= انت عارف إني سبته المجال دا و قراري نهائي ! انا لمن طلبته منك تعمل ليها التحاليل كان عشان نتأكد انو مافي مرض عضوي مؤثر عليها ما عشان استلم حالته ..!
علي : عليك الله ياخ دي اختي ما اي زول ، و انا ما بثق في دكتور غيرك !
شال نفس : ممكن اتوسط ليك لناس ثقه ..
علي : عشان خاطري و اعتبره أخر حاله تستلمه انا ما بثق في غيرك
= طيب طيب اقول ليك شنو تاني ؟ ما بقدر ارفض ليك طلب
علي : تسلم يا الحبيب ما عارفه اشكرك كيف ♡
= معقوله ياخ افضالك سابقه يا علي ♡ ، خليني اشوف التقارير
علي مداهم ليهو شالهم منو و لبس نظارتو راجعهم .. ختى التقرير في درج المكتب و طلع نظارتو ضغط على مدامع عيونو : زي ما كنت متوقع
علي : طمني ؟
= علي رواند معاها اكتئاب ، لازم علاج فوري ممكن لو اتاخرنا تضيع مننا
علي مسح وشو : اكتئاب مرة واحده ! ليه ياااخ دا عمرها ما حسستنا بشي !
= الاكتئاب اسبابو كتيرة و متجزره بعدين نحنا ما بنعرف لغاية هسا الاسباب الوصلته للمرحله دي أو ياتو نوع من الاكتئاب عندها ! لازم تاخد جلسات و لازم اهلك يعرفوا الاهل جزء مهم جدا في مرحلة العلاج ..
علي : لالا ما حا يرضوا بالقصه دي ابدًا دا ما بعيد يشاكلوني كوني جبته رواند لطبيب نفسي .. عارف الطب النفسي في السودان يعني جنون و التجاني الماحي ..مافي طريقة العلاج يتم من غير معرفه الاهل ؟
= في حاله واحده بس
علي : شنو ؟
= يكون الاهل ما السبب
علي : طيب انا حا حاول اقنع رواند تجي تقابلك مع اعتقد ترفض عايزه طريقة تخلصه من الكوابيس البتشوفه
= الكوابيس دي عادية بديها مضادات هلوسه بتخف
علي : يعني ما حاتزح نهائي
= الكوابيس ماهي الا رد فعل للعقل الباطن اتجاه الضغوطات البتمر بيها و ممكن تكون مخاوفه ! ..المهم بمجرد ما هي تفهم حالته و تخضع للعلاج بتختفي مع مرور الوقت ..
علي مسح وشو و كان باين عليهو القلق على رواند .. الدكتور قام من كرسيهو و ختى يدو في كتفو : ما تخاف يا صاحبي الاكتئاب دا حاجه عاديه و دا مرض العصر حاجه زي الملاريا بقت .. بمجرد ما تاخد الجرعات بترجع لحياتك الطبيعيه عادي .. بكون خطر في حال يمشي المريض يخبط و هو ما قادر يفهم نفسه او الحواليه .. ما تبين قلقك دا ليها عشان ما ينتقل ليها و تترعب
علي : طيب اقوم انا امشي اشوف طريقه اكلمه بيها
= صلح مزاجك اول بعد داك كلمه ما تكلمه بحالتك دي ..
