نيران غياهب الانتقام

البارت الثامن

لا أُريدكِ ان تنخدعين بإِلواني تلك
أنا رَمادي تماماً
أتلون فقط عِندما تنظرين بِعيّنيّكِ ليّ ...🤍🤍

البارت الثامن
ليلى محمد
نيران غياهب الانتقام ..🖤

بارت طويل لعيونكم 😊💚💚

دگ باب البيت اللي يم بيتها طلع صاحب البيت
- تفضل منو حضرتك
مد ايده يسلم علي وهو يعرف عن نفسه
- اني غسان اصير گرايب بنية چانت گاعدة هنا بهذا البيت اللي يمكم ما تعرف وينها صارلي كم يوم اجي ادگ الباب محد يطلعلي
- هاي البنية شايلة من هنا صارلها فترة انت شتريد منها
غسان : اني اصير گرايبها من بعيد چنت محتاج واخذت منها سلفة وعلى اساس ارجعها الها بس هاي كل ما اجي مدا الگاها
- والله ما اعرف عنها شي هي چانت بحالها تروح وترجع اعتقد طالبة كلية لان چانت تروح وترجع بخط طالبات جامعة بس شالت من فترة
غسان : زين هذا الخط ما تعرفه بلكي عنده رقمها
- شعجب ما عندك رقمها وهي گرايبك
غسان بتردد : ااستحيت اخذه تعرف بنية واني اصلا كلش چنت خجلان من اخذت منها وما صدگت اجمع الفلوس الاخذتها حتى اردلياها
- حقك خوية بس والله اعذرني ما نندلها لان هي مچانت تختلط هواي مع الجيران فمحد يعرف عنها شي
غسان : ماشي مشكور تعبتك وياي
- هلا بيك
مشى من يم الباب راجع السيارته بس صوت الرجال وگفه
-خوية
دار وجهة عليه وجاوبة
غسان : شنو
- يمكن تذكرت شغلة الخط مالتها چان صديق ابو الاسواق اللي براس الفرع هو دبر الخط للطالبات بوگتها روح علي بلكي يگدر يساعدك
غسان بفرح : مشكور ما قصرت
وصل للاسواق ودخل
غسان : السلام عليكم
-وعليكم السلام
غسان : اني جايك بطلب خوية
- عد عيناك تفضل
غسان : اني اصير گرايب بنية چانت گاعدة هنا بهذا الفرع وهاي صار فترة اجي يم بيتها اضل ادك الباب محد يطلعلي
- منو تقصد شسمها وين گاعدة
غسان : اسمها نار چانت گاعدة بهذا البيت ، اشرلة علي
-اي اي عرفتها شلون ما اعرفها شبيها شرايد منها
غسان : والله عندي امانة الها
- بس اللي اعرفه هي شايلة صارلها مدة مو قليلة
عسان : ادري گاللي صاحب البيت اللي يمها بس گال انت دبرتلها الخط و يصير صديقك
- اي صح بوكتها اجت عليه سألتني اذا چان اكو خط طالبات جامعة هنا بالمنطقة ودليتها على صديقي
غسان : زين ما تگدر تحصلي صديقك بلكي عنده رقمها اريد اتصل بيها
- ادلل هسة اخابرة
اتصل بي وحچى ويا غسان وابو الخط ما قصر انطاه رقمها و الجامعة اللي درست بيها ، اتشكر من ابو المحل وسلم علي وطلع
غسان وهو يگعد بالسيارة : واخيراً بعد التعب وصلت الرقمها
اتصل هواي على رقمها ومثل ما اتوقع مغلق
غسان : مو مشكلة هسة نروح نسأل عنها بكليتها
شغل السيارة وانطلق الجامعة بغداد
غسان : عفواً بس العمادة شلون اندلها
- من هناك خوية
غسان : مشكور
دخل على غرفة من الغرف وسأل موظف هناك
غسان : اريد اسأل عن طالبة هنا چانت تداوم
- خلص الدوام تعال باچر
غسان : واذا انطيتك هالمبلغ
باوع للفلوس اللي بايدة ورجع باعله وهو يگول
-تخرجت لو بعدها وشسمها
غسان : تخرجت اسمها نار سليمان ايوب
- ما تعرف من اي دفعة متخرجة
غسان : لا ما اعرف بس هي يا ذيچ السنة يا القبلها
- باوعلة بتردد قبل ما يگوله انتظرني برة
انتظر برة نص ساعة وبعدها طلعله
غسان : ها شصار .....