ECSTACY | BL | MIZO

CHAPTER - 14

Zopui tlangval ho mit meng chu a thip ngei mai, ha chang țhial ri rat rat pawh hriat tur a awm hial.

An khaw nula hmeltha leh chhuanvawr , Lalnu ngei pawn a fapa tana a duh em avanga rim tura a nawr luih hial nachhan : Darziki chu a amaha a thing phur chu a lo la haw thei reng reng lo chu niin,
A chhungte chuan haw har an tih tawh avang leh an ngaih a țhat theih tâk hlawl loh ah chuan tlaiah a pa Val upa Vawra'n a fanu chinchang ngaihchhân tum chuan a Fanu in a thing ehna hmun tura a sawi ah chuan a va en a.

A hlauh thawn ruk ang ngeiin a fanu chu a lo awm ta reng reng lo mai.
Mangang taka zawngkual nghalin a hmunah chuan a hmunhma vel te chu a hmu nghal vat.
A han en chian nak chuan le, ani ramchhuak țhang nafam chuan a hnu hmuh chu a hei lo nasa mai si.

Ni e, a hnu hmuhah chuan mi enge maw zat in buan leh intih buai chiam na hnu chu a hmu chiang ngei mai.
Rindan a nei thiam nghal, a hnu hmuh chu a han enchiang leh zual a, a Fanu chu a duh lo chung an hnuk lui tih hriat tak mai hian a lo pel sung mai hi a lo ni , zan hmasa lama valupa Vawra , engtik lai maha Zawlbuk riah țhulh ngai reng reng lovin , riah a tih lo chhan te , a hmela buaina lo langte chu a chiang ta kuar mai.

A rang lamin pasalțha te ho leh upa ho te chuan ral rel an țan vat a , Zopui Lal te leh an rolrel tu te hi thiam hle in fing hle mahsela vawin hi chuan tih fuh loh an nei ve ta tlat , an rolrel dan chu Kapkima chuan beng chi kar hian a lo ngaithla kar a , an ral rel ah chuan pasalțha ral thiam pahnih in tlangval panga vel hruaiin hnu an chhui phawt a nga , chin an hriat veleh mi pathum emaw pahnih velin khua a chinchang thleng tur in an let leh ang tih chu a ni. Tin, hetia an nula chhuanvawr lo ru ngam tu ral te hi chhuah an tum lo hlawm hle a, zirtirna pek hlak tumin heng ral ho khua hi run an duh tlang hle bawk.

Pasalțha Liana leh Chawia te chu kal turin thu tlukna an siam ta nghal bawk a , an ni pahnih hi zawng țhen hran theih pawh hi an ni lo ti ila kan sawi sual awm lo e.
Tet tê ațanga lo inkawm tawh chu awka tel lo mit mei ringawt pawn an in hrethiam hle bawk nen , an rintlak in an tlawm a ngai mai si, tin sawi tham khawp a ral rel  an thiamna avang chuan an upa ho pawh chuan an ring tawk viau reng bawk .

An ni chu chhuak vat in tlangval panga chu an thlang a , an rolrel dante an hrilh hnu chuan , a tuk a chhuak tur chuan thu an ti tlu ta hlawm bawk a, ti chuan lo inpuah chah lawk tur in mahni runah a kai leh ta phawt a ni.

Zanah chuan nula te rim haw tlangvalte chuan Zawlbuk lam chu an pan khawm ta hna hna a , an hmelah chuan hlimna reng a lang mawlh lo, mawlhtu an nei tih hriat takin an hmel chu a dur khup hlawm mai.

Chala pawh chuan rei vak lo ah Zawlbuk bawhbel pawh chu a rawn bawh lut ve thuai a, Hmuaka lam chu a pan ding nghal vat, mahse a va thlen chuan mi zawn a nei tih hriat tak hian a hawi ruai a, Hmuaka chu melh chhuk zeuhin,
" Kapkima hi ".
a han ti ngawta Hmuaka chuan chho en vah chung chuan,
"Zanin chu sa ka chang dawn e a ti a nih kha".
A lo tih zawm zak bawk, an awmna hmun chu thim lo se zawng Chala hmel a lawm rukna lo lang chu Hmuaka chuan a hmu ngei ang.

A tukah chuan , hnu chhui tur te pawh chu an chhuak țan ta a, mipui ho chuan kawtchhuah thleng chu an zui hlawm bawk, an hmahruai tute an hnuthiam in an fing bawk nen an kal chak ang reng hle a , ni hnih vel lek an khawthang hnu chuan Mualchhuan khaw kawng ah an tawp ta tlat. Chutah an pasalțhate chuan ro an han rel vat vat a,
"Kei leh Zika hi khua ah khual angin kan lut anga , a bak Chawia hovin khawdai biru laiah riahbuk sualin in lo awm ang ,chinchang Zika'n a rawn hrilh leh vat ang che u chuta hmalak zel dan tur chu Chawia kutah awm mai rawh se".
A han ti chat chat a ,midang ho pawh chuan a ral rel chu pawm tih hriat takin an lu an lo bu nghal tham tham a.
An khua leh Mualchhuan hi a in hlat lo a , hnuchui lo a hmanhmawh a kal chuan ni 1 kal vel lek a ni .

Han in nghat hahdam leh te te in Zika te țhian dun pawh chu khaw chhung lut tur chuan an inpeih ta der mai.
An luh hma lawk chuan pasalțha Chawia chuan,
"Inva fimkhur hle dawn nia, fimkhur luat hi a awm lo ania. Tin, kan thil chhui lai hnarkai tu ber an lo nih phei chuan an lo inral ring ru ve thei reng bawk a, chuvang chuan nangni pawh palh thut awm theiah inring ru reng ang che u. Duh ai thil a thleng sual dawn ni a inhriat chuan in thalhrui thlah ulangin keini in chu chu kan hriat veleh khaw lamah midang punna hun ah ngaiin kan lo intir haw ve nghal mai ang , a vaw tuin ek kan chheh palh hlauh da a nge".
Tia chah chungchuan an pasalțha te khaw inpai lut chu an en liam ta hlawm a.

