وقفتا في الهاوية و ختيت طرف رجلي اليمين في الفراغ كنت بعاين للبحر كان ازرق و صافي و حلو أتاملتو مسافة و انا بفكر أخطو بالتانيه و لالا ؟
قاطعني صوت : اتراجعي شوية حا تقعي ، البحر هنا غريق ..
رجعتا خطوتين لورا و اتلفتا على مصدر الصوت كان د.وليد ماسك تلفونو خاتي في أذنه .. اشر لي بيدو بمعنى ابعدي .. في نفس الوقت جاتني مكالمه رديت " رسلتا ليكي علي حايجيك بعد شوية .."
فصلتا الخط و اتمنيت لو وقعته في البحر و ارتحتا ، رجعتا للدفعه كانوا قاعدين دايرة في النص في قزازة كولا بلعبوا صراحه .. قعدته في صندوق بلاستيك تبع الكولا و اتفرجتا عليهم .. شوية جا د.وليد قعد في الصندوق التاني
بيكو : يابروف انزلي العبي معانا
_ خلينا نكشف اسرارك شوية
اميرة : فككم منها دي كئيبه و منفسنه ساي
د.وليد : ما صاح تتكلمي على زميلتك بالطريقة دي !
اميرة حست بإحراج من كلام د.وليد ..
بيكو : ارح يا رواند
= لا العبوا انتوا ما عايزة
بيكو : يزوله انزلي ما حانسالك عن خطيبك
اميرة : اي ما حنموت و نعرفوا
نرجس عاينت لاميرة و رفعت ليها حاجبه بإشمئزاز حولت بصره لي : تعالي ياخ حاتستمعي
= معليش ما لي مزاج
اميرة عاينت ل د.وليد : جاك كلامي كلنا عارفنها !
د.وليد اتجاهله و ما ركز معاها
ماكس : شنو يا ولي ما تنزل !
د.وليد : لا لا العبوا انتوا
بيكو : خايف نكشف ليك ورقكك و تضيع هبيتك صااح ؟ 🐸
د.وليد مسح لحيتو و ضحك :بتفهم
اميرة : دكتور سؤال حشري شوية ممكن ؟
ماكس : انتي تسألي و نحنا كلنا نجاوب ♡
اميرة اتكشمت للضرس الاخير
بيكو ضرب ماكس : إمهِل ياجنا " إمهل =استكين" .. عاين اوريك عايزين يسألوك شنو ، البنات عايزين يعرفوا مرتك اسمها منو ؟
د.وليد بهظار : يهمكم اسمه في حاجه ؟
اميرة : بهمنا نعرف إسم افضل إمرأه في العالم
د.وليد : عدن ♡
اميرة: زواجكم حب و لا تقليدي ؟
د.وليد : الاتنين ..
واحده تانيه : كدي احكي لينا قصتكم
اميرة : عندكم بيبي ؟
توالت الاسئله : لاقيته وين اول مرة ؟ كيف عرفتا إنك بتحبه ؟ كيف اعترفتا ليها بحبك والخ.... د.وليد ماداهم اي معلومه ممكن تفيدهم وبطريقة ظريفه غير الموضوع بإنوا يسألهم هم .. كان ماسك التلفون و مندمج معاه شوية اتصور كان بضحك من قلبو و حرفيًا عيونو بتبرق شكلو دي هي ..!♡ مرت ربع ساعه علي ضرب لي وصفته ليهو مكان ..حسيت بيد في كتفي اتلفتا لقيتو علي : نمشي ؟ اتلفتا شاف دكتور وليد مشى سلم عليهو وقف معاهو ..
