د.وليد وقف قدامي و مد لي يدو بإبتسامة و انا لسه بحاول استوعب الموضوع .. سلمته عليهو و انا بعاين ل علي مستغربه !؟ . قعد في كرسي موازي لينا ، نحنا الاتنين كنا قاعدين في الكنبة متجهين جهه المكتب الخشبي .. عاين لي و شكلو فهم التساؤلات الفي وشي ..
د.وليد : تشربوا شنو ؟
علي : قهوة
د.وليد عاين لي : و انتي رواند
= لا انا مااا .. ما عايزه شيء
د.وليد : طيب ثواني و اجيكم راجع ..
اتقدم خطوتين اتجاه السخان الموجود على التربيزة الفضية
علي سألو : انت لسه ما جبته ليك شغاله ؟
د.وليد : و اجيبه ليه ؟ من ايام الجمعيه ما بخش زول هنا غيري بجي كاستجمام و برجع البيت
علي اتلفت علي : وليد كان معانا كاستشاري نفسي في الجمعيه في مبادرة "معك" اللي استقطبت المراهقين البعانوا من ضغوطات نفسيه هو و دكاتره تانين ، ما قصروا معانا المبادرة لقت اقبال كبير و الفضل برجع ليهم
د.وليد : كانت ايام جميلة لكن متعبه مشت بسرعه ، " شال صينيه فيها كبايتين قهوة و واحده نعناع و اتجه علينا ": ما شايفكم عملتوا مبادرات تانيه !
" ختى الصينينه قدامنا و قعد "
علي : شغالين على الاطعام الاوليه بقت غذاء و صحه ، عارف حال البلد ربنا يصلحه
وليد : امين امين ..
علي : عدن كيف ؟
د.وليد : الحمدلله احسن كتييير في احتمال كبير تطلع قريب
علي : فرحتني والله ربنا يواليها العافيه
د.وليد : يارب ، رواند ، مالك ساكته !
= لا ولاشي ما حبيت اقاطعكم ،
عاينتا لعلي : مش كأنوا اتاخرنا يا علي و لا شنو ؟
علي قبل يفتح خشمو قاطعتو : نحنا جينا مارين بالمكتب ف علي قال نسلم عليك
د.وليد خلف رجله : والله !
= والله ، نستأذن نحنا يلا علي ..
علي : وليد خمسه دقايق ..
د.وليد : جدا .. شال كباية قهوته و طلع
علي : مالك ؟
= انت لشنو جايبني هنا !
علي : نسيت اكلمك وليد دكتور نفسي اصلا و ..
= ما بهني ، ما تجيني عند واحد من دكاترتنا عشان يعاين لي بنظرة العيانه ! كيف ، كيف اصلا بتعمل حاجه زي دي من غير ما تشاورني ؟ كيف تحكي لي حالتي ؟ انت و عدتني مافي زول في الدنيا حايعرف بالموضوع دا غيرنا !
