ECSTACY | BL | MIZO

CHAPTER -13

Zing khua a han var alh alh tawh ah chuan Hmuaka lum ti chu a tal aih aih a, mahse a duh angin a tal țha thei ta hauh lo. Ani zing harh chiang ta bik lo chuan an phuar ta emaw tiin meng mang hlei lo chuan a thu chhuak thut. A piah lawk a țang chuan ban tha chak tak mai hian alo pawt mu leh nghal vat a.

Hmuaka pawh chu meng kawkin a harh chiang ta ngei mai. A mutna bul chu hawiin a han en vat a, Chala chuan mit meng fiah tak chuan a lo melh leh ran tawh.
Rohmuaka pawh chu a phu țhelh a ni.

Engmah sawi set set ta bik lo chuan an inmelh leh reng ta mai.
Hmuaka pawh chuan Chala zing tho hmel, mit la bui deuh chhap chu duhawm a ti ngei mai. A kut chu chawi a Chala hmai chul sak chu a va han chak si em.
Mahse a rem lo tih hria in a insum ve țawk țawk a ni ber.

Chala pawh chuan Hmuaka hmel, tun ang mai a zing tin thlir theih hun suangtuah neuh neuh chung chuan Hmuaka chu hmuhnawm ti takin a thlir ve reng bawk a.
Mahse rei pawh a nih hma chuan an bul lawkah chuan tlangval pakhat tho tur han zi deuh al al ri chuan an inmelh lai chu ti tawpin Chala pawh a tho zui nghal daih.

Hmuaka pawh chuan a thaw han sak deuh alh tireh nan a thaw deuh halh chung chuan a tho zui ve ta a.

Ti chuan tlangval dangte pawh chu han zi deuh chhap chhap chunga rawn tho chhuak ve hlawm in rei lo te hnuah chuan mahni inlam an pan ve ta hna hna hlawm a.

Kapkima pawh chuan Hmuaka chu a zui chhuak ve ta ngei bawk a. A mikhual kha ani miau a.
Chutia an inzuiin, Zawkbuk kawt an chhuak vel lai tak chu Chala chuan a lo hmu fuh ta hlauh mai.

Chala chu ava han meng thip leh tawh tak em. Thluak țha ta ngang chuan nizan lam leh tuna : a hma lawka thil thleng vel chu a hrethiam chak leh hle mai.
Khatia Kapkima'n zan hmasa lawk a 'Rim hual ka nei' tia a sawi zawh a Hmuaka inlam pengah a kal daih dan te leh Zawlbuk chhunga insi rial chung a Kapkima te mu a hmuh vel chu hre chhuak nghal zatin, Kapkima chuan tum a nei ngeiin angai ta tlat mai.

Thinrim tak mai a inhum ruh țeuh chung chuan a inlam ah a haw ve ta nge nge, pên deuh hlawk hlawkin a hmel chu a dur deuh khup mai. A haw kawngah pawh chuan lo be sawm ngam an awm meuh lo. In pawh chuan a thleng rang narawh.

In a han thlen chuan an lal, apa chuan Chala hmel a han en chuan lungawi zân lohna a nei tih man thiam nghal vatin aw dam tak mai hian,
"E ka fapa kha, zing zingah tinge I hmel hmai ah lungawi lohna a awm mai le? Thil thleng a awm em ni?"
A han ti deuh chhat chhat a. Chala pawh chuan apa chu melhin,
"Â, eng ani lo e ka pa, ka rawn haw lamah ka mit ti kham thil enge maw ni ka rawn hmu fuh deuh ani e".
Tia a fapa in a chhan takah chuan lalpa pawh chuan a fapa chu eng zawt zui tawh ta lem lo chuan chaw ei a rawt ta.

Chala nu leh a nau Tluangi pawh chuan zing tukțhuan tur chu buatsaih nghal vat vat in, an zawh hnuah chuan ei zai an rel ve ta a.
Duh tawk a an inei puar hnu chuan Chala pawh chu ram lam a kal turin a inbuatsaih nghal vat bawk a, chutia kal chhuah mai a han tum lai chuan pi Dini chu zahpawh dawn zo lovin a rawn țap lut ta mai a , anni chuan  lo chhawn nghal vatin thil awmzia te an han in hrilh hnu chuan , rang takin Lalpa chuan tlangau chu a kauh tir nghal vat a , a ni pawh chu rawn thleng ve nghal vatin thil awmzia te an han hrilh zawh chuan a tih tur chu hre Chiang tak mai hian a chhuak leh nghal vata. Lalin kawt kaiah chuan chuang chhuak in aw fiah leh ring tak mai chuan,
"Khai!khai! Lo ngaithla teh u , tlangval zawng zawng tu mah ram chhuak loh tur a ni e , arang lama Lalmualpan tur a ni".
Tih chuan a au ta lauh lauh a.

Hmuaka te pahnih pawh chu in an han thlen chuan an tuk țhuan tur te chu an han ei sak sak hnu chuan ram lam a kal tura an in puahchah mek lai chuan an tlangau thil rawn au chuan Lalin lam a pan rang tir kher mai.

An va thleng meuh chuan mi pawh an lo țhahnem ang reng hle tawh , Lalmualah chuan nu Dini hi a lo tap hawm hawm a ,an Lalnu chuan khawngaih hmel tak hian a lo kuah a , a ni hi an Val upa Pu Vawra nupui niin ,heti tak mai a tap chu Hmuaka chuan a lo khawngaih let ling ru deuh hle a ni.

A chhan ni awm ang ngaihtuah a rilru a kawm mek lai chuan a bana rawn vuan tu an awm thut chuan a ngaihtuahna a țang chuan a pawt chhuak chiang kher mai , a bul a han en chuan Kapkima chuan uluk tak hian alo melh reng lo niin , a mitah  Hmuaka'n a han en chuan a zawh duh chu a hre thei tih hriat tak hian,
"Nizan lama kan tawh kan val upa Pu Vawra nupui Pi Dini a nih saw".
An ti zawm zata.Kapkima pawh chu a lo bu deuh nghat a.

Chutah Hmuaka chuan Lalin lam an hawi mai chu leh , a thil hmuh chu khua lum nen ,a hmul thi a ti ding sung sung mai , Lalin sumhmunah chuan Lalpa leh Chala hi an lo ding reng mai mahse chu chu chutiang taka Hnuaka awm ti nuam lo tu chu a ni hauh lo , Chala mit thip takin a lo melh reng leh a thinrim a ni tih hriat em em mai a lo melh kalh chuan a ti hlau deuh a ni ngei ang.

Lalpan thil thleng dan an sawi dap dap a, a zawh meuh chuan Zopui tlangval ho mit meng chu a thip hian a thip hlur mai a an thisen chu a sa up up hlawm mai.

°•°•°•°•°•°•°•°•°•°•°•°•°•°•°•°•°•°•°•°•°•°•°