تاني يوم كان الخميس..
طلعنا انا وسحر من البيت سمعنا صوت بوري اتلفنا لقينا عربية محمد واقفة وهو بنزل منها..اتخلعتا طبعا ومشيت عليهو وانا بضحك باستغراب
قلتا ليهو:هييييي
محمد:صباح الورد
ابتسمتا:يسعد صباحك..الجابك هنا شنو؟!
محمد:قلتا اجي اسوقك عشان نلحق نشرب الجبنة بمزااج قبل محاضراتك تبدا
قلتا ليهو:حتي لو محاضراتي بدت نشربها بمزاااج
ضحك:تمام يلا
وحرك راسو نظام اركبي
عاينتا لسحر الواقفة بعيييد وم جات علينا
سحر:لااا
محمد مشا خطوتين بقى واقف جنبي وقال ليها:يلا عشان نتعرف زاتو
عاينتا ليهو..مع انو قصدو يطلب منها بأدب لكين نبرة صوتو بقت كأنو بتأمر
سحر رفعت حاجبها:وليه نتعرف؟!
محمد:هسي يعني انا ارجع فاضي ولا كيف؟!
سحر:والله مشكلة حياتك دي م حاجة بتخصني
محمد ضحك وعاين لي نظام دي مالا محرجة كدا
عاينتا لسحر وقلتا ليها برجاء:سحووووور
عاينت لي مسااافة بعدها اتنهدت وجات علي العربية
محمد ضحك وهو بفتح ليها الباب وقال:ابو دا حنك زاتو
ركبت وقفلت الباب وراها وانا ركبتا قدام جنب محمد..
طول الطريق م كان في حديث مهم..بس محمد سأل سحر من تخصصها وكدا وهي مركبة ليهو وشش
اول ما وصلنا فت فت نزلت
عاين لي ورفع حواجبو وطير عيونو وقال:صعبة كدا مالا؟!
ضحكتا:كلنا كدا
محمد:انتي م زيها..انتي حنينة
بقت اعاين ليهو:عشان اتعرفتا عليك انا اول؟!
عاين لي سريييع:ي بت انتي مختلفة ولا مالك؟!اقول ليك حنينة تقولي لي اتعرفتا عليك اول؟!
قلتا ليهو:براحة براحة متعصب مالك؟!
لزا لي راسي باصبعو:مخك دا مركب شمال
ضحكتا:قايلاني متحسسة من الحتة دي؟!
عاين لي:ياتو حتة؟!
قلتا ليهو:حتة اني اتعرفتا عليك اول واني جيتك..انا م متحسسة بالعكس..لو الزمن اتعاد مستعدة اعيد العملتمو تاني وتالت ورابع
ابتسم وجا علي وقال:اولا جيتيني وجيتك دا كلام جر هواا وانا م بشتغل بيهو..مسك يدي..تانيا لو انتي جتيني برجلينك وانا جيتك بقلبي..حتي قبل ما اعرفك
قلبي دقا طبعا..بقيت اعاين ليهو دا محمد؟!..الكلام دا بقولو محمد؟!..قبل يعرفني كيف يعني؟!!
جريت يدي بس هو مسكها قووي عاينتا ليهو لقيتو بعاين لي يدينا..بلعت ريقي وجريتها اكتر..رفع عيونو عاين لي وطقق فكا يدي..
انا طوالي نزلتا..دخلتا الجامعة وانا مشاعري ملخبطة..م عارفة انبسط لأنو محمد بدا يتعلق بي ولا ازعل لأني م بستاهل كدا؟!..في مكان ما في قلبي مبسوووووطة لأنو قال لي كلامو دا..لمن كان ماسك يدي كنت عايشة صرااع بين قلبي البقول لي فكي يدك منو وحرام عليك تلعبي بمشاعرو وبين عقلي البقول لي م تفكيها انتي ماشة كويس في الخطة...
المحاضرة كلها كانت عبارة عن الافكار دي بتلف في راسي..حتى الجبنة الاتفقنا نشربها ما شربناها..
طلعتا من المحاضرة لقيتو قدامي
ابتسمتا وانا برمي تفكيري دا كللللوووو ورا ضهري..
ابتسم لي:الراجل المعاط دا
"قصدو الدكتور"
ضحكتا:شديد يخ
محمد:يلا نفطر مسافة التانية ما تبدا..الجماعة راجيننا
ابتسمتا ليهو:طيب
مشيت معاهو وفعلا لقيتهم متلميييين..سلمتا عليهم وقعدتا
قلتا خليني اهتم بنان زي محمد ما بعمل
ختيت يدي في رجلها لأنها كانت قاعدة جنبي
وسألتها:الجميل كيف الليلة؟!
ابتسمت لي:بسط بسط
احمد جا شايل السندوتشات والبارد..مدا لمحمد محمد مداهم لي..شلتهم وانا مكتيييييفة..
