تاني يوم صحينا متأخرييين..طبعا الليلة قاب عشان بكرة ممتحنين..صلينا ونزلنا تحت اكلنا وكدا..م مشيت جنب تلفوني اصلا قلتا اكيد محمد ح يكون زعلان لسه..
لمن طلعنا فوق عشان نقرا..فتحتا التلفون لقيت رسالة عادية منو
محتواها "بحبك.."
قريتها كم مرة وقعدتا اضحك..فكرتا ادق ليهو تاتي اتراجعتا لمن شفتا الساعة 9:07 ص م ح يكون صاحي+ خليهو هو يدق لمن يصحي..ختيت التلفون وبديت قراية وانا متكيييفة وبي جواي متأكدة انو اول ما يصحى ح يدق لي..
وفعلا زي 11:34 دقا لي..
رديت ب:الوو
محمد:اشتقتا ليك
انا:دي حالتك بتحبني وبتشتاق لي بتعمل فيني كدا
ضحك:كيف؟! بعمل شنو هسي انا؟!
ضحكتا لي ضحكتو:ولا شي
محمد:لا لا بالجد اشتقتا ليك
انا:وانا كمان والله
محمد:م جاية الجامعة؟!
انا:نووو
محمد:ليه يخ
انا:عشان بكرة ممتحنة
محمد:اي عارف..تعالي عشان تقري
ضحكتا:لا لا معليش..بقرا في بيتنا
ضحك
وانا ضحكتا
محمد:اها الاخبار شنو؟!
انا:كووويسة حمدلله..وانت؟!
محمد:م كويسة
انا:ليه في شنو؟!
محمد:معارف ي مأب زهجان وقافلة معاي
انا:من شنو؟!
محمد:معارف والله
انا:طييب..احتمال عشان كنا م بنتكلم
محمد:اي تقريبا
انا:اممممممممممم
محمد:يداب صاحي من النوم
ضحكتا:كسلااان
محمد:م كسلان..عارفة نمتا كم؟!
انا:اهاا
محمد:بعد 4 يخ
انا:ليه؟!
محمد:رجعتا زي 1 كدا وم جاني نوم..فكرتا ادق ليك لكين قلتا حرام البت ممتحنة خليها تنوم
ضحكتا:عادي م مشكلة كان تدق
ضحك:بحبك انا
ضحكتا:محمد المدلل
محمد:م تقولي لي مدلل..مدلل كيف يعني؟!
ضحكتا:زعووول يعني بتزعل في اقل شي
محمد:م اقلا شي..لمن اكون دار اتكلم معاك وم اقدر اتكلم دي م حاجة بتزعل؟!
انا وانا بضحك:بتزعل شديد والله
محمد:غياظة
ضحكتا:م غياظة والله..لكين بالجد كان مف طريقة ارد ليك
محمد:تقومي تطلعي برا بس
انا:طييييب
محمد:اي بس
ضحكتا
محمد:اها القراية كيف؟!
انا:حمدلله زفت بس
محمد:ليه مالك؟!
انا:مادة بكرة كتيرة شديد وانا م قارية
ضحك:امشي اقريها هسي طيب مالك؟!
انا:م نفسي والله
محمد:معليش حبيبي..تعالي ع نفسك واقري
ابتسمتا ع كلمة حبيبي
محمد:امشي احفري كدااا وانا بجهز وبطلع الجامعة وبدق ليك بعدين..ظط؟!
صريت وشي:طيب
محمد:يلاا
انا:يلاا
وقفل..اتنهدتا وانا متكيييفة..كدا خلاص المشكلة اتحلت..بدون عتاب بدون تبرير بس بي كلمة بحبك واشتقتا ليك منو..
فعلا بديت احفر زي ما قال محمد..
العصر البدري كدا..فهد جا وقال لينا اجهزو عشان يرجعنا بيت ناس عمو..
فعلا اتغدينا وصلينا وطلعنا..
فهد وقف العربية قدام بيت ناس عمو..
عاين لي:مأب..قبل نهاية الامتحانات دي دار نخلص من الموضوع د
عاينتا ليهو:ليه سريع كدا؟!
فهد عقد حواجبو:سرييييع؟!
انا:لا لا قصدي يعني لسه في معلومات كتيرة م عرفناها خلينا للسمستر الجاي
فهد:لا العرفناهو د كفاية..كل عليك انك تختاري يوم هم يكونو جابين فيهو قرفهم د الجامعة وتورينا عشان نقبضهم بالجرم المشهود
بعلتا ريقي من فكرة انو يقبضو محمد دي..
فهد:اتفقنا؟!
حركتا ليهو راسي نظام اتفقنا
فهد:يلا اجرو..بالتوفيق
حركتا ليهو راسي ونزلتا..وانا متضاااايقة
وصلتا الغرفة ختيت حاجاتي في الارض وقعدتا جنبها..
سحر جاتني:اووب
عاينتا ليها:يعني خلاص؟! انتهت القصة؟!
جات علي:القصة معروفة نهايتها من بدايتها
العبرة خنقتني:طيب م ممكن تتغير النهاية؟!..م ممكن فهد يدي محمد فرصة يتغير؟! صدقيني ح يتغير عشاني
سحر حضنتي..غمضتا عيوني ودموعي جرو..بالجد م نفسي الموضوع د يخلص عديل م نفسي..
