نيران غياهب الانتقام

البارت الثامن عشر

لاتحزن بعد وتبجي على الراح
وعوف ادموع عينك لا تبديهة
ووكف على الجرح لاتصرخ وياه
وراح اكتب قصيدة والك اهديهة
مدينة الم روحي لاتضن ترتاح
وانه ابن المدينة وتيهت بيهة
يل عندك جرح وتكلي مجروح
انه جروحي فاضت وين اوديهة

البارت الثامن عشر
ليلى محمد
نيران غياهب الانتقام

دفع الباب بقوة ودخل للبيت بعصبية السلاح شايلة على كتفة وكأنو چان بحرب و خلفة عمار چانو گاعدين بالصالة محد نام يعرفون اكو شي ديصير بس محد يحچي شي الكل گاعد ينتظر باوعو علي چانت عيونة حمر ومعصب لدرجة محچى شي وراح مباشرة عالمكتب

-عمار ابني تعال
دار وجهة على امه
- شنو
-هاي شصاير انفجار وطلق ولازمين اسلحة شكو
- ماكو شي يمه طلعو نامو مشكلة صغيرة
خلت ايدها على على وجهة وحچت بحنية
- دير بالك على نفسك
-ماشي بس طلعو يلا كلمن على غرفتة
حچاها بأمر انتبه للشيخة گاعدة بهدوء ودتباوع علي بغموض مبين عرفت كلشي لحگ الفهد وراح للمكتب

- شيخ ملگيناها
- شلون يعني وين راحت

نزع السلاح ورماه بقوة عالكرسي
الفهد بعصبية : ما اعرف مستحيل تگدر تهرب وحدها اصلا شابعة ضرب متگدر تبتعد هواي وصارلها يومين بلا ماي وبلا اكل يعني معدها هذي القدرة

الشيخ بعصبية : لعد شنو طارت
عمار : حتى لو اكو شخص ديساعدها مراح يگدرون يطلعون من هنا عالقين كل المنافذ والحرس منتشرين بكل مكان

الشيخ : هي هنا بعدها بس وين هو هذا السؤال
الفهد بغموض : راح نخليها هي تطلع وتگول مكانها
عمار : شلون يعني
باوعلة وحچى بخبث : اريد تنشرون هذا الخبر بالقرية كلها
الشيخ بتساؤل : وشنو هالخبر
الفهد : المصورة اللي اجت احترگت بالكوخ مچانت تعرف اكو براميل نفط بالمكان ووگعت منها عودة كبريت محترگة فانفجر المكان عليها

واحد باوع للثاني بتفاجئ
الشيخ : يعني راح تربط صوت الانفجار مالت القنبلة الصوتية باحتراگ الكوخ بس ليش

الفهد : خل نشوف ردة فعل الميتين

طلع من المكتب تاركهم صافنين ومفاهمين شي بس الشيخ امر عمار انو ينفذ اللي گاله حتى لو ما يعرف السبب هو يثق بالفهد هواي ويعرف انو كلو خطوة بخطيها يفكر بيها الف مرة ،،،،

- عمة بعدج گاعدة
رفعت راسها البنت اخوها چانت گاعدة عالمصلاية تقرا قرآن من شافت ذاك الحلم لحد الان ما گدرت تغفى عينها والدمعة دوم ملازمتها خايفة من فقدانها هي الوحيدة الباقيتلها خسرت زوجها شريك حياتها ونفسها بالدنية خسرت ابنها قطعة من گلبها اذا فقدت نارين راح تموت مستحيل تگدر تعيش وتكمل حياتي نزلت دموعها وگامت تبچي للمرة الالف

ريم بحنية : شبيچ يا عمة مو طمنچ سيف وگالچ هي بخير
ناديا بقهر وهي لازمة گلبها بوجع: گلبي مو مرتاح يريمة حاسة بيها شي هشام قليل يجيني صارلة زمان مجايني وهالمرة اجه رايد ياخذها بالمعنى يعرف نارة گلبي بيها شي بس سيف مديحچي