المهم م كان في موضوع مهم ياها ونستهم وتشغيلات مؤمن وكدا..
في نص الونسة
محمد:مأب المحاضرة
عاينتا ليهو..هو اسمي حلو كدا اصلا؟!
نان: البت قعد تتونس مالك دار توزعها انت؟!
ضحك:م كدا..بس ذكرتها ليها
نان:م تذكرها هي قالت ليك ذكرني؟!
محمد:ي بيتنا..م تدخلي بيني وبين..
مؤمن نطا:بينك وبين منو؟!
محمد:بيني وبين مأب يعني ح يكون منو؟!
نان لبعتو:مأب ي كبير؟!
ضحك ونزل راسو..طبعا انا مسطحة وبعاين ليهو..يخ ضحكتو سمممحة
مؤمن قال لي:هوي يا السرحتي..قومي شوفي محاضرتك بوين
نان:يخ مالك انت التاني؟!
اسيا:الاولاد ديل شكلهم عندهم مصيبة دار يعملوها ورا مأب
قلتا ليها:اي شكلهم والله..اعترفو دار تعملو شنو؟!
محمد:ح يكون دار نعمل شنو يعني؟!..دايرين مصحلتك م اكتر ولا اقل
طبعا فصلتا طوالي وضحكتا ليهو
مؤمن:احااااااا
تاني بقينا نتووووونس كدا
محمد وقف علي حيلو عاينتا ليهو نظام ماش وين؟!
محمد:مشوار قريب وجاي
مؤمن:هسي السألك منو انت؟!
انا:سألتو انا
مؤمن:وبعلييييااااا لي الله انا..يرحم ايام كنتا بتمشي وتجي ساااي ي محمد زولو بشتغل بيك مف
محمد ضحك
احمد وقف:سوقني معاك زاتي
نان:اها وانت ماشي وين كمان؟!
احمد:بدى الكافتيريا طلة واجي
خالد:اي بعد دا وقتهم جاا
نان لمحمد:انت ماشي عشان كدا؟!
محمد:اي
بقيت اعاين ليهم..منو الوقتهم جا؟!
مؤمن:برا الجامعة ولا هنا؟!
محمد وهو بلبس الاسبورت:براا
نان لاحمد:احمد جيب لي تلفوني من الشاحن معاك
احمد:حااضر
محمد فت فت فت مشا واحمد وراهو...في شنو؟!
شوية كدا واسيا وخالد قامو مشو..بقينا انا ومؤمن ونان
انا ونان داقين الونسة
قالت لي:محمد اعترف ليك؟!
استغربتا:اعترف لي بي شنو؟!
نان وهي بتصلح قعدتها:انو بحبك
جكك اتلفتا لمؤمن الراقد ورانا لقيتو نااااايم..استغربتا طبعا
وقلتا لنان:دا نام؟!
نان:عادي..طبيعي بنوم هنا
انا:غريبة يخ
نان:تلقيهو الليل كلو حايم..م بحب يمش بيتهم
عاينتا ليها:ليه؟!
نان:بيتهم كلو مشاكل وكورايك..عشان كدا
انا: يحليلو يخ
نان:م جاوبتي لي علي سؤالي
ضحكتا:منو القال ليك انو بحبني
نان:م الا يقول..ظاهر
انا:والبقاهو ظاهر شنو؟!
نان:شوفي..محمد بطبعو اصلا م بتكلم كتير يعني لو المفروض يقول 4 كلمات هو بقول 2 بس..بعدين في حاجات بتتفهم بديهيا م الا تتقال
ضحكتا:وبي كدا حكمتي انو محمد بحبني؟!
نان:انتي زاتك بتحبيهو
عاينتا ليها..
نان:ولا انا غلطانة؟!..عموما انا م بفهم في المواضيع دي كتير ولا بركز معاها لكين محمد صحبي وانا عارفاهو
ضحكتا:محمد صحبك شديد؟!
نان:للدين
انا:طيب ليه م حبيتيهو ولا هو حباك
ضحكت:مع انو سؤالك بدل علي انك بتحبيهو لكين ح اجاوب..م حبيتو لأني بي طبعي م بحب لكين هو كان مكرش علي
انا:محمد مكرش عليك؟!!!!
نان:كان كان ولمن اتعرف علي لقاني محمد ولد وكسر حنك الموضوع
بقيت اعاين ليها:جا اتعرف عليك هو يعني؟!
نان:ياا بتنا دا م موضوعنا هسي اتتي بتحبي الود دا ولا لأ؟!
انا:م عارفة م تتكلمي معاي
نان ضحك:دا كلو عشان قلنا محمد كان مكرش علي؟!
