نُسقِطكم من حيثُ رفعناكمْ
نطويكم طيَّ الصُحفِ إن وجِب !
البارت الخامس
ليلى محمد
نيران غياهب الانتقام 💚
الليلة الثانية ....
الساعة 2:00
بعد منتصف الليل
طلعت من الغرفة بهدوء واني شايلة جنطة صغيرة بايدي والحذاء بالايد الثانية ما لازم احد يحس علية
نزلت من الدرج بهدوء البيت ظلمة عدا ضو خافت ديجي من الممر كملت طريقي للحديقة بعد محاولاتي بفتح الباب بدون ما اطلع صوت
وگفت البس الحذاء مالتي وبعدها ضليت واكفة شوية بمكان قريب عالباب بعد ما طلعت من البيت حتى اتاكد ماكو احد ملاحكني مثل ما لزمتني البارحة هاي الجنية رغد مدري شيطلعها بالليل تفتر
صفنت شوية مثلي يعني ضحكت على نفسي من اللي دا اگوله...
مشيت بعد ما اتأكدت انو محد وراي حاولت احفظ المكان البارحة لمن طلعت اني وغيث لان طلعنا هم بالليل ولگيت مكان نلتقي بي بس يكون امان ان شاء الله ...
دست على الزر الموجود بجهاز تحديد المواقع بعد ما وصلت للمكان هو بعيد شوية عن البيوت بين الشجر
ضليت انتظر تقريبا ثلث ساعة او اكثر
فجأة سمعت صوت شي ديتحرك طلعت سلاحي من الجنطة وسحبت اقسام تحسبا الأي طارئ واختبيت خلف وحدة من الاشجار
اني وواكفة سمعت حركة خلف ظهري رفعت سلاحي ودرت وجهي موجهة السلاحة علي
... وهو ينزل اللفاف من وجهة هاي اني شبيج
نار: نقيب سجاد خفت اكون انكشفت
نقيب سجاد: لا تخافين انتي سبعة وگدها بعدين خوش مكان لاكية
نار: حتى ولو الحذر واجب
سجاد : شلونج
نار: شلون راح اكون واني بنص اعدائي احس اللكمة وياهم سم ودائما دا احاول اتهرب من الگعدة وياهم بس همة عدهم قوانين واحكام
سجاد: هالمجرمين ذولة هم يعرفون قوانين
نار : شمدريني عوفك منهم باوع هاي تسجيلات من داخل مكتب الشيخ وبيها حديث مع شخص ما عرفته منو بالضبط بس شاكة انه علي يصير ابن بنته وحسب اللي فهمتة هو اللي مستلم ادارة الشغل من هالناحية
سجاد : خوش حجي زين هذا الحديث شنو دار بي
نار : اكو شحنة راح يدزوها هاليومين وهذي الشحنة چبيرة ومحتاجة شخص يكون گدها
سجاد : الفهد ماكو غيرة مو
نار بتفاجئ : تعرفه
سجاد : للاسف لا اعرف اسمه الحقيقي ولا شكله بس كل اللي اعرفه انه شخص مهم كلش واغلب الصفقات الجبيرة هو يكون متواجد بيها ومسؤل عنها واكثر من مرة حاولنا نلقي القبض عليه بعد ما يكون بينّا وبينه شعرة يفلت من عدنا ولهذا سمو الفهد
نار : شعجب مگتلي علي اني سمعت باسمه من الشيخ اتصل بي حتى يستعجلة يخلص شغلة ويجي لان هاي الصفقة مهمه وحجى مثل اللي حجيته انه الوحيد اللي يگدر على هيج مهمة
سجاد : اتوقعت ، زين معقولة ما كدرتي تعرفين اسمه عالاقل
نار: لا والله للاسف مع انو خليت وحده من بناتهم تحجيلي عن العائلة كلها وهذا الفلاش بي اسمائهم واولادهم كلشي بالتفصيل عدا واحد
سجاد : منو
