نيران غياهب الانتقام

البارت الخامس عشر

وُجُوهُكُم أَقنِعَةٌ بَالِغة المُرُونَة
طِلاؤُها حَصَافَةٌ، وَ قَعرُهَا رُعُونَة
صَفَّقَ إِبلِيسٌ لَهَا مُندَهِشًا، وَ بَاعَكُم فُنُونَه
وَ قَال : إِنِّي رَاحِلٌ، مَا عَادَ لِي دَورٌ هُنَا، دَورِي أَنَا أَنتُم سَتَلعَبُونَه
وَ دَارَت الأَدوَارُ فَوقَ أَوجُهٍ قَاسِيَةٍ، تُعَدِّلُهَا مِن تَحتِكُم لُيُونَة ،
فَكُلَّما نَامَ العَدُوُّ بَينَكُم رُحتم تَقرَعُونَه ،
لكنكم تُجرُون ألف قُرعةٍ لِمَن يَنام دُونَه

-احمد مطر

البارت الخامس عشر
ليلى محمد
نيران غياهب الانتقام ❤️

نار : وسومي انطيني تفاحة
حچتها بطفولة ونبرة بريئة ما تعرف من حقد الدنيا شي
وسام بحنان : يروح وسومي لچ انتي تفاح شتسوين بالتفاح
گرصها من خدودها بعد ما انطاها تفاحة
نار : وهسة شنو ما راح نلعب
وسام : شتردين نلعب گولي
نار بتفكير : اممم نلعب سباق ركض
وسام بابتسامة : تدلل نارة گلبي
وگفو اثنينهم باستعداد حتى يركضون
المكان عبارة عن مزرعة چبيرة الجو حلو صوت العصافير واشعة الشمس مالية المكان سعادتهم چانت ضايفة جمال الهلصورة المثالية
گامو يركضون وهي تركض وتضحك
نار بصياح وهي تضحك : باوع وسومي راح افوز عليك شگد بطيء انت

اختفت ابتسامتها لمن محد رد عليها وگفت ودارت وجهها ماكو احد واگفة بوحدها بهالمكان الواسع فجأة
الشمس اختفت غطتها غيم سودا
لفت انتباهها قطرة مي نزلت على ايدها رفعت راسها وباوعت للسما بدت قطرات المطر تزيد عصفت ريح قوية

نزلت دموعها وبدا الخوف يتسرب داخل روحها
باوعت بكل الجهات وگامت تصيح باسمة بس ماكو رد
المكان صار ظلمة

فجأة شافت ضو خافت من بعيد ركضت عليه بلهفة
تصنمت بمكانها من شافت وسام چان مضروب وكل مكان بجسمة دينزف

اقتربت منه بخوف بس ابتعد عنها

نار : شبيك وسام ليش هيچ صاير بيك
باوعلها بنظرة تعب وحزن الارهاق چان ظاهر على وجهة ابتعد اكثر واكثر ضلت تصيح علية وتركض ورا بسرعة  و العاصفة ازدادت وگعت عالارض رجعت گامت وكملت ركض باتجاهة

نار : وساااااام
گالتها بصوت عالي وهي تفتح عيونها على وسعهم بخوف قبل ما تستوعب المكان اللي هي بي

باوعت على ايديها مربطين بالكرسي حاولت تتحرك ما گدرت

انتبهت على رجليها هم مربطين باوعت عالمكان هو نفسة المخزن مبين انه النهار طلع ديدخل ضو خفيف من الشباك الصغير الموجود

صوت نفسها عالي وكأنو چانت دتركض بالحقيقة مو بالحلم دايخة والدم يابس على وجهها وراسها
مبين من ضربها وگعت على شي حاد ضرب راسها

غمضت عيونها بتعب وهي تسترجع اللي صار البارحة وشلون فشلت الخطة وصارت بأيديهم راح يكتلوها بلا رحمة