تاني يوم سحر صحتني للجامعة قلتا ليها م ماشة..مشت هي وانا واصلتا نومتي..م كنتا عايزة امشي الجامعة لسببين لأني فترااانة ولأنو حذرني اتكلم مع واحد فيهم ولو اتكلمتا ممكن يقعدني من الجامعة عادي فاا لازم اشوف صرفة معاهو لي بكرة..
صحيت قريب الضهر..ختيت تلفوني في الشاحن واتوضيت صليت ونزلتا تحت لي ريتا سلمتا عليها وكدا ورسلتها عشان تنضف لي غرفتي..دخلتا المطبخ بفتش في حاجة اكلها كداا..جاتني ريتا وهي شايلة تلفوني..
مدتو لي:قبل شوي كان يدرب
شلتو وعاينتا للمكالمة..من رقم غريب..دار اختو كدا تاني دقا..نفس الرقم..فتحتا الخط بدون ما اتكلم..
سمعتا صوت مؤمن:مأب الحقي جوو
كوركتا:في شنوو محمد مالو؟!
مؤمن:تعالي حتتنا البنقعد فيها..سرعةة
قلتا ليهو:انا م جيت الجامعة..في شنو ي مؤمن محمد مالو؟!
مؤمن:جوو مشتبك ليهو مع واحد
قلتا ليهو:ليه مالهم؟!
مؤمن:م عارفين نحنا زاتنا وجوو م راصي يتكلم قلتا ادق ليك امكن تقدري تجي تتصرفي معاهو
قلتا ليهو:اديني محمد طيب
مؤمن:محمد طلع ليهو سااعة..شكلو ماشي للولد
انا:طلع برا الجامعة؟!
مؤمن:لا..طلع للجامعة..كان قاعد معانا هنا والود جاهو
انا:طيب طيب..انا هسي بجي الجامعة
مؤمن:اي عليك الله..جوو اشتباكاتو دي قعد تكون كعبة عديل
بعلتا ريقي..وقفلتا الخط..محمد دا ح يجلطني شكلو..
طلعتا اقرب عباية سودا وطرحة وبنطلون زيتي وتيشريت اسود..لبستهم وعملتا شعري كعكة مرخية كدا..
طلعتا واقرب امجاد لاقتني ركبتها..
دقيت لي محمد م برد..هه طبعا ما ح يرد..
دقيت في رقم مؤمن م برد برضو..خلاص اتوترتا..
بعد شوية كدا مؤمن رجع لي
قلتا ليهو:مؤمن..اها لقيتو محمد؟!
مؤمن:لسه والله م لامين فيهو
انا:ح يكونو مشو وين يعني؟!..شوفو عربيتو واقفة؟!
مؤمن:اي يخ..هم جوا الجامعة
انا:طيب شوفوهو م تقعدو ساي..انا قربتا للجامعة
مؤمن:قدام
انا:دقو لي لمن تلقوهو
مؤمن:تمام
ختيت التلفون في كرعيني واستغفرتا وانا بمسح في وشي..المفروض م اسمع كلام فهد وم اتكلم مع ديل لأنو لو عرف اني اتكلمتا معاهم ممكن عادي يطلعني من الجامعة..لكين اسوى شنو؟!..محمد دا جهجه افكاري بي شكلتو دي
شوية كدا ومؤمن دقا لي..
رديت:اها ي مؤمن
مؤمن:لقيناهو و وحجزناهو وهسي ماشين علي مكتب العميد
اتخلعتا:عميد الجامعة؟!!!
مؤمن:اي
انا:سجمك الليلة ي محمد
مؤمن:انتي وين؟!
انا:قربتا خلاص..10 دقايق وبكون معاكم
مؤمن:تمام
انا:يلاا
وقفلتا..اووفف..الليلة ح يفصلوهو السجمان دا..
وصلتا اديت بتاع الامجاد قروشو وجريي لي مكتب العميد..لقيتهم واقفين كلهم عدا خالد ومعاهم اولاد تانين م بعرفهم
قلتا ليهم:في شنو مالو محمد؟!
نان:نحنا زاتنا م عارفين
انا:طيب هسي معاهو منو جوة؟!
مؤمن:معاهو خالد..لأنو الوحيد الحضر الشكلة كلها
قلتا ليهم:وانتو كنتو وين؟!
نان:جوو من الصباح مختفي ولمن جانا قبل شوية ورانا انو اشتبك مع واحد..تاني الود جاهو لحدي عندنا ومشو معاهو هو وخالد
اتأفأفتا:الاولاد ديل جنو؟!في زول بمش لي المشاكل بي كرعينو؟!
اسيا:المشكلة انهم م بوروك سبب المشكلة شنو
مسحتا وشي بي يدي وانا بستغفر..
