~ في الحاضر ~
مرت اسابيع على وفاة ابوي لسه الصدمه مأثره فيني كأنو مات امس ، الموت ما بحذر ، الموت غدار بيجي فجأه بيخطف احبابك و يمشي ..ما قادرة اتقبل الحياة و لا قادرة اجاري و تيرتا ، عامر اكتر واحد فيني متأثر على موت ابوي الجواي انا اضعافو داخل عامر ، مالاقاهو اتوفى قبل يصل بساعة 💔
تصرفاتو من يوم الوفاة لغاية اليله ما مفهومه ساكت طول الوقت و تحسو ما معانا ، طول اليوم يا نايم يا قاعد جوة غرفة ابوي و قافلة عليهو !
الحسرة و الندم اكلوا قلبو ..موت الاب ما هين ابدًا تحس الدنيا فضت و بهتت و جاطتت ، ما بتفهم شي ، البيت موحش بشكل لا يطاق ، فاضي ما فيهو صوت، مافيهو روح ..
___
الشام : علي ، اتكلم مع عامر دا حالو ما عاجبني ، انا اتكلمته معاهو ما سمع مني جرب انت يمكن يسمعك !
علي هز راسو من سكات و هو منزلو في الارض ..
ياسمين جات شايله كرشه قدامه ، قعدت بتعب و هي شايلة كباية شاي في يدها مدته لعلي ، رفع راسو عاين ليها : انتي ما بتسمعي الكلام مالك ؟ قولت ليك ما تتحركي كتير ..
ياسمين : كلها كباية شاي ما بتأثر ، و انا لازم اتحرك عشان ولادتي تجي ساهله ..
الشام : صاح كلامه ، اطمن ما بخليها تشيل تقيل ..
ياسمين : اي ، خالتي و ميعاد بعملوا شغل المطبخ و البت الشغاله بتنضف و تغسل انا بتحنيس يدوب اساعدهم بقهوة و لا شاي
الشام : ولادتك قربت ما اظن تتمي الاسبوع دا
علي : لو حسيتي بوجع طوالي على الدكتور ، انا ماشي ( ختى كباية الشاي و قام )
ياسمين : جهزته ليك ملابسك
علي : تسلمي لي ، عايزه حاجه ؟
ياسمين : لالا
الشام عاينت لياسمين : اي دايره شنو لالا دي ! (رجعت نظره لعلي): ولادته قربت ولهسي ما اشترت شي ، اديها تجيب احتياجات البيبي و احتياجاته
ياسمين : مع البكاء ما فضى و قولت مافي داعي واشتريتهم من عندي
الشام : تشتريهم من عندك كيف يعني ؟ هو راجلك و دي مسؤوليتو
ياسمين: لكن انا شغاله و عندي القروش يا خالتي !!
قاطعته : دا حقكك تجيبي بيهو العايزاهو ، اما بنسبه لمصاريفك انتي و ولدك فهي مسؤوليتو هو ، اعرفي حقوقك كويس و ما تخجلي منها .
علي بدهشه: سبحان مغير الاحوال !!
الشام فهمت قصدو ضحكت: اول مرة اندم اني عارضتك في حاجه ، انا بناتي الجبتهم من بطني ما شالوني زي ياسمين كفاية طيبته ، المواقف بتوريك معادن الناس و ياسمين من يوم البكاء لغاية اليله و مع انها تقيله الا انها ما بتنوم قبل ما تطمني على اكلي و شرابي ..♡
