بكريتو صحيت وانا مقررة اني اساعد فهد..نزلتا تحت م لقيتو مشيت ليهو غرفتو لقيتو جاهز بلبس في الجزمة..
عاين لي ورجع يربط ف الجزمة:صباح الخييير بالحلوين
ضيقتا ليهو عيوني:بغض النظر عن التلج البتكسر فيهو من امبارح دا..الخطة ح تكون شنو؟!
قال لي:ثواني
قعدتا في كرسي المكتبة وبقيت اعاين ليهو
وهو بعد جهز جا علي:شوفي ي ستي..الموضوع ح يكون كالتالي..ح تتعرفي عليهو وتخشي معاهم الشلة عشان تعرفي حفلاتهم البضربو فيها وتعرفي بجيبوهو من وين..وطبعا ح تجي توريني بعد داك انا بشوف انسب وقت وح احاصرهم ويتقبضو بالثابتة
بقيت اعاين ليهو:ح اغير اسمي وكدا؟!
ضحك:لا لا طبعا م محتاجة تغيري شي غير محل سكنك عشان لو راقبوك او كدا م يصلو بيتنا هنا
انا:اها ح اقعد وين؟!
فهد:ح تقولي لأبوي انك عايزة تقعدي مع سحر كم يوم
استغربتا:كم يوم بس؟!
فهد:ي غبية في البداية ح تقولي ليهو كم يوم وممكن تجريها شهر عديل..شهر م ح يكفيك؟!
بعلتا ريقي:اها انت ح تكون قريب للجامعة ولا ح ترسل حرس معاي ولا كيف؟!
ضحك:ولا دا ولا دا..هسي ح اديك سماعة لا سلكية بتكون موصلة طبيعي مع سماعتي بالتالي ح اعرف تفاصيل يومك كلو
انا:اها لو اتكشفتا مثلا او حصلت لي حاجة
ضحك:ي بت انتي قايلة روحك داخلة حرب؟!..الموضوع دا كلو ح يتم في الجامعة ومف خطورة عليك
اتنهدتا:اها وح اتعرف عليهو كيف؟!
ابتسم:بعد دا دي شغلتك..وريني شطارتك فيها
قلبتا عيوني:انت واحد مهوس بالشغل
ضحك:انا واحد بعرف استفيد من الصُدف..بعدين الود دا عندي معاهو عداوة شخصية
عقدتا حواجبي باستغراب:عدواة شنو؟!
فهد:م مهم تعرفيها..المهم اني وثقتا فيك ودخلتك في تفاصيل شغلي م تخذليني ي مأب..ظط؟!
عاينتا ليهو مساااافة...شوفو تقريبا كدا انا كنتا مبسووطة من ال ح اعملو دا لسببين..اولا ح اساعد فهد واحتمال يترقى بسببي..تانيا حياتي فاضية وم عندي موضوع فااا ح القى لي موضوع الايام الجاية💃🏻
عاينتا لفهد:جيب السماعة
ابتسم لي ومشا جابا..فردة سماعة ايربودز لكين فيها ازرار كتييرة بالجهة الداخلية..
بقيت اعاين ليها
فهد:شوفي الجوطة دي كلها م عليك بيها..المهم اعرفي انك بتقفليها من هنا وممكن تربطيها ب بالبلوتوث مع التلفون اول ما تقفليها بتشتغل اغاني..يعني لو زول شافها بتبقى زي السماعة العادية
حركتا راسي نظام طيب:ح ابدا من الليلة؟!
فهد:لا الليلة يداب ح نكلم الحاج انك تمشي لسحر..بعدتمشي هناك ابدي
حركتا راسي نظام طيب
ابتسم لي:قالو عيلة الضابط كلهم ضباط..انتي هسي ب اعتبراك ضباطة خفية
ضحكتا..طبعا عجبتني كلمة ضابطة دي..
بعد داك طلعتا ع غرفتي..وانا متحممممسة للموضوع..جهزتا للجامعة ونزلتا تحت لقيت فهد طلع..صبحتا ع بابا
وقلتا ليهو:بابا عاوزة اقعد مع سحر كم يوم
عاين لي:ليه؟!
حركتا اكتافي:ساي..يعني اغير جو كم يوم واجي
قال لي:طيب..بالمسا لمن ترجعي جهزي حاجاتك وانا بوديك
ابتسمتا ليهو:يسلمو ي حلو انت
ضحك:اقعدي افطري
فعلا..فطرتا وطلعتا ع جامعتي وانا متمنيييية اشوف الود بتاع تركيا...
لمن وصلتا محاضرتي كان باقي ليها تلت ساعة وتبدا..قلتا مسافة تبدا الف في الجامعة شوية احتمال اشوفو..بقيت لافة وبعاين للناس..مشيت الكافتريا والبنشات القدامها وجيت بجاي قدام القاعات وجنب الكولر وكدا م لقيتو..طلعتا وقفتا جنب البوابة وبعاين لبرا..جوة نفسي قلتا هسي احتمال الود دا م بقرا هنا وامبارح جا ساي بس..ابتسمتا بالجنبة وانا بتخيل انو م بقرا هنا..انا وفهد الضحك بشرطنا..
عاينتا لساعة في تلفوني لقيتها 10:45..السجم..المحاضرة بدت ليها ربع ساعة..فرر اتحركتا ع القاعة وكانت بعيدة مني يعني قريب 10 دقايق عشان اصلها..المهم وصلتا دقيت الباب..المُحاضر عاين لي مسااافة بعداك رجع يشرح..بقيت واقفة وبعاين ليهو..م عارفة اخش ولا ارجع..بعد 10 دقايق
قال لي:انتي معانا؟!
حركتا راسي نظام اي وانا متغاااايظة منو
قال لي:متأخرة ليه؟!
بعلتا ريقي:المواصلات كعبة
عاين لي من فوق لتحت:شكلك دا شكل وحدة جاية بالمواصلات
بقيت اعاين ليهو..دا اقول ليهو شنو هسي؟!
قال لي:خشي خشي..اساسا بتضرو روحكم بالتأخير دا
دخلتا وقعدتا وانا متغاااايظة..اووف من قبل ابدا الموضوع بديت اتأخر ع محاضراتي..الموضوع باين زفت من اولو..
