صدمات القدر

البارت الثامن♥️

اولا بعتذر منكوا جدا ع عدم نشر البارت يوم الجمعه بسبب النت كان قاطع و كنت كتبته ولسه النت جى دلوقتى
🌺🌺🌺🌺🌺🌺🌺🌺🌺🌺🌺🌺🌺🌺
البارت التامن

اسلام روح البيت مش طايق نفسه بعد م حبيبه مشيت من المستشفى و بيفكر ازاى يكلمها او يشوفها و قطع تفكيره صوت جرس الباب استغرب مين اللى جايله دلوقتى لان هو مفيش حد بيجيله و قام فتح الباب و اتفاجأ ب حبيبته القديمه
اسلام بأندهاش: نهى! اى اللى جابك
نهى بعياط و نظره عتاب:هتسبنى واقفه كتير ع الباب ي اسلام
اسلام بارتباك:لا اتفضلى
دخلت نهى و هى بتعيط بحرقه و قعدت ع اقرب كرسى و دخل اسلام بعد مقفل الباب
اسلام:مالك ي نهى ف اى
نهى عماله تعيط و مش قادره تتكلم و شكلها مبهدل و تعبانه
اسلام:خلاص خلاص اهدى شويه عقبال م اجبلك حاجه تشربيها
هزت راسها بموافقه و دخل اسلام المطبخ مستغرب اى اللى جاب نهى هنا دلوقتى و ليه شكلها عامل كده
فلاش باك
نهى:انا اسفه جدا ي اسلام بابا مش موافق عليك و جيابلى عريس تانى
اسلام بصدمه:انتى بتقولى اى ... و انتى عادى كده ... اى حد يوقلك حاجه موافقه عليها
نهى:وانت عايزنى اعمل اى هااا رد عايزنى اعمل افضل مستنيه حضرتك عقبال متخلص دراسه و عقبال متشتغل علشان تقدر تجهز نفسك و تيجى تتقدملى تانى و انا افضل ارفض ف العرسان
اسلام:انتى فاهمه انتى بتقولى اى انتى عايزه ننهى الحب اللى مابينا علشان ابوكى مش راضى عليا
نهى راحت مسكت ايده:اسلام انا مفيش بأيدى حاجه بابا مش راضى عليك و جيابلى عريس تانى و بيقولى ده من مستوانا
اسلام شد ايده من ايد نهى ورجع بضهره:امشى ي نهى
نهى:اسمعنى بس ي اسل...
قاطعها اسلام:قولتلك قومى امشى ي نهى
نهى:ماشى ي اسلام سلام
باك
اسلام:اى بس اللى رجعك تانى
خرج اسلام من المطبخ و كان معه كوبايه لمون و شاف نهى هديت شويه
اسلام:اتفضلى اشربى ده
نهى خدت منه الكوبايه:شكرا جدا ي اسلام
اسلام:العفو على اى .... بس انتى مالك اى اللى حصل
نهى بعياط و حرقه: انا غلطت انا غلطت لما سمعت كلام بابا و سبتك انا مش عارفه ازاى عملت كده
اسلام:مش وقته الكلام ده قوليلى اى اللى حصل ل كل ده
نهى:كان طمعان فيا و فى  فلوس ابويا و بعد م استولى ع كل ده طلقنى و رمانى ف شارع بعد ما بابا مات حسبى الله فيه مكنتش متوقعه منه يعمل كده فيا
اسلام:طب اهدى ي نهى قوليلى دلوقتى اسعدك ازاى
نهى راحت مسكت ايد اسلام: انا مش عارفه سبتك ازاى ي اسلام انت كنت حب عمرى كله بس الله يسامحه بابا هو السبب و دلوقتى يعنى فرحان لما شوفت المر ده كله
اسلام شد ايده من ايديها:ملهوش لازمه الكلام ده دلوقتى انتى ست مطلقه و انا واحد قريب هيروح يتقدم لواحده هو بيحبها و عافر كتير علشانها و ان شاء الله ربنا هيكرمنى فيها
نهى بصدمه:انت بتقول اى ... انت بجد هتخطب
اسلام:اه
نهى بعياط و حرقه:مبروك ي اسلام مبروك انا فرحتلك جدا مبروك ربنا تتهنوا ب بعض  و قام وقفت :عن اذنك بقا انا همشى
اسلام:تمشى تروحى فين انتى بتهزرى انتى عارفه الساعه كام دلوقتى احنا قربنا ع الفجر ي ماما استهدى بالله كده و اقعدى لغايت الصبح و نشوف هتروحى فين
نهى:لا خلاص انا هتصرف
اسلام:مفيش الكلام اتفضلى غيرى هدومك و انا هجبلك هدوم من عندى و تباتى انهارده و هبات ف المستشفى
نهى:انت بتقول لا طبعا ده بيتك و مينفعش تخرج منه
اسلام:ي ستى انا حر اسمعى بس الكلام اللى قولته و سابها و دخل اوضته فتح الدولاب و جابلها هدوم و خرج :اتفضلى خدى دول و انا بقا همشى و ان شاء الله اجيلك بكره نكون عرفنا هنعمل اى المهم متفتحيش لحد ماشى
نهى:انا مش عارفه اشكرك ازاي بعد وقفتك دى
اسلام:ولا شكر ولا حاجه يلا سلام و فتح الباب و نزل ركب عربيته و اتحرك ع المستشفى و طلع اطمن ع المرضى بتوعه و دخل مكتبه دخلت الممرضه سعاد
سعاد:اى ي بنى اى اللى جابك ف الوقت ده
