كلنا بشر..بنغلط ونتعلم من غلطنا..بنقع ونقوم نكمل عاادي..إلا الشاطر..الشاطر غلطتو بي عشرة ووقعتو بي ألف..هو كان شاطر وانا كنتا وقعتو ال بي ألف..ولمن اقول شاطر م قصدي شاطر في قرايتو..هه اصلا بالعكس هو شاطر في اي شي الا قرايتو...
الليلة جاتني مكالمة من إيلاف صحبتي..الوحيدة المتواصلة معاها بعد الجامعة..ورتني انو ناس دفعتنا عاملين يوم الاتنين قعدة ف الجامعة..الاتنين؟!..يعني بعد بكرة..م عارفة الخلاني فجأة اقرر امشي شنو في حين اني من اتخرجتا م مشيت الجامعة..وعلما بأنو وضعي الصحي م بسمح لي اتحاوم..نسبة لأني حامل ف الشهر الاخير..قفلتا منها وانا مقررة اني امشي لاسباب كتييرة مجهولة..ختيت التلفون ف الكنبة جنبي وسرحتا في التلفزيون..ح تمشي الجامعة؟! لا السؤال المفروض اسألو لنفسي..هل ح اقدر امشي الجامعة؟!..بعدو؟!..اتنهدتا وانا بحاول اطلعو من تفكيري لأنو لو دخل ح يستقر فيهو لأيام طوووييييلة...وانا صراحة م في مصلحتي ابدا التفكير فيهو..حاليا..
مساءً...
عاينتا لساعة الحيطة لقيتا ماشة ع 10..اشرف "راجلي" اتأخر الليلة..
سمعتا صوت فتح الباب..عاينتا ليهو وهو بدخل وشايل كيس عيش في يدو وبقول:سلام عليكم
رديت:عليكم السلام..اتأخرتا الليلة
وقف قدام باب المطبخ وقال:بالعكس حالتي جيت بدري
وقفتا ع حيلي:اخت ليك تاكل؟!
ردا:تعبان م عايز هسي
اشرتا ليهو نظام طيب ورجعتا قعدتا..وهو دخل المطبخ ختا العيش ومشا ع الغرفة..
كلمتا مسلسلتي عاادي وهبشتا التلفون شوية لحدي ما نعستا..دخلتا الغرفة لقيتو طالع من الحمام..شكلو متوضي
قعدتا ف السرير وعاينتا ليهو وهو بفرش في المصلاية
قلتا ليهو:دا العشا؟!
اشرف:لا لا العشا صليتو في القسم..ديل ركعتين نافل
اشرتا ليهو نظام ايوااا..بدا يصلي وانا بقيت اعاين ليهو..
اشرف دا ممكن نقول عليهو انسان كامل..والكمال للّه..هادي ورزين وتعاملو راقي وفي نفس الوقت ملامحو بتحمل كل مقومات الجمال البتتمناها البت ف الولد..ممكن أآكد ليكم انو اي بت شافتو انبرشت فيهو واي بت بتعرفو حبتو..هه إلا انا..مرتو..عرستو لأنو هو بحبني ولأنو صاحب اخوي المقرب وهو الوحيد الاخوي ضامنو انو ح يصوني ويسعدني..وحاليا..انا بحترمو وهو بحبني..
انتهى من الصلاة وجا قعد جنبي
وهو بقول:اها
عقدتا ليهو حواجبو باستغراب:اها؟!
ابتسم:في كلام في بطنك..قوليهو
ابتسمتا ليهو:بطني فيها ولدي
ضحك:ولدنا
نزلتا راسي وانا ابتسامتي بدت تختفي..ولدنا..مُصر يذكرني بالواقع المرير..
رفعتا راسي وقلتا ليهو:ناس دفعتنا عاملين قعدة ف الجامعة بعد بكرة
عاين لي نظام تمي كلامك
اتنهدتا:وانا عايزة امشي..ان شاء الله
قال:بتقدري تمشي؟!..قصدي البيبي يعني وضعو كيف؟!
ختيت يدي في بطني وقلتا:اي عادي..اساسا الدكتور قال الحركة كويسة فالأخير
عاين لي مسااافة بعدها حرك راسو نظام طيب وقال:تمام..ومنو زاتو تغيري جو
ابتسمتا ليهو..دا كل همو..اني اغير جو من هرمونات الحِمل دي..
قال:ح تمشي بدري؟!
حركتا اكتافي:يعني زي 10 كدا
قال:معناها الا امشي القسم واجي اوديك لمن تجهزي
قلتا ليهو:ممكن امشي بترحال عادي
وقف ع حيلو وقال لي:الغدا كان بشنو؟!
دا معاناهو م ح يتناقش ف الموضوع
وقفتا ع حيلي:في بطاطس قيمة وفي سلطة اسود
عاين لي:خليك انا بسخن باكل براي
عاينتا ليهو مسااافة:طيب..تصبح علي خير
باس راسي:تلاقي الخير
اتنهدتا وانا بعاين ليهو بطلع من الغرفة..
رقدتا ف السرير...وانا بفكر ف الراجيني يوم الاتنين..ح ادخل الجامعة كيف بعدو؟!..هو انا السمسترين الاخيرين تميتهم بالغصب بعد الحصل..
