نيران غياهب الانتقام

البارت السابع

-اين نحن الان ؟
- في القاع
-جيد على الاقل لن نسقط مرة ثانية ..💔
- دوستويفسكي

البارت السابع
نيران غياهب الانتقام
ليلى محمد💜💜

خطواته متجهة ناحية المكتب دگات گلبي بديت اسمعها من التوتر اذا شافني راح انهي كلشي باللي حصلت علي بس يكون اطلع سالمة من هالمكان
دخلت جوا المكتب بعد ما اجه يدور على ورق عالمكتب ، اخذ اللي يريدة واندار ديمشي وگعت ورقة من عالمكتب قطعت انفاسي وغمضت عيوني بقوة عرفت راح ينزل يجيبها
بس قبل ما ينزل ديلزمها انفتح الباب
غيث: شيخ رايديك بالديوان
الشيخ : منو رايدني
غيث : العقيد دز عليك يمكن عنده شي
الشيخ : ماشي جاي
ترك الورقة واخذ اللي يريدة وطلع من المكان ، جريت انفاسي براحة جان رحت بيها لولا غيث ...
طلعت من المكتب كله بعد ما انتظرت خمس دقايق يهدأ الوضع وبعدها فتحت الباب بهدوء وطلعت عالدرج الغرفتي عالسريع ...
دخلت للغرفة وانفاسي تلهث چنت راح انكشف لوما غيث اجه وصيحه لازم اكون حذره اكثر ، تأفأفت بانزعاج لان كلشي ما استفدت من هالمغامرة كلها صوت الباب طلعني من افكاري
نار : تفضل منو
دخل طفل صغير شايل بيدة علاگة سودة
نار: ياا هاي شنو
الطفل : هاي الج
ومد ايده انطانياها
نار: زي من منو هاي
الطفل : من عمو غيث وگال لا تطلعين من الغرفة
باوعتله باستغراب عاللي حچاه
رجعت باوعتلة بابتسامة مصطنعة : ماشي حبيبي
فتحت العلاگك اشوف شبيها بعد ما طلع من الغرفة لگيت لفتين گص وقوطية ببسي هاي جايبلي غدا كلها حتى لا اطلع واشوف سوالفهم ابتسمت باستهزاء على تفكيره .
ضليت بالغرفة ما طلعت ما راح استفاد شي من طلعتي ولازم ادبرلي غير طريقة اعرف بيها وقت ومكان بيع البضاعة
اتذكرت الحجي اللي سمعته واللي كاله عمار عن سجاد لازم اتصل بي واحذره ما اريد بعد خسائر كافي اللي خسرته  ، طلعت موبايلي اتصل بي طبعا هذا مخبيتة عندي لان اني گايلتلهم موبايلي مكسور
دگيت على سجاد ضل يرن بس ماكو رد مو وكت شغلك هسة رجعت دكيت علي مرة اللخ فتح
نار بهمس : واخيرا هاي وينك
سجاد : بيچ شي حجاها بخوف
نار : لا ما بيه بس اتصلت عليك حتى احذرك
سجاد باستغراب مبين من صوته : من شنو
نار : اليوم عرفت شلون ديعبرون البضاعة بدون محد يلزمهم ومنو اللي واگف بظهرهم
سجاد :منو
نار :العقيد جاسر وشيخ حمد شيخ عشيرة ال** وچم ضابط هم رتبهم عالية بس انت تعرف ذوله كلهم ما يطلعون باهمية العقيد جاسر لان هو المسؤول عن السيطرات الامنية بهالمناطق
سجاد بذهول : الخاين واني اكول ليش هيج مخترقين وشنسوي عالفاضي طلعوا الخونة كاعدين بنصنا والله لنعلگهم كلهم ذولة السفلة
نار: بس سجاد دير بالك ترا العقيد طلع يعرفك وانطاهم اسمك وحذرهم منك وهنانة الجماعة ناويين الشر الك
سجاد : لا تخافين ما يصير الا اللي كاتبه الله اصلا انتي اللي بخطر ولازم تحذرين لا تنسين انتي بنصهم بنص هالمستنقع
جريت انفاسي بقوة واني اجاوبه : لا تشيل همي اني مايعرفوني بس انت اللي عرفوك فلا تتهاون بهالمسأله