Liana leh Zika te chuan khua chu an luh chuan lal-in an pan ding nghal vat a , lal in luh phalna te an dil hnu chuan Lal-in ah chuan an lut thuai a. Lalpa hmel chu a lo hlim kher mai , an mahni vang chu a ni hauh lo tih erawh an chiang ngang mai , Liana chuan an hming leh an khua sawi an tum chuan , Mualchhuan lalpa chuan eng a mah hma hma in,
"Khualna in tur te va zawng rawh u".
A lo tih tak si ah chuan an ni mi à zek zawk lo chu an chhuak nghal a , pawn an thleng chuan an in melh a an khi var dun mai , an chhuah hnua lalpa hmel in thlak dang lam kha han hmu ngat se zawng an nuih hi a rinawm hauh lo.

Khaw dai lam a hmeithai in ah chuan mikual a thlen theih leh theih lo an han zawt a,
"E..lo thleng rawh u lo thleng rawh u , hmehtha erawh kan nei hauh lo a nia ".
Tiin pi Chawngi chuan a lo chhawn let vat a , an han lut a , inhmelhriatna te an han neih chuan chaw ei chu a lo hun tep tawh hi a lo ni .

An kal lama an sakhi tuai kah khaw daia an dah te chu an la a , an han siam mawlh mawlh hnu chuan chaw chu an ei a , Liana chuan tui han in deuh khalh khalh chung chuan,
"Pi Chawng , hei keini thian dun hi chhungpuinu neih te kan lo hun takah chuan nula hmel fai deuh zawng turin khualkhua kan han bel ve rawi mai chu a ni a , in khuaah hian kan nula chutiang deuh te an awm lo maw?."
Aw dam diai hian a han ti a , pi Chawngi chuan,
"E chuti an ni maw? Hei kan khua nula ho chu an felin an tha hlawm khawp a sin, tui chawi nikhua ah te hian an tlawm a ngai mai si a".
Nui bar var chung chuan a han ti ve vat a , a tupa awmpui Ralbela chuan,
"Hman ni deuh a kan pasal tha ten kan lal tan a an rawn hruai nula kha , a tha kawp a sin , kei zawng ka tawng hi huatah tuman la lo se , ka nula hmuh tawh a zawngah chuan mit a la tling ber awm e â".
A han tih chuan Liana te chuan chu nula chu an hei lo , Zika chu a han mitmei zeuh a. An mikhual chuanna in chu thlang fuh an in ti hle.

Chaw te an ei zawh chuan Zika chuan daikal chhuan lam in chak mang kheng hian Chawia te awmna lam chu a pan ding nghal vat a, rilru hman hmawh taka tlan ani bawk nen a thleng rang ngei mai.
Pasalțha Chawi te innghahna hmun a va thlen chaun thilawm dan te a han sawi ta nghal zung zung a , a ni thluak fing Chawia chuan ro a han rel vat reng bawk a,
"Hei kan tlangval thu chhuak atang hian kan nula zawn chu he khua ah ngei hian a awm ani tih kan chhian thei ta hlauh mai a, chuti a nih chuan pathum in khuaah chinchang in thlen ang a ,hetah hian naktuk chawhnu thlang herah rawn thleng in tum hman dawn nia , chuan kei leh Khuma chu tah kan lo awm chunzawm anga kan lo innghak khawm mai dawn nia. Khaw lama kan thiante rawn thlen veleh zan khaw thim chuhin luh chhuah kan tum dawn a ni"
a tih chuan an lo bu nghat hlawm a , tlangval pathum te pawh chu inthlang chhuak leh nghal zung zungin an khaw lam pan chuan an kal nghal vata.

Zika pawh khaw lamah let vatin an rorel dan te chu a ruk thei ang berin Liana chu a hrilh ve nghal ta zung zung. Liana pawh chuan pawm tih hriat taka lo bu ve nghatin Zika hnenah chuan a tuk chu Mualchhuan khua awm dan te zir chiang tura in ti in Zawlbuk lam chu an pan nghal a.

Zawlbuk dan na ran angin Mualchhuan khaw buanchak chuan an mikhual te chu buan ah a lo sawm ngei mai.
Zika chu phur taka ding chhuak ve leh nghalin an han in buan tak tak chu leh , Zika ; tlangval tha chak chuan Mualchhuan buanchaka chu an vawrh dawrh a , a ban ruh rirawpin a thliak a ni tih hai rual a ni lo.
"Eeee.... , ka tihpalh ani e ka tha ka lo hmang sual deuh a ni. Huatah kan la lo ang chu maw".
Zika chuan dam diai hian a han ti a , Mualchhuan khaw val upa ni awm ngei chuan,
"E huat ah chuan la teh suh e, Infiamna a ni a, palh a thleng ngai e".
Tiin a lo chhang vat, Zawlbuk chhunga tlangval awm te pawh chu an lo bu nghut a. Inbuan pawh chu chhunzawm leh ta bik lo chuan an inkawm ta mial mial hlawm a.

Chutia an han ti ti laih laih lai chuan an ni pahnih chuan beng an lo chhi kar a , an hriat duh te an hriat hnu chuan , nula rim tur chuan an chhuak ve ta a , an thu hriat danah chuan Darziki hruai lui tu te chu an pasalțha Zakhawma tih leh a hruihhruai te an ni tin an hre thei ta a , an tan thil a awlsam leh sawt mai.