نيران غياهب الانتقام

البارت السادس عشر

رديِت وجدامِي تخُط حِيره ونَدم
رديِت وعيُوني تخُط گبل القَلم
رديِت لحچاياتنَه العايزهَا بَس چِلمة صدُگ
وعيونَه الحَلمانه بالقُداح لو مَره يطُگ
رديِت عالبيّبان باب اباب ادِگ
ردِيت.. وشرَديت لا موعِد ولا چِلمة نَعم
ردِيت وجدامِي تخُط ردِيت وعيُوني تخُط .

البارت السادس عشر
نيران غياهب الانتقام 💔
ليلى محمد

ناديا : هشام وين رايح وتاركني وحدي هيچ
اقترب منها وباس راسها بحنية رجع لزم ايدها وباسها

- يا روح هشام عندي كم شغلة نسيتها بالمحل ودزيت على اكرم هم يساعدني حتى ما اطول

بقلق : بس والله مو مرتاحة الروحتك اجلها الباچر يعني الدنيا ليل مو مضطر تروح بالليل هذا

- اي بس بعد وكت والسوك هسة مفتوح وما اگدر أأجلها باچر نطلعچ من المستشفى وراح انشغل باجراءات الخروج وهالسوالف خلي اگضيها اليوم
جاوبتة وهي مجبورة : ماشي براحتك

ابتسملها وراح ناحية بنيته شالها وباسها وضل مدة مو قليلة حاضنها يشم بيها
- تدرين احس ريحتها من الجنة

ابتسمت بحب على كلامة وحنيتة شگد حنين : الله يحفظلكياها وتكبر بعزك وتشوفها عروس
اختفت ابتسامتة وگاللها بانزعاج : عروس شنو بنتي ما انطيها اخليها على گلبي متربعة العمر كله

سكت شوية
- شنو ليش سكتت
حچه بتنهيدة : اذا الله انطاني عمر
-ليش دتحچي هيچ هشام هاي شبيك
ابتسم بصعوبة : مبيه شي حبيبتي يلا رايح اني ديري بالچ عالاولاد

باوع الوسام اللي چان نايم تعبان گضه اليوم كله يلعب ويه اخته مبين انو وسام ورث الحنية من ابوه .

طلع من المستشفى وگف تكسي وركب بي رايح للمحل مالته

هشام عندة محل كهربائيات من چان طالب بالكلية يدرس اشترة هذا المحل بعد ما چان يشتغل عمالة
واكثر شي چان شغلة بتأسيس الكهرباء والسوالف اللي تخصها لهذا السبب لمن صار عندة فلوس فتح محل كهربائيات

هشام چان يتيم معنده اهل لهذا اضطر انو يعتمد على نفسة من صغره عكس صديقة وصاحبة جمال اللي چان ابن شيخ وعائلتة كلش واصلة وعدهم فلوس واملاك بس بالرغم من هذا الشي جمال چان دائما ويا ويطلعون يشتغلون سوا ومرات يجي يساعدة بالمحل بس ابو ميقبل يفتح محل دائما چان يستغرب من هذا الشي يعني هو مو مضطر يشتغل ابو مگعدة باحسن بيت و راكب احسن سيارة

بس ما بيوم من الايام اتوقع انو هاي الفلوس هي فلوس حرام واساسها أذية الشباب والمجتمع كله مچان يتوقع انو صاحبة اللي ماكو مثلة بالاخلاق والدين يطلعون اهله هيچ وگتها اتفهم صاحبة ورفضة الفلوس ابو

- هنا تنزل ؟
سؤال سايق التكسي طلعة من افكاره گضة الطريق سرحان بالوضع اللي وصله من وراهم
- اي هنا مشكور
نزل من السيارة بعد ما انطا الكروة