ECSTACY | BL | MIZO

CHAPTER - 3

A/n : Hemi chapter hi chu Rohmuaka backstory lam deuh a hawi bik dawn avangin a lo boring deuh anih pawn min chhiar sak hram hram dawn nia
Khawngaihin min lo vote sak ve ngei dawn nia

°•°•°•°•°•°•°•°•°•°•°•°•°•°•°•°•°•°•°•°•°•°•°

A țhut rem zawh hnu chuan Rohmuaka chu a han melh deuh vang vang leh rih a.
A chala sam awm deuh nuaih chu dim dawih tak hian a han hui kian sak a.

Zawlbuk chhung chu a han en kual vel a,
Tlangval dang ho chu an la tui hlawm hle a ni ta ve ang, tuvak mah chu Zawlbuk chhungah chuan an lo awm mang lo a,
Kilkhat a tlangval pakhat chalthla tawh, ring deuh taka hnar ri hrawk hrawk tih lo chu midang an awm lo a ni mai.
Zan danga khat țun țhin chu a thawl hian a thawl kawk mai a.

Chala chu a han thaw deuh kawk a,
Rohmuaka mu tui lai chu en lehin amah hnaih tak chuan a zu kun hnai a, a chal chu zawitê hian a zuk fawp deuh vang vanga mahse a lai leh ta lutuk chu,
Țhu leh nghalin hnung lam a hawisan ta daih a.

A nui  khi deuh țha zui leh ta nghal.
Tu emawin rawn hmu se zawng an rap ru phianin a rinawm,
Mahse tumah an awmlo hlauh a....vannei ve kir ker tak chu a ni mawle.

Reilo tê a han țhut leh deuh vang vang hnu chuan Rohmuaka bul chêt ah chuan a rawn mu ve ta hlawl a,
Rohmuaka lam chu hawiin, ani lah chu muttui tih hriat tak hian a thaw siai siai a,
Chala hmuhnawm tih a tling leh em em mai,
A thlir ta reng a,a ngaihtuahna pawh chu a kawm ta melh melh bawk a.

'Engtin nge kan awm zel tâk ang le? A hma ang ngawt a ralkhat a lo thlir reng chu ka thei rei dawn lo a ni tih ka inhre chiang si. Engpawh ni se amah hi hnaih ve tawh ka duh a ni.'
Rohmuaka biang chu a han chul a,a kut ala sawn leh a,
'Min pawm thei a ngem chu tih ka hre hauh lo na chungin a kianga ka awm theih chhung chu ka hlim a ni mai'
Tia inngaihtuah neuh neuh chung chuan a lo muhil ve ta der mai.

Khawfingchat (zing kar,la thim si lai) ah chuan Rohmuaka zun chhuak chu a rawn harh hlawl mai a,
A han tho a,a lu chu a hai ruai mai, kal pei nawk nawk chung chuan zun ram thiar tur leh thli fim dawng tur chuan Zawlbuk pawn lam panin a kal a,
Tlangval dang te pawh kha chhuatah chuan an rui chatthla kha an lo let pheng phung hlawm mai.

A zung zo rawn lut leh chu a mutna lai a han thlen chuan a meng deuh kawk a,
A mutna hnaih taka mu chu a melh deuh ta vang vang a
Ni e, lalfala Chalthanga ngei a ni.

Thil mak chu a ni hran lem lo a,
Zan dangah te pawh indelh leh inkhan deuh ti tihin pasalțha dang te nen pawh an mu ho ziah a,
Mahse tun țum kher hi chu enge mawni a hriat ni, chutia a mutna bula an lalfapa ber a han mu deuh hlûn mai a han hmuh chuan,
Sawi fiah theih siloh hian engtin emaw ni hian awmin,
A biangte chu a rawn sa pup pup mai hian a hria a,
A thin phu rawn rang nghal sawt pawh chu a hai lo.

Mahse ngaihtuah thui duh loin a mutna ngai, lalfapa bulah chuan a mu leh ta zawk a, ni chhuah hun law law a haw chu a tum a ni.

Ar khuang ri al al ah chuan zi țial țial chungin a rawn tho chhuak leh der mai.
Lalfapa mutna zawn kha a han melh a,mahse a lo awm tawh der lo mai.
Hâm bui bui chung chuan in lam panin a chhuak ta a. Mahse a ruka zuitu a nei a ni tih chu a hre hauh lo thung si.

*Hmuaka P.O.V*

In ka han thlen chu a reh ngai hian a reh tlawk tlawk mai a, mahse thil pangai lo ani hran lo e.
Ei rawng te chu hmanhmawh em em hran lo chuan ka bawl chawp sak sak a.