نار : لمن جانت دتحجي عن الابن الچبير للشيخ كالت انه مات قبل اكثر من عشرين سنة بحادث هو ومرته ولمن سألتها ما عنده جهال جانت راح تجاوبني بس قاطعنا مازن واحد حشري مدخل راسه الجبير بكلشي
سجاد بضحكة : ادري دفجري راسه مادام مضوجج هيج بهذا المسدس اللي بس شاطرة ترفعي عليه
رفعت حاجبي واني اجاوبه : ترة متضحك ومو اني اللي ارفع سلاحي على ياهو الجان
سجاد : بوية سبعة هي گوه خوما گوه
نار بابتسامة خبث : بعد وكت ،
المهم اني راح احاول اعرف منو هذا الفهد لحظة نسيت شغلة كلش مهمة
سجاد باهتمام : شنو
نار: هذا الفلاش بي صور اخذتها للمكان اللي يزرعون بي المخدرات طبعا يادوب حصلتلي چم لقطة واعرف مو كلش واضحين لان لزمني الحارس دا اصور واتوقعت راح ياخذ الكاميرا ويمسح الصور لان الصور مباشرة عالنبات فدبرتها وحفظت الصور يمي قبل ما يحذفهم
سجاد : ولو ما اعرف شلون لحكتي تحفظيهم بس عفيه عليج كلش راح يفيدونا بالقضية حتى نحصل على اذن من النيابة بالهجوم و القبض عليهم
نار بغرور: هاي سر المهنة سيدي
سجاد : كافيج غرور نار وركزي على شغلج وانتبهي على نفسج كلش زين و لا تتهاونين ابد ترة ذوله كلش خطرين
نار : ادري لا تشيل همي اني اعرف شلون احمي نفسي يالله اني رايحة لان تأخرت
سجاد : الله وياج ومثل ما وصيتج
نار: لا تشيل هم مع السلامة
كلتها ومشيت من يمة راجعة للبيت دخلت بهدوء للبيت ومشيت من يم الصالة بس سمعت حركة ركضت عالسريع وصرت ورا الباب حاولت اكتم صوت انفاسي العالي من التوتر اخر شي خليت ايدي على حلكي من سمعت صوت رغد هاي بس تفرفر بالليل !!
رغد : الله يخليك بس اسمعني ليش مدتنطيني مجال والله اني احبك
... رغد خلص كافي رجعي الغرفتج ولا تجين يمي
هذا صوت منو اي هذا صوت عمار و مسوية نفسج عود ماكو منج طلعتي تفترين ورا الزلم بالليالي
رغد : شنو ما اجي يمك عمار المصيبة اللي سويناها لازم تتحمل مسؤليتها انت هم مو بس اني اللي غلطت
عمار : شنو شكلتي حبي اني مو غلطان انتي اللي سلمتيني نفسج وكلشي صار برضاج انتي ما جبرتج
على شي اني
رغد وهي تبجي : تعرف انت احقر شخص شايفتة بحياتي وماعندك ذرة رجولة
لزمها من شعرها قوي صرخت من الوجع فسد حلكها بايده وهو يكوللها
رغد: احترمي نفسج ولا تخليني انهيج ساكتلج بمزاجي ترة اذا احطج براسي اخليج تتمنين الموت وما تلكيه
دفعها وهو يكوللها : يلا ولي منا ما اريد اشوف جهرتج
YOU ARE READING
نيران غياهب الانتقام
Actionانا تلك هي... انا تلك المحاربة التي مهما واجهت ستستمر لن تتوقف ولن تستسلم لن تحني رأسها ، انا تلك هي الأنثى التي تخشى الحب وتبحث عنه انا تلك التي تبحث عن سفينة النجاة في منتصف بحر أحلامها العميق والواسع وتؤمن أنها ستجد تلك السفينة مهما طال الزمن...