انا طبعا اتغظظظتا لكين قعدتا اضحك:لا طبعا بس م بحب اتكلم في المواضيع دي
نان: ظط ظط قفلنا الموضوع
انا:اي احسن
بعد شوية براي سألتها:يعني محمد جا اتعرف عليك كيف؟!
نان ضحكت:كنا في نفس القاعة
انا:كنتو؟! وهسي؟!
نان:انا رتبتا وبديت من جديد
انا:ومحمد هسي في كم؟!
نان:السمستر الخامس تقريبا
انا:اممممممم
نان:اي بس
عاينتا ليها:اول يوم اتلاقينا فيهو كان قلتي انو محمد حكا ليك عني كتير
ضحكت:اهيييي علينا
ضحكتا:قال ليك شنو؟!
نان:كان ايام مرض خالتو الله يرحمها..كانو فتركيا قال لي لاقيت بت سودانية وقعدت معاي وكدا
انا:اهاا
نان:بس كان معلق فتتترة معاك تاني بقى م بتكلم وتاني بعد اتلاقيتو في الجامعة وراني
انا:اهاااا
نان:ووراني انو حضنك برضو
كر كر كر ضحكتا
نان:وحلاااتي بتخجل البت
المهم بقينا نتونس كدااا اسيا جاتنا براها
نان:وين خلودي؟!
اسيا وهي بتقلع في الاسبورت:خلودي في عينك
نان:اخلصي مشا وين؟!
اسيا قعدت:محمد دقا ليهو وكان هايج وبكورك قام طلع ليهو
انا:ومحمد بكورك ليه يعني؟!
اسيا عاينت لي:م عارفة والله
شلتا نفسي وختيتو
اسيا عاينت لنان:شكلو الموضوع م تما
نان قوست ليها خشمها لتحت وم اتكلمت
انا م ركزتا معاهم تفكيري كلو كان في محمد البكورك دا..
المهم زي بعد ساعة كدا انا ونان طلعنا الجامعة ماشين الاستراحة..
في الاستراحة قدام المرايا
قلتا لنان:حلاتك والله
نان ضحكت وم ردت
بقيت اعاين ليها..البت دي سمحه بالجد السماحة الوااااحدة دي
لمن رجعنا مكانا لقينا محمد وخالد قاعدين
قعدنا
نان:اها بشرو الموضوع مشا؟!
خالد:نان د م وقتو
عاينتا لخالد..دا مالو دا؟!
عاينتا لمحمد..ساكت وشكلو هادي شدييد بوحي ليك انو ليهو ايااام م كورك كأنو م كان بكورك
قال لي:حضرتي محاضراتك؟!
حركتا راسي نظام لا لا
سكت وم اتكلم معاي..
احمد جا مدا لنان تلفونها
قعد وبقو ساكتين كلهم..الاولاد شكلها قافلة معاهم..
مؤمن جا وهو شايل صينية فيها 6 كبابي قهوة
ختاها وقعد وقال:مدام م لمينا في الكيف التقيل نلم في الكيف الخفيف
عاينتا ليهو..كيف تقيل؟! شكلو الموضوع ليهو علاقة بالمخدرات..
محمد ابتسم وهو بشيل الكباية:اتكلم عن نفسك..انا م قاطع
عقدتا حواجبي باستغراب من كلامو..يعني شنو م قاطع؟!
مؤمن:انا زاتي م قاطع..عامل حسابي لليوم الاسود
عاينتا ليهو بخلعة...يداب فهمتا..قصدو م قاطع يعني عندو مخدرات
نان:شوفونا معاكم يخ..انا زيتي طالع
عاينتا ليها بخلعة يشوفوها معاهم كيف؟!يعني هي بتتعاطى؟!...مأب بطلي غباء فهد قال ليك الشلة دي كلها بتتعاطى...
خالد:دا م وقت الكلام دا
محمد لنان:انا بشوف ليك
وعاين لخالد وخالد عاين ليهو مساااافة...
احمد:نان انا زاتي ممكن اشوف ليك
اسيا:لا انت خليهو معاك..احتمال نحتاج ليهو
بعلت ريقي وانا بسمع فيهم..قلبي دقاا..انا قاعدة مع مدمنين وحاليا بتناقشو في موضوع المخدرات..الله يجازي محنك ي فهد انا هنا بي سببك..
محمد مسك يدي عاينتا ليهو بخلعة
قال لي:اشربي جبنتك بردت
حركتا راسي نظام طيب..وجريت يدي عشان اشيل بيها الكباية..
نان ختت كبابتها وقالت:شكلي م ح اقدر اكملها..بطني طمت
احمد:هانت..بكرة بالصباح ح تخلصي
اسيا:ليه صح قلتو المسا؟!
احمد:اي غيرنا للصباح..محمد قال عشان مأب تقدر تمش معانا
اتخلعتا طبعا..انا امشي معاهم وين؟!!!
محمد:زاتو اطمن وقت المسا بتكون في مداهمات قالو