قلتاليهم:اها هسي ح يحصل شنو؟!
نان:ادعي العميد م يفصل جوو لأنو عندو مليون انذار قبل كدا
عاينتا ليها مسااافة..شكلو مشاكلو كتيرة..بعد شوية كدا الباب فتح ومحمد جا طالع اول واحد وهو بلولو في نخرتو وبجر هوا..
مشيت عليهو وانا بقول:بسم الله ي محمد الفاضل في شنو مالك؟!
رفع راسو بسرعةة وقال لي:جيتي؟!
قلتا ليهو:جيت اي..هو انت خليت فيني بال اقعد بيهو؟!
ابتسم بالجنبة ونزل راسو..ختيت يدي جنب خشمو محل الدم..زحا راسو لورا من يدي..
عاينتا ليهو:مالك؟!
م ردا لي واتحرك مشا..عاينتا لي خالد مساافة وهو برد علي اسئلة نان واسيا ومؤمن..م عرفتا اقيف اعرف حصل شنو ولا امش ورا محمد..وطبعا قلبي حسم الموضوع لمن لقيت نفسي بجري وراهو..
لحقتو جنب السلالم..جريتو من قميصو بورا وقلتا ليهو:وريني مالك انت؟!
عاين لي
قلتا ليهو:في شنو ليه اتشاكلتا مع الود؟!
عقد حواجبو وم ردا لي
قلتا ليهو:طيب العميد قال ليك شنو؟!فصلك صح؟!
رفع حواجبو الاتنين سوا وقال:اي..لكين بكرة ح ارجع
انا استغربتا:والبرجعك شنو؟!
محمد:هو زاتو
واتلفت مشا..بقيت ماشة وراهو
وبقول:يرجعك كيف وهو فصلك الليلة؟!..انت اصلا بتعمل مشاكل كدا ليه؟!..مححممااااد
اتلفت علي وهو رافع حاجبو واحد:م تكوركي
قلتا ليهو:طيب انت رد لي عشان م اكورك
مسح خشمو بي يدو الشمال وم ردا لي..
دخلنا حتتنا البنقعد فيها..رقد في الفرشة من غير ما يقلع اسبورتيهو..
بقيت واقفة وبعاين ليهو..
قال لي:اقعدي
حركتا ليهو راسي نظام لا
وقلتا:م دار اقعد معاك
ولفيت ماشة كدا جا مسكني
وهو بقول:تعالي يخ مالك انتي هسي؟!
اتلفتا عليهو وانا بنتق يدي منو:ملة ي محمد..انا جاية من بيتنا مخلوعة دار اقع علي من خوفي عليك وفي النهاية انت مروق ومستكيييين وم راضي تفتح خشمك وتقول في شنو
محمد:م تكوركي
رفعتا ليهو حواجبي الاتنين نظام بلاي؟!..يعني انا هسي صارفة العربي الكتيير دا وهو م فهم منو ولا كلمة..
قلتا ليهو:سلام ي محمد
ودار امشي كدا تاني مسكني..
وقال:مأب يخ..تعالي دايرة شنو انتي هسي؟!
انا اتلفتا عليهو:دار اعرف سبب مشكلتك مع الود والعميد عمل ليك شنو وكيف ح يرجعك بكرة هو؟!
محمد وهو بطبق لي اصبع يدي الصغير:اولا سبب مشكلتي مع الود م مهم ولا ح اقولو ليكي..
طبق اصبعي البعدو وقال:والعميد عمل لي شنو..فصلني لأنو دا انذاري الالف عديل كدا
طبق اصبعي البعدو:وحكاية انو ح يرجعني براهو دي لأنو بالجد بكرة ح يرجعني لمن يعرف انو الفاضل محمد ابوي
اتنهدتا..طبعا بي حركتو دي امتصا كل العصبية مني
قلتا ليهو:ح توري ابوك؟!
محمد:تؤ..العميد براهو ح يوريهو وابوي ح يقول ليهو رجعو وبكرة ح يسدعوني للمكتب عشان يوريني انو رجعني
قلتا ليهو:وانت؟!
محمد ختا يدي في صدرو:انا بحبك
لزيتو:محمد خليك جادي شوية..م صح مشاكلك تكون كتيرة كدا
محمد:انا مشاكلي كتيرة؟!..هسي عليك دينك من عرفتيني اتشاكلتا مع زول؟!
انا:لا لا ابدا..غير ابوك الكل كم يوم مشتبك معاهو دا
فكا يدي ومشا علي الفرشة بي زهج
عاينتا ليهو وهو بقلع في الاسبورت
وقلتا:محمد ابوك دا انت مقصر في حقو شديد والله
عاين لي:انتي معاي ولا معاهو؟!