يلا اني راح اسدة هسة
سجاد : حاولي ما تكطعين مدة طويله ضلي على تواصل وياي
نار : ان شاء الله مع السلامة
سجاد : الله وياچ
سديت الموبايل واني ابتسم بقلة حيله دتحذريني من شنو ،عنيدة شكد ردت اقنعچ ما تروحين بس ما قبلتي دطمنيني وانتي بوسط النار يا نار گلبي ...
العصر
نزلت جوا چانو گاعدين بالصالة مبين خلصت العزيمة مالتهم دخلت سلمت عليهم وگعدت
نهال : ما شفناج اليوم حتى ما اتغديتي ويانه
باوعتلها وابتسمت : اني من اشتغل ما احب اكل الوقت كله يصير الشغلي حجيتها واني اباوع الغيث
ابتسم على كلامي
خالد : المحاصيل صارت جاهزة شيخ يمتى ما تأمر ننزلها عالسوگ
الشيخ :  زين اتفقو مع التجار وخل تنزل هالكم يوم هذا وكتها واستعجلوا مو زين تضل مدة طويلة
الحجية : خالد لتنسى تدزلنا منها مادامكم كملتوها ليش مدزيتو شي
خالد : والله ييمة چنا ملتهيين بفد سالفة
باوعلة الشيخ بتحذير مبين انه جان راح يحجي شي واشرله يسكت اعتقد لاني كاعدة لان بعدها البنات باوعولي
الشيخ : محلولة حجية باجر يوصلج التردي
الحجية : ما تقصر ابو جمال
الكل باوعولها عاللي گالته مستغربين ابتسمت باستهزاء على ردة فعلهم مبين انو ناسيين عدهم ابن ميت وملتهيين شلون ينشرون سمهم ، استمرو يسولفون سوالف ما الها معنى مبين عليه ضجت لان گاعدة واصفن انتبهت على غيث ديأشرلي وبعدها گام من مكانه كمت اني هم ورا بدون محد ينتبه شفته طلع عالحديقة الخلفية طلعت ورا ومشيت شوية ملگيته وين راح
غيث : على شنو ديدور الحلو
درت راسي علي بابتسامة : عليك انت ليش اشرتلي
غيث بابتسامة هادئة: شفتج ضايجة من الكعدة وبيني وبينج اقترب مني وهو يكول بهمس
اني هم ضجت سوالفهم تقصر العمر ما بيها نفع
ضحكت على حچي ما يصدگ يلگي فرصة يحجي عليهم : انت ليش هيج تضوج منهم او الاصح تكرههم
اختفت ابتسامتة من سألته هالسؤال رجع جاوبني بعد دقيقة من بعد ما أيست انو يجاوب سؤالي  : خسروني اغلى شي عندي وحرموني منه ما اهتمو لا المشاعري ولا الاي شي اهم شي مصالحهم مستعدين ينهون اي واحد ممكن يضرهم
نار : الهلدرجة سيئين
غيث : اكثر من ما تتصورين كتلج قبل الاحسن ما تعرفين كملي شغلج وروحي
نار: وانت
باوعلي متفاجئ : اني شبيه
نار بتردد: اا يعني راح تضل هيج ليش ما تعوفهم
غيث : وين اروح
نار : تعال البغداد هناك  تكدر تشتغل عندك اختصاص زين واگعد بشقة حلوة بعيدة عنهم 
غيث : ببحدي
باوعتلة باستفهام عن قصده
غيث : يعني اعيش وحيد
نار : ليش وحيد داوم هناك واتعرف على اصدقاء ويمكن تشوفلك وحدة حلوة تعجبك وتعجبها حجيتها بغمزة
باوعلي بنظرة مليانه قهر وهم يگول بنفي: مستحيل
نار: شنو هو المستحيل
غيث مغير الموضوع : شلون الشاورما الدزيتها عجبتج
باوعت علي بيأس مبين انه محبط وما عنده القدرة يغير حياته
نار: اي طيبة عاشت ايدك
اتمشينا بالحديقة چان الجو حلو مو كلش حار والهوا منعش يرد الروح
غيث : تشربين عصير؟
قطع افكاري سؤاله  
نار بضحكة : شجاب ببالك العصير
