م عارفة نمتا متين ولا نمتا قدر شنو..قمتا علي حيلي بي خلعة جريت شنطتي وفتحتها وطلعتا تلفوني علي امل القى مكالمة من محمد..هه محمد شنو البدق ليك تاني؟!..فتحتا سجل المكالمات وبقيت اشوف اسمو وجبنو الاسهم ديك..مرة سهم دليل ع انو هو دقا ومرة طالع دليل ع اني دقيت انا..اتنهدتا وختيت التلفون في الارض ودخلتا الحمام..استحميت واتوضيت وفرشتا المصلاية..
اول ما سجدتا..دموعي جروو..جرو من خوفي علي محمد ووجعي عليهو وشوقي ليهو..م عرفتا ادعي اقول شنو بقيت اردد ي رب ي رب ي رب...
وانا بصلي الباب دقا..وفهد جا داخل..
بعد انتهيت جا علي وحضني وهو بقول:اووووبببيي
ابتسمتا ليهو بالغصب وختيت راسي في حضنو..
فهد:بالجد م عارف اشكرك كيف..يخ انتي عملتي الم بقدر يعملو زول
هه اي انا عملتا الم بقدر يعملو زول..انا وقعتا محمد الفاضل واتسجن بي سببي..
فهد:مالك ي بت وشك د عامل كد؟!
زحيت منو:تعبانة يخ
فهد:كنتا دار اطلعك الليلة..لكين م حنم ارتاحي هسي
حركتا ليهو راسي نظام طييب ومشيت ختيت المصلاية في محلها..فهد طلع وانا رجعتا اتكورتا علي نفسي..
حرفيا الضيق والوجع الحاسة بيهو لا بوفيهو بكا ولا بتوفيهو دموع..
بقيت بس راقدة وبعاين للشباك..للصباح انا عيوني م غمضو..
وعدا يوم واتنين وتلاتة واسبوووع..وانا في نفس حالتي واحتمال اكعب..
ليلي ونهاري وااحد..بفكر في محمد ولمن انعس خلااص بنوم وتاني اصحي ارجع افكر فيهو..
بابا مشغول وجا مرتين لقاني نايمة..
وفهد م شفتو من اليوم داك..هه شكلو انشغل مع محمد وشلتو..
ريتا بتجيب لي الاكل بقول ليها م دايراهو بترجعو..
مرا تاني اسبووع..
العصر كد باب غرفتي دقا..وسحر جات داخلة..انا كنتا راقدة في السرير ومادة الباب ضهري رفعتا راسي عاينتا ليها مسااافة ورجعتا لي نفس رقدتي..
جات قعدت جنبي وقالت لي:مأب
قلتا ليها من غير اعاين ليها:اشتقتا ليهو ي سحر..اشتقتا ليهو شديييد
سحر:م تعملي في نفسك كد..حرام
قعدتا علي حيلي وقلتا ليها:انا استاهل اكتر من كدا
سحر ختت يدها في راسي وقالت:معلييش..انتي م كان عندك خيارات تانية..م بيدك شي ي مأب
رجعتا رقدتا من غير ما اتكلم معاها..
سحر:الليلة تكريم فهد
عاينتا ليها وم اتكلمتا
سحر:قومي جهزي نفسك عشان نمشي
اتلفتا علي الجهة التانية:م ماشة
سحر:مأب..فهد ح يزعل لو م مشيتي
انا:خليهو يزعل..م دار امشي
سحر:مأب يخ بطلي حركاتك دي
عاينتا ليها:امشي تكريم فهد لأنو سجن حبيبي؟!..امشي ارقص في جنازة محمد؟!
سحر:جنازة محمد دي بيك ولا بلاك كان م تتم..م تحملي نفسك فوق طاقتها
قلتا ليها:كان تتم بي اي زول غيري..علي الاقل كان وجعو ووجعي اقلا
سحر اتنهدت وقالت لي:الحصل حصل ح توقفي حياتك يعني؟!
انا:م دايرة اعيش بعدو اصلا
سحر:مأب استغفري..البتعملي فيهو د غلط وم ح يرجع ليك محمد ولا لحظة من لحظاتك معاهو..حاولي قومي وانفضي زكرياتو منك وابدي من جديد
عاينتا ليها..بتتكلم كأنو محمد د عادي..يخ كيف ابدا من جديد اساسا القى وين جديد بعد محمد؟!...
م رديت ليها لأنو لو شرحتا ليها شنو داك م ح تفهمني..
وهي سكتت لمن حستني اكتفيت وم ح اقدر استحمل كلام اكتر..
