ECSTACY | BL | MIZO

CHAPTER - 12

Hmuaka chuan a thingpui lum te chu a han thlit zawh hnu chuan Kapkima in tur chu a han pe ve nghal vat bawk a . Kapkima pawh chuan nelawm taka nui suk chung chuan a lo la ve vat a.

Hmuaka pawh chu a han thut rem hnu chuan a thingpui sa nghah daih pahin Kapkima lam chu a han hawi deuh a,
"Han ti leh ta daih ila, Kapa, zanin lamte nula rim I tum lo em ni? ".
Tiin a thingpui ken han chhem heuh heuh pah chuan a han zawt a.

Kapkima pawh chuan thingpui han inzeuh paha Hmuaka melh chung chuan,
"Ni e hei, Mikhual ka ni ta vang vangin han rim mai tur ka haihchham deuh a ni ngei ang. Â , hei I thingpui lum chu a tui hle tak mai a".
Nel awm tak chuan a han tih zui zawm nghal vat a.
Hmuaka pawh chuan tlawmngai taka lo hnial in eng eng emaw sawiin an ti ti ta melh melh a.

An lo ti ti tui phian ani ngei ang, an hriat loh hlanin leng hawn ar pawh a lo khuang leh al al tawh a.
Hmuaka chuan han din chhuah pahin,
"Ka rin aiin a tlai ve ta hle mai, ti rawh Kapa Zawlbuk lam kai zai I rel ve dawn teh ang".
A han ti deuh dap dap a. Kapkima pawh chu a thut hmun atang chuan bik deuh zawk paha tho ve nghalin Zawlbuk lam pan chuan an inzui chhuak ve ta hna hna mai a.

Kalkawngah chuan inbe zui zelin Zawlbuk an hnaih ve viau tawh tihah chuan an val upa Vawra chu an mahni tawk zawng chuan a lo kal ve chhat chhat bawk a.
Hmuaka chuan lo hmu in a lo be vat a,
"Pu Vawra chu kha, Zawlbuk lamah I riak dawn lo em ni?.
Alo ti var a. Val upa Vawra pawh chuan an bul a lo thlen takah chuan han ding ve deuh halh in,
"Ni e, â... zanin chu Zawlbuk lam ka lawi lut lo phawt mai ang chu ka ti a".
Tiin a lo chhawn ve vat a.

Chutia an inbiak lai chuan Val upa Vawra chuan Hmuaka bula ding chu a han melh zawk a, mahse Kapkima chuan hmun dang a melh vangin tu nge a nih a hre thei mai lo. Hmuaka chu melh leh in,
"Hei I thianpa hi tunge le? Ka hre thei mai lo tlat".
Tiin a zawt ta reng bawk a.
Hmuaka pawh chuan țha takin Kapkima chu mikhual tlangval anih thu in a lo chhang vat a.

Chutia Hmuaka'n a chhang zo Vawra'n Kapkima lam a han hawi chu Kapkima chuan a mitah tak a lo melh ve nghal zat bawk a.
Chutah zet zawng Val upa Vawra chuan Kapkima chu a hmel a hmu chiang ve ta. Tunge a nih tih pawh a hai mawlh lo.
Mahse țawng tuma a ka a han ang zuai chu mit meiin Kapkima chuan a lo khap nghal vat mai.

Val upa pawh chuan a sawi tum chu sawi leh ta chuang lo chuan Hmuaka lam chu a hawi leh ta zawk a,
"Anih chuan Hmuaka, nangni pawn Zawlbuk va chuang thuai teh u. Keipawn haw zai kan rel ve nge".
Tiin a in lam pan chuan a kal zui ve nghal zat bawk a. Hmuaka pawh chuan an Val upa Vawra mize rawn inthlak deuh hlek kha a hmuh hmaih bik hauh lo. Mak pawh a ti ru viau mai, manse sawi chhuak kher erawh trul a ti lo nge ni...a ngawih pui ta zawk a.

Hmuaka pawh chuan kal zai rel leh in Kapkima pawn eng sawi set set lo in a zui ve nghal vat a.
Kapkima lam chu hawiin nui var chung chuan,
"Khualval te I ni si a , zanin zawng inbuan hmuhnawm kan thlir dawn a va nih hmel ve le".
Tiin fiamthu awka tak hian Hmuaka chuan a han ti a. Kapkima pawh chuan nui ve hak hakin,
"In khaw buanchaka chuan zah a ngaih hram beisei phawt te ang".
A lo ti ve vat a.

Ti ti pah leh nghal chung chuan Zawlbuk pawh an thleng ve ta reng mai , bawhbel te chu bawh liamin Zawlbuk in a chhungah chuan an lut zui nghal a, an mutna hmun tur a an beisei ah chuan thut hmun an rem zui zat bawk.

Mahse chutia an thut reng hnuah chuan Hmuaka chu mak tihna chuan a bual reng a. Hei hi a chhan ni ta ber a lang chu tlangval tam zawk an rawn luh tawh hnu pawh chuan an khaw mibuan chak Bela chuan Kapkima chu  buan pui a tan ala sawm lo tlat. Chu mai a nilo, Val upa awm ve te pawh chuan inbuan chungchang reng reng sawi zai an rel ta hauh lo mai.

Hmuaka chuan mak han ti teh mahse engmah sawi ta lo chuan Kapkima thusawi chu a ngaithla ta mai mai zawk a.
Rei vak lo ah chuan tlangval dang te pawh an mut ve rem rum hnuah chuan mu tur chuan an inpuah chah ve nghal bawk a.

Chala pawh chutia a nula rim zo , Zawlbuk bawhbel rawn bawh liam ve chiah chuan Hmuaka nen an mut thina lam chu a pan ding nghal vat a,
Chutia an mut hmun a va thleng chu, Hmuaka bul hnaih chêt a midang lo mu ve kur mai a hmuh chu a tunge a nih tih hai lo nasa kher mai.

A kut chu in hum ruh sauh sauh chungin Hmuaka mut na piah deuh, awl laiah chuan a mu ve ta vang a. A mut hmun te a han rem zawh chuan Hmuaka chu a banah vuanin a lam ah chuan a han a pawt phei deuh dawr  a.

Hmuaka lah lo mittui ve tawh nen harh chu khawi lam, chutia Chala'n a lama a pawh phei na ah chuan mu rem sauh sauhin Chala chu a ngheng ta riai mai.

Chala pawh chuan Hmuaka chu en vung vungin a nui deuh suk mai.
Hetiang a Hmuaka a chelh loh na hi rei a tiin a ngai tak zet tawh a.
Nghet taka lo kuah ve nghalin rilru hlim tak chung chuan a muhil ve ta a.

Mahse Chala Chet dan chu lo hre tu leh lo hmu tu an awm tlat mai , Hmuaka hnaihchet a mu chuan a mit fiah tha tak chuan a hmuh hmaih reng reng lo. Tin, Chala te lo thlir tu thluak hi a țha ngang bawk a, an inkar a thil thleng chu a man thiam nghal vek nghe nghe a ni , rilru a thil ngaihtuah ni awm tak chuan a nui sak a , Chala te lam chu vawi khat melh leh zet pah chuan mut zai a rel ve ta a.

°•°•°•°•°•°•°•°•°•°•°•°•°•°•°•°•°•°•°•°•°•°•°•°•°•°