غيث: اليوم سوو عصير بطيخ كلش چان طيب اشتهيته الچ
ابتسمت بتوتر على كلامة : ما اريد اتعبك
غيث بابتسامة حنونة : لا تعب ولا شي انتظريني شوية
وگفت انتظرة واني اتأمل المكان بهدوء بس فجأة شعرت بحركة وراي بين الشجر درت راسي باوعت وكأنو ظل شخص اختفى تقدمت من المكان اللي طلع منه الصوت غريب ماكو احد بس اني متأكدة اني سمعت شي و شفت شخص منو يا ترا ...
غيث : نار
فزيت على صوت غيث
غيث بتفاجئ : شبيچ
نار بابتسامة وارتباك : لا تشغل بالك اا جبتة
غيث : شنو
اشرت على ايده ، باوع للمكان اللي أشرت عليها وضحك
غيث : اعذريني اتفضلي
نار : مشكور
هز راسه وگعدنا نشرب
غيث : تعرفين
باوعتلة منتظرته يكمل وگف وباوعلي : عطرج كلش حلو
انصدمت من اللي گاله ما اتوقعت هالجرأة منه
ابتسم وكمل مشي : اعتذر مو قصدي اضوجج او اتحرش مثل مازن الكلب
ضحكت عاللي حچاه رجع كمل
غيث : تدرين اني بحياتي حبيت عطر واحد وما اتوقعت راح يعجبني غيره انتي ثاني عطر يعجبني
نار بخجل واني انزل راسي : كلامك حلو رجعت باوعتلة بس بما اني الثاني منو الاول
ضحك وهو يجاوبني : انتي فعلا يلوگلج شغل الصحافة شكد فضولية الخاطر الله
حجيت بطفولية واني اضرب رجلي بالگاع : مو فضولية بس انت تحجي نص جملة وما تكملها تگول املأ الفراغ
ضحك بصوت عالي على منظري: دمشي نارة والله ما يلوگلج اكولج نار بهذا منظرج
اختفت ابتسامتي ونزلت راسي بقهر من سماني هيچ ما اريد غيره يسميني بي بس هو
غيث : شبيج
نار: لا تصيحني نارة اسمي نار وبس عن اذنك
غيث بتفاجئ من ردة فعلي : ااني ما قصدي ازعجچ بعدين وين رايحة مو دنسولف
نار : لا كافي هيج راح اطلع الغرفتي
غيث : لا يكون زعلتي مني
هزيت راسي بابتسامة هادئة : لا ما زعلت بس اني مرات اصير حساسة زايد عن اللزوم احنا البنات هيج حجيتها وضحكت بچذب ابتسم على حجيّ
غيث : ماشي ما راح اجبرج بس اريد اكلج شي
نار باهتمام : شنو
غيث : صارلي سنين ما مرتاح مع شخص وحاچي ويا صارلي زمان ما ضحكت من كلبي بيومين غيرتي هواي اشياء بحياتي الكئيبة
نار: غيث انت اللي اخترت هذي الحياة وتذكر دائما تگدر تغيرها دائما اكو فرصة لا تنسى هذا الشي
باوعلي وحسيت بعيونة دمعة دار وجهة حتى لا اشوفها
نفخت انفاسي بقهر اثنينا ورانه قصة مؤلمة واثنينا منگدر نحچيها وضالة بگلبنا تجرح ...
دخلت للبيت لاگتني سمر : هاي وين چنتي دورت عليج
نار: برا تمشيت شوية ليش تردين شي
سمر : اي تعالي نسولف شوية وهم تساعدينا باختيار ملابس الهبة
نار : ليش شعدها هبة
سمر: راح يجون ناس يخطبوها ومحتارة شتلبس
نار بابتسامة : ومنو سعيد الحظ
ضحكت وهي تلزمني من ايدي وطلعتني الغرفتهم : مدري والله ناس منعرفهم ومو متأكدين جدي يوافق بس هي راح تتحضر ونشوف
دخلت للغرفة جانت هبة واكفة ومبين محتارة الغرفة مليانة ملابس مطشرة عالتخت وهارجين الدنيا
نار : هاي شمسوين
هبة : تعالي نار حبابة ساعديني مدري شلبس
باوعتلها بنص عين : مبين متعرفي للعريس ابد
باوعتلي متفاجئة وركضت سدت الباب