اسلام:تعالى ي ست الكل اقعدى... والله عندى ضيفه ف البيت و قولت ابات ف المستشفى انهارده علشان محرجهاش
سعاد بأستغراب:دى مين الضيفه دى ي بنى
اسلام:فاكره نهى اللى حكتلك عنها
سعاد:اه و دى اى علاقه ب دى... استنى كده لا متقولش ان هى دى
اسلام:اه هى
سعاد:و هى اى اللى فكرها بيك دلوقتى هى مش سبتك زمان
اسلام حكلها ع كل حاجه و رجع بضهره ع مسند الكرسى
سعاد:بس الصراحه هى صعبت عليا
اسلام:اه اتبهدلت كتير بس برضوا مش قادر اسمحها ع اللى عملته فيا وانا دلوقتى بحب حبيبه زى مقولتلك
سعاد:ربنا يقدملك اللى فيه الصلاح و الخير ي حبيبى يلا انا هقوم انا اشوف اللى ورايا و انت نام علشان تقدر تقوم الصبح علشان شغلك
اسلام:حاضر .. ربنا يخليكى ليا ي رب
سعاد:و يخليك ي حبيبى يلا سلام
و خرجت سعاد من الاوضه و قام اسلام ينام ع الكنبه اللى ف مكتبه و راح ف سابع نومه بس تعب اليوم انهارده عليه
______________________________________________
ف مكان تانى
تامر قاعد ف اوضته المكتب بيخلص شغله و باب الاوضه خبط و دخلت نادين
نادين:اى حبيبى لسه مخلصش و جت قدامه قعدت على طرف المكتب
تامر:تعالى ي حبيبتى ناقصلى شويه كده
نادين:طب يلا علشان الوقت اتأخر و عايزه انام
تامر:طيب ي حبيبتى اطلعى انتى وانا جى وراكى
نادين:ماشى ي حبيبى و بتقوم من ع المكتب شويه ورق وقع ف الارض:انا اسفه جدا استنى اشلهم و بتلم الورق لاقت صوره ل حبيبه
نادين بعصبيه:اى اللى جاب الصوره دى هنا
تامر بتوتر: عادي
نادين:عادى .. عادى ازاى يعنى احنا مش خلصنا من ام الحوار ده اى اللى فكرك بيه تانى
تامر:علشان انا اصلا منستهوش انا اه ممكن اكون اتجوزت و بشتغل و كده بس برضوا منستهاش هى ف بالى على طول و عمرى مهنساها
نادين:يبقى انت كده بتلعب بالنار ي تامر و حاسب بقا لاتلسعك
تامر:لا متخفيش و هاتى بقا الصوره دى و اشد الصوره من ايديها راحت هى راميه كل الورق على الارض و طلعت الاوضه فوق
تامر:امتى بقا اخلص منك ... اصبرى عليا اخلص الشغل ده و افضالك و ادبرلك حاجه حلوه
______________________________________________
فى الصباح
صحيت حبيبه لبست و خرجت من الاوضه
مامتها: حبيبه ماما صحى النوم اى ده انتى نازله
حبيبه:صباح النور ي ماما اه نازله شويه و هرجع ع طول
مامتها :لا ي حبيبتى انا خايفه عليكى لا
حبيبه:ي ماما ي حبيبتى متخفيش عليا انا مش هتأخر والله و هرجع ع طول
مامتها:بس ...
قاطعتها حبيبه:ي ماما و النبى مش هتأخر والله
مامتها:طيب ي حبيبتى روحى و تعالى ع طول
حبيبه: حبيبتى ي ماما حاضر يلا باى
و نزلت حبيبه ركبت عربيتها الجديده فرحت بيها جدا و اتحركت و رايحه ف طريق المستشفى
صحى اسلام ع صوت خبط ع باب مكتبه
اسلام:ادخل
سعاد:صباح الخير ي بنى
اسلام:صباح النور
سعاد:يلا فوق كده على مجبلك فنجان قهوه يفوقك
اسلام:تسلمى ي رب
و خرجت سعاد قام غسل وشى و قعد ع كرسى المكتب و بعدها بشويه دخلت سعاد بالقهوه
سعاد:خد ي بنى
اسلام:تسلم ايديك
سعاد:بالهنا و الشفا
و فى نفس وقت دخول حبيبه مكتبه و بتخبط ع الباب
اسلام بتفاجأ :انسه حبيبه
حبيبه:ازيك ي دكتور
اسلام:تمام الحمدلله اتفضلى اقعدى واقفه ليه سبينا لوحدنا ي سعاد
و خرجت سعاد و قفلت الباب
حبيبه:انت ازاى ي دكتور تاخد المذكره بتاعتى
اسلام:كان اخدها كان لازم اشوف اى حاجه ليكى بالماضى
حبيبه:بس انا مسمحتلكش تخدها
اسلام:بس باباكى سمحلى
حبيبه:طب بعد اذنك انا عايزه المذكره دلوقتى
اسلام:حاضر اهدى بس ثانيه واحده
و قام اسلام من ع الكرسى و راح ناحيه الدولاب طلع المذكره و ادهلها
اسلام:اتفضلى
حبيبه:شكرا جدا.. و بعد اذنك متخدش حاجه مش بتعتك بعد كده
و راحت ناحية البابو بتفتحه و اتفجأت بكلام اسلام
اسلام:انا عرفت كل اللى حصل قبل الحادثه
🌺🌺🌺🌺🌺🌺🌺🌺🌺🌺🌺🌺🌺🌺
يارب يكون عجبكوا
بقلم/سلمى اسامه
         
                        متنسوش الفوت⭐
                        و كومنت اشوف رأيكوا💬