على نياتو بقيت اتجاوب معاه و اتونست معاهو مساااافه ،، اثناء ما انا بتونس معاه كدا ، لمحت لي زول من بعيد ، اتفاجأت لمن شفتها ، وقفت على حيلي و بقيت أنده عليها و انا ماشه على اتجاهها
آسفه على التأخير ، و لكم العتبى حتى ترضوا 😴
يتبع......