هبة : لج هش لا يسمعونا شبيج بعدين منين تعرفين
نار : ما اعرف شي بس تصرفاتج ولمعة عيونج حچت كلشي لا تخافين ما اگول الاحد والله يتممها عليج تعاي نشوفلج شي حلو
هبة بابتسامة : ان شاء الله
گعدت معاهم نختار اخر شي ثبتت على فستان طويل لونه وردي فاتح كلش نازك والاكسسوارات ويا ، گاعدين نختار بالمكياج وگلت خل استغل الفرصة
نار: بنات
باوعولي اثنينهم بتساؤل
نار: شنو سالفة غيث ليش هيج دائما على خلاف ويه الشيخ
وحدة باوعت للثانية بتوتر من الشي اللي گلته مبين اكو سالفة چبيرة لازم اعرفها حتى استغلها الصالحي
سمر : ماكو شي هو لان دارس برا ومو متعود على اطباعنا
نار: بس مبين غير شي
هبة : نار مو صح انچ تعرفين كلشي اكو اشياء اذا متعرفيها احسن ونصيحة مني ابتعدي عن غيث
نار : ليش يعني وبعدين اني ممسوية شي غلط
سمر: اعرف حبي وهبة مو قصدها شي بس غيث مثل القنبلة الموقوتة لا تثقين بي هواي للامان
نار : اني ما انطيته ثقتي كلها بس سوالف عادية لا اكثر ولا اقل بس براحتكم لا تگولون شي عن اذنكم
گمت واني امثل الانزعاج بس قبل ما اطلع من الغرفة گامو اثنينهم عليه
سمر : شبيج نار لا تضوجين
نار : ما ضجت لا تشيلين هم
هبة : مبين زعلتي هم مو بس ضجتي دتعالي گعدي يلا
لزموني من ايدي وجروني للتخت گعدنا وحجت سمر:
باعي جدي مسوي شي كلش سيء الغيث وكلنا نعرف انو هو اللي سواها بس محد يگدر يحجي شي وغيث بوگتها كلش اتأذى من اللي صار وضل فترة طويله بغرفته ما يحچي ويا احد ولا ياكل ولا يشرب فاحنا ما نحجي بالسالفة لان ممنوع وحتى لا يتذكر غيث
هبة : اي لان فعلا من ينذكر اي شي عن الموضوع غيث يتحول الى وحش يكسر ويصيح ويهجم البيت على روسنا
نار: شنو اللي مسوي جدكم وموصلة الهاي المرحلة
هبة : ما نگدر نگولج التفاصيل بس جدي أذى شخص عزيز على غيث اذاه هواي ...
نار : شنو اللي يخلي جدچ يأذي هالشخص
سمر : الفضول
باوعتلها بصدمة من جوابها بالمعنى اكو شخص چان عايش هنا شخص فضولي ومن عرف اللي ديصير هنا ما گدر يسكت بالتهديد هاي اذا هددوا !!
سكتو للابد مبين انو مو بس اني الضحية هنا اكو غيري هواي
هبة : عوفچ من هالسالفة اليوم راح تتعشين ويانه مو
نار :ااي ان شاء الله
سمر بابتسامة وهي تحاول تشد انتباهي بعيد عن سالفة غيث : اليوم ام ياسين اجت وسوت اصناف تخبل للعشاء اكيد راح يعجبج
ابتسمت بتصنع على كلامها واني اجاوبها : ماشي لعد اليوم نضوگ اكل ام ياسين
كمت من مكاني : يلا اني رايحة عن اذنكم
هبة : وين رايحة مو متونسين
نار : لا عندي كم شغلة اكملها قبل العشا
هبة : ماشي براحتچ

طلعت من الغرفة واني افكر بالموضوع شنو اللي مسوي ضياء الدين الغيث وموصله الهاي المرحلة وليش الكل يخاف حتى يحچي بالموضوع بهالحالة غيث اكيد عنده ثار ويا جده والكل متوقع هذا الشي بس هو ليش ساكت لحد هسة وشكد صارلها هالحادثة ...

يتبع ....

آرائكم 💛

وگروبي عالفيس اللي يريد يدخل بي الرابط موجود بالبايو مال صفحتي عالواتباد 💚💚

لا تنسون اللايك 💜💜
ومتابعة للصفحة 💜💜💜