مشيت عليهو:انا مع راحتك..وراحتك في انك تكون متصالح مع ابوك
جرا لي يدي:راحتي معاك
قعدتا في طرف الفرشة وخليت كرعيني برا..
محمد مسك يديني الاتنين وقرب وشو مني
وقال:بتقدري تريحيني؟!
رمشتا مرتين ورا بعض..فكيت يديني منو ووقفتا علي حيلي
محمد:مالك اتنفضتي كدا؟!
انا:انا لازم ارجع البيت..م وريت ناس البيت اني طالعة
محمد:م تمشي..قولي ليهم ظهرت لي محاضرات فجأة
انا:م ينفع..هم عارفين اني شغالة محاضرات لكين قلتا ليهم فترانة الليلة م بمشي
محمد صرا وشو زي الشفع..
ضحكتا لي حركتو دي وقلتا ليهو:يلا م تصر لي زي الشافع كدا..مف طريقة اقعد والله
محمد:طيب..اقوم اوصلك
انا:لا لا لا..م بحتاج بركب امجاد بس
محمد غمض عيونو وفتحهم:لا دقايق اوصلك
قلتا ليهو:محمد م بحتاج والله
لبس اسبوريتهو ووقف علي حيلو وقال:ارح
قلتا ليهو:انت راسك دا قوي كدا ليه؟!
محمد:م عارف والله اسأليهو
ضحكتا..وبقيت ماشة جنبو عاينتا ليهو مسااافة وهو مدقق عيونو من الشمس..سبحان الله..ملامحو بتديك احساس انو برئ ومسكييين وطيبان لكين عيونو فيهم حاجة كدا غريبة شوية وبتخليك تعاين فيهم مسااافة..
ركبنا العربية..تلفونو دقا
رفعو وقال:دي نان
ردا واتكلم معاها كدا وقفل الخط وقال لي:دايرة تشوفني وين..هم ورا الكافتريا
قلتا ليهو:اممممممم
ختا يدو في عيونو مسااافة وبعدها مسح وشو
قلتا ليهو:عيونك واجعاك؟!
محمد:تؤ..مصدع شوية كدا
قلتا ليهو:طيب ما كان ترتاح ي محمد بدل تتعب نفسك بي توصلي كدا
محمد:وريتك قبل كدا..راحتي معاك والتعب البكون ليكي م اسمو تعب
ابتسمتا ليهو مسااافة وربعتا يديني وبقيت اعاين ليهو
محمد:اها بتخططي في شنو؟!
انا:ولا شي..بفكر في شخصيتك الم قادرة افهمها دي
محمد:ليه مالي؟!
انا:مرات بارد ومرات رومانتك مرات هادي ومرات عصبي..مفتري وبرئ في نفس الوقت..انت بقيت كدا كيف؟!
ضحك وهو برفع اكتافو..
وقال:احلى شي انك م فاهمني..اصلا عز الطلب انك تكوني مشغولة بي
قلتا ليهو:24 ساعة بفكر فيك
محمد:للدرجة دي محيراك شخصيتي؟!
انا:تؤ..للدرجة دي بحبك
ضحك:انا بحبك..لكين الغريبة اني م دار افهمك ولا دار اعرف تفاصيل عنك انا دار احبك وبس..كفاية انك قدامي عشان احبك
عاينتا ليهو مساااافة..شوف الفرق بيني وبينو حتي في الحب..انا حبي حب فضول ودار اعرف شخصيتو لكين هو حبو حب تعب وفتر من الدنيا..بس داير يكون معاي من غير اي شي تاني..
وصلني البيت
عاينتا ليهو:انزل خلاص؟!تاني م ح يدقو يقولو لي الحقي محمد مشتبك مع واحد؟!
ضحك:لا لا..لكين يمكن يدقو يقولو ليك الحقي محمد بموت في حبك
ضحكتا:بلاااي؟!
محمد:ولاااي
قلتا ليهو:الله يهديك لي ي محمد
محمد:ليك؟!احلي دعوة
ابتسمتا ليهو ونزلتا..اشرتا لي نظام بباي وهو مشا
طبعا اابيت فااضي دخلتا طوالي زولة نووم..
صحيت بي صوت سحر بتصحي فيني..
قلتا ليها:هاا في شنو؟!
سحر:قومي فهد بناديك تحت
صريت وشي..وليه مرسلها لي يعني ما يجي براهو..
سحر:قومي شوفيهو مالو..واعتذري منو لأنك غلطانة في حقو
عاينتا ليها باستغراب:انا الغلطانة؟! هو ماديني كف واجي اعتذر ليهو انا؟!