A chang hi chuan ka nu leh pa te hi ka ngai ve thei țhin hle.
Kum 15 ka nih ațang hian mahni in ka inchawm chho țan tawh ti mai teh ang.
Ka pa hi kum naupang te chauh ka nih laiin an ramchhuah ho naah ral nen intawng palhin a vanduai zingah a tel palh hlauh mai a, ral kutah chuan thi in kan chan ta a ni.

Rei cheng ho lo mah ila,
Ka tana pa țha tak a nih chu ka hai bik lo.

Tichuan ka nu in min țulpui tawp ta mai a ni.
Ka nu kha nula hmelțha tak mai a ni a,
Rawn rimtu leh duh der a chhai țhin te pawh an awl lo a.
Nupui atan a duh tu te pawh a hmu thei hle a nih kha,
Mahse amah ngawr ngawr chu an duh si a vang leh kei min duh lohna chu sawi chuang lova an tih lan reng avang chuan ka nu chu a hel a ni chawk ang chu,
A tu a mah chu a pawm duh der lo mai a.

Ni e, ka nu khan min hmangaih em em a, ka pa in min boralsan tak hnu ațang ka tan nu leh pa nih a fawm a,
A theih tawpin min enkawl țhin.
Ka tan a hlu em em a,ka engkim a ni.

Kum 10 ka han tlin chuan vanduaithlak takin natna in a thlakbuak hlauh mai a.
Ka theih ang angin bawihsawm țhin mah ila rei pawh dam loin a natna chu a thih pui mai si.

Ka in nghahna ber ka nu in min boralsan ta mai chu ka tuar hle mai a,
Ka awm tawp ani ber mai.
Riang ngawih ngawih a inhriatna chuan kum naupang te ah min chenchilh chu a ni ta phawt ah.

Mahse ka tana malsawmna ka tih loh theih loh, ka țhianțha neih chhun Chawngpuii te chhungkua chuan min chhawmdawl a,
Min lainat vang leh ka pa damlai ațang tawh a inhnaih ve tak kan nih avang chuan a ni awm e....ka nu dam loh lai pawhah min puitu ber te an ni bawk.

An ina cheng tur chuan min sawm ta rawih a.
Keipawh chuan rem tiin ka thawmhnaw neih tlemte nen chuan an inchhungah chuan ka cheng ve ta a ni.

Min duhsak em em a,ka tan chhungkaw thar an ni ka ti mai teh ang.
Chawngpuii nen pawh chuan unau ang mai in ka inpawh leh zual bawk a, harsatna te pawh kan inhrilh hmasa ber țhin reng a ni.

A țhen chuan Chawngpuii nen hian puitling hunah in nei tur ang te pawn min ngai mai thei e,
Ka dem hram lo...khua mite nawlpui ngaihdan pawh a ni reng a ni.

Mahse zep thu a cheng lo,
Chawngpuii hi chu midang lam tak mai hi a ni reuh a,
Mipa han melh deuh leh lungdum hi a nei thei meuh lo tlat pek.
Chalthanga farnu Chaltluangi hi han duh ta tawl mai chuan.
Ni e, Kan khaw lalfanu ngei hi a lungdumtu ngei chu a ni.

Kei mi han hrilh tirh phei chuan ka tuibur zuk lai pawh chu ka thlauh hman țhelh ani.
Mahse ka demin ka huat phah lo.
Chutiang a hnekin ka hrethiam em em a ni.

Mi tupawh hian eng ang mi pawh a hmangaih thei a ni tih leh hmangaih na chuan huam chin a neilo tih hi ka ngaihdan a ni ve tlat si a ni.

Chaltluangi pawh hian a haw hran bik hian ka ring lo.

Ti chuan Chawngpuii te inah chuan cheng chho zelin ka puih theihna apiangah chuan ka pui a,
Chawngpuii pa, Pu Nghaka pawh a ramvah naah zuiin ka pui țhin bawk.
Sa kah ka thiamna a ni ve pakhat bawk a.
Keimah pawh a ramvah chang ka ngah hle nghe nghe.

Kum 14 ka nih chhohah chuan ka inhlui....ka nu leh pa te nen a ka lo chen tawh na chu thawm țha chho delh delhin a hnu lawk kum 1 hnuah chuan ka luah lut leh ta a ni.

Pu Nghaka te hi an fel khawp a.
An lo pawh kan ințawm nghe nghe a ni.

°•°•°•°•°•°•°•°•°•°•°•°•°•°•°•°•°•°•°•°•°•°•°•°•°

A/n : kan thawnthu ngaihnawm lem lo tak min chhiar sak avangin kan lawm hle a ni
Tih sual leh type sual te pawh a awm thei a
Min lo hrethiam mai dawn nia