نيران غياهب الانتقام

البارت العشرين

چنت اسكت
و تگلي السكته حافظها
و اجذبك والمصيبة
ادريك حافظني ..
و هسه احچيلك البيه
و تردلي بكلمة المدري
يولفي شغيرك عني؟

البارت العشرين
نيران غياهب الانتقام
ليلى محمد

نار بصياح : جدك حرگ ابوية
وگف بصدمة يباوعلي ممستوعب اللي دا احچي : ششلون
نار بصياح والدموع تتسابق على خدودها: لك ابوية رماااد حتى جثة ما اله
اتقدم مني وحاول يلزم ايدي حتى يهديني دفعتة بعصبية
- لا تلمسني لا تمد ايدك علية واني اللي چنت حاسبتك مو وياهم وكارههم من ورا شغلهم
باوعتلة بحدة گلت انت مو مثلهم صحيح ابنهم بس الشوك الا ما يخلف ورد مو معقولة يكون دمهم فاسد الهلدرجة
غيث : اني مو هيچ والله مو هيچ
نار بقهر : ابوية ضحى بعائلتة وحياتة حتى لا يسكت عالظلم وانت
باوعتلة بكره انت اشتغلت وياهم حتى تتزوج حبيبتك

عيونة حمر وايدي گامت ترجف : لا تصيرين قاسية كافي علية ضميري
ابتسمت باستهزاء : ليش عندك ضمير
غيث بتوسل : نار لا تحچين هيچ
نار ببرود : تعرف شغلة الفهد المجرم اللي شكلة شكل السفاحين احسن منك
باوعلي بقهر وصدمة

نار : اي لتباوعلي هيچ هو مچذب علية متلون بلون غير لونة انت مو بس مجرم چذاب ومحتال هم

لزمت صدري بوجع وگحيت بقوة حسيت روحي راح تطلع من جسمي بهاللحظة اليأس تملك كل خلية بجسمي اني وين عايشة شهالعالم القاسي التالي ويا الحياة ما راح ترحمني ما راح يجي يوم ارتاح بي
وگعت عالارض وبچيت بكل الم وقهر حسيت بالغدر الدنيا غدرتني مرة اللخ
نار : اااااه
صحت بقهر واني اتمنى الموت بدال مگاعدة ويا مجرم تيتمت وعشت بعذاب بس حتى يتعاقبون والتالي شنو خسارة بخسارة
ضرب الحايط بقوة اعرف انو اللي سوا مو برضاتة بس ما اگدر اتقبلة احنا مستعدين نموت ولا كرامتنا وانسانيتنا اتوقعتة هيچ لمن اجة وضحى بحياتة متوقعت انة مثلهم وديسوي هذا الشي حتى يرضي ضميرة براسي

مسحت دموعي وگمت بتعب واني اتنفس بصعوبة جسمي كلة ديوجعني مشيت طالعة من الغرفة ما اريد اضل هنا ما اريد اشوف واحد منهم
اللي شفتة كلش كافي من هالعائلة مضل عندي قدرة اتحمل اكثر من هيچ
وصلت الباب ردت افتحة اجاني صوتة خلفي
غيث : وين رايحة
نار ببرود : على مكان ما بي مجرمين ما بي قتلة وتجار مخدرات ما بي ناس باعو ضميرهم

اجة يمي خلة ايدة عالباب باوع بعيوني بنظرة ندم اخترقت اعماقي
غيث : انطيني فرصة
- معندي هذي القدرة تعبت غيث تعبت
غيث : ادري وعيونچ ادري واني هنا هسة وياچ راح اسندچ واحميچ وادافع عنچ حتى لو كلف هذا الشي حياتي
نار بهمس : ما اگدر اثق بيك
حط ايدة على راسي
غيث : حرارتچ مرتفعة نار مراح تگدرين تمشين خطوتين احنا بغابة وزلمهم منتشرين بكل مكان وانتي تعبانة ومريضة باعي علية
رفعت راسي وباوعتلة بتعب حسيت ديحاول يسحب تعبي وقهري ويأسي
كمل كلامة بجدية حتى لو مواثقة بية معندچ غير هالحل راح تضلين وياي الى ان اوصلچ الاهلچ وبعدها اللي تريدين تسوي اني حاضر بلغي عني اقتليني سوي اليعجبچ اما هسة اني السبيل الوحيد الطلعتچ من هنا