سحر:انتي كذبتي عليهو وطلعتي مع ناس جوو وبعد جيتي تقلي ادبك وطولتي لسانك عليهو
اتأفأفتا:سحر انتي معاي ولا معاهو؟!
سحر:معاهو طبعا
وقفتا علي حيلي وانا بقول ليها:اصلك متخلفة وم بسألك
نزلتا تحت لقيتو بياكل..
عاين لي وانا نازلة من السلم ورجع ياكل..
وقفتا جنب الصفرة وربعتا ليهو يديني:ايووة
فهد:اقعدي اتغدي
قلتا ليهو:م جعانة
سحر قعدت:مأب اقعدي
قعدتا وبديت اكل وهم الاتنين ساكتين..
بعد شوية فهد شبع..قام دخل المطبخ وجا ختا لي السماعة قدامي في التربيزة
عاينتا ليهو..هو شالا متين اصلا؟!
قال لي:من بكرة تختيها من تطلعي من البيت لحدي ما تجي راجعة..لو فصلت دقيقتين الدقيقة التالة ح تلقيني في وشك
عاينتا ليهو باستغراب..يعني خلاص ارجع للخطة؟!..جواي كان في حاجة فرحانة بس حبيت اتعزز
وقلتا ليهو:انا م دار ارجع..حاول استفيد من المعلومات الوصلتك ليها لحدي هسي واقبضهم
عاين لي مسااافة بعدها قال لي:م عندك خيار تاني انتي
عاينتا ليهو مساافة بعدها اتلفتا قدامي وانا بقلب عيوني..
هو فت فت فت مشا..اتأفأفتا..اصلا فهد راسو قوي ولو بدا حاجة الا يتمها حتي لو الحاجة دي ح تخليهو يزعلني..
سحر:م اتعتذرتي ليهو ليه؟!
عاينتا ليها:اعتذر ليهو؟!..مستحيل
اتنهدتا وم ردت لي وانا طلعتا غرفتي..
بعد المغرب كدا بابا جا..سلمتا عليهو وقعدتا جنبو وانا ماسكة يدو..يخ بالجد اشتقتا ليهو شديد..
بليل صحيت بي صوت تلفوني بدق..
رديت من غير ما اشوف الاسم لأني متأكدة انو محمد..
قلتا ليهو:محمد
قال لي:اشتقتا ليك ي عيون محمد
ابتسمتا:وانا كمان
محمد:هو الليلة اليوم دا كان طويل ولا انا بتخيل لي
ضحكتا:بتخيل ليك
محمد:انتي م كان طويل بالنسبة ليك؟!
انا:ايييييك طويل شديد
محمد ضحك
انا:اها رجعتا البيت؟!
محمد:اي من المغرب كيت نمتا م صحيت الا هسي
انا استغربتا انو نام بدري:ليه مالك؟!
محمد:م عارف حاسي جسمي مكسر
انا:من شنو؟!..عندك حمة؟! م تبقى ليك ملاريا كمان
ضحك:ملاريا شنو ي مأب؟!..دا من عدم البنقو
عقدتا حواجبي:والخلاك م تشربو شنو؟!
محمد:الضهر قمتا مستعجل قلتا اشربو في الجامعة..وفي الجامعة م فضيت
قلتا ليهو:م فضيت من المشاكل
محمد ضحك:اي بس..لكين هسي بعد صحيت شربتا وراسي زبط
اتأفأفتا وم رديت ليهو
محمد:مالك انتي صاحية متنشنة؟!
قلتا ليهو:مف شي
محمد:عشان جبنا سيرة صاحبنا؟!
(صاحبنا=البنقو)
قلتا ليهو:يعني عارف سيرتو بتزهجني
محمد:طبعا..بتزهجك وبتخوفك
اتنهدتا:بتخوفني شديد يمحمد
محمد سكت وم ردا
انا سكتا مسااافة
محمد:مع السلامة
انا:حتنوم؟!
محمد:تؤ..يداب صحيت اقول ليك
انا:طيب ح تعمل شنو؟!
محمد:ح اشرب بنقو
وكر كر كر ضحك
اتغظتا منو طبعا..كاوي خلاص
قلتا ليهو:طيب ي محمد
محمد:خلاص خلاص م تزعلي
انا:مع السلامة
محمد:طيب قبل تقفلي
انا:اها
محمد:بحبك ي بت
كر كر كر ضحكتا
محمد:ايوووووة
قلتا ليهو:يلاا
محمد:يلاا
وقفلتا..وانا مغيوظة منو وزعلانة عليهو في نفس الوقت ختيت التلفون ف الشاحن ورقدتا وانا بردد
"يا ربي تصلحو وتعافيهو..يا ربي ترضيهو وترضى عنو"
سوري علي الاخطاء الاملائية😴🖤
#يُتبع..
mosha🌸✨
