#صفحة_هنا_نحكي_حكايتي
#ربيعة
#الحلقة_20
قتلكم ستيكيت العميرة و قاعدين نستناو فالخطابة ...حتى جاو ..جا براهيم و مرت خوه بصح هذ الخطرة جا يجر في جداه في وحد الشريطة تاع المعوقين ...نخلعت و ضربتني تريسنتي قلت لحسنة غير روحي قولي لعمتي تقلهم يروحو انا ماشي زهري فالتبونيش والخدمة ....انا منقدرلهاش ...قاتلي حسنة بلعي شكون قلك رايحة ترفديها انتي اصبري نشوفو واش يقولو ...المهم ديت هذاك السني تاع القهوة وكارهة حياتي دخلت مزيرة وجهي عليهم ...قعدنا مجمعين و هذيك العجوزة قاع منحاتش عينها عليا تشوف فيا وتتبسم ...المهم هدرة تجيب هدرة قاتلهم عمتي اسمعو انا عندي شرط واحد موجه لبراهيم ..قلها قولي اخالتي اني نسمع ..قاتلو بلا ما نهدرو على الصداق راه باين ..بغيك تخبرتي انت راك طالع لفرنسا ولا معول تبقى هنا ...قلها كيفاه نخلي بلاصتي و خدمتي لهيه ونقعد هنا ...قاتلو وربيعة كيفاه ..بدا يضحك قلها ونخلي مرتي هنا ....قاتلو باه نتفاهمو مليح ...قلها اسمعي انا نطلع ونعاود نهبط كي نجي نصيبها كملت قشها و جهازها باغي نطلعها ونطلع جدة معايا راه عندها اوبيرصايو فالشتا ....شفت في عمتي ..وعمتي فهمتني ..قاتلو اسمع انا باه نكون صريحة معاك ..لازم تصنعلها الباسبور و تخدملها الفيزا ..باه يصرا الزواج ...قلها بصح لازم العقد ...قاتلو ماشي قاع مشكل العقد ...نعقدو نورمال بصح الدخلة تكون من مورا كوغطها ...فلول شوية معجبوش الحال بصح كي شاف جداه بغاتني و فرحت ...قبل نورمال ...قلها ماشي مشكل ...وجداه بقات غير تشوف فيا مع مرت خوه...حسيتهم حنان بزاف بزاف وسيرتو جداه ...كي جاو رايحين قالو لعمتي الخميس الجاي نجو ندفعو الدراهم باسكو براهيم مبقالوش بزاف ويطلع .....كي راحو رجعت لعمتي وقتلها منقبلش ...خزرت فيا وقاتلي ماشي كيما تبغي ...وديجا واش هي الحاجة لي خلاتك دوري في رايو ...قاتلها جداه ..قاتلي بلعيه بلعيه الزهر جا ليك برجليه..قاتلي العجوزة تبان جنة وانتي مهوش عاجبك الحال .قاتلي ولوكان عينها في بونيشة تحوس خدامة وتخلصها بالشهر ..وديجا ايلا خدمة بخدمة كيما قلتي روحي خدمي راجلك و جداه منها تدي الاجر ومنها تعيشي حياتك ...وزيد مكنتيش قاع تحلمي بفرنسا غير كولي الكسرة و سكتي .....فلحق صبت عندها الصح عييت عييت وسكت ....وقبلت .....ضروك بقينا نخمو في دارنا ايلا يجو ولا ميجوش قاتلي ساهل ساهل نبعثلهم خبر و الخميس يكون هنا ....قاتلي انتي حية وانا حية ايلا مجاوش .....بقينا هذيك السمانة نخملو و نوجدو وبديت نخمم في دارنا كثر من الخطابة ......بالخميس صباح داتني حسنة لوحدة صحبتها باه تستيكني .....رحت ريقلت روحي كثر من المرات لي فاتو ..وليت بومبة هذ الخطرة ...كي جيت و هبطت من طومبيل ...صبت .........#صح_سحوركم..
YOU ARE READING
من الدوار لافيل قصة ربيعة "باللهجة الجزائرية"
Short Storyعندما تتجرد القلوب من الرحمة ...وعندما تتصدر لغة المصالح قائمة الاولويات ....وعندما يقف عامل العادات ووالتقاليد حاجز بينك وبين رغابتك ...ستكون هناك كارثة ....#ربيعة ..فتاة تاهت بين ثنايا الظلم و الاستعباد ...لتجد نفسها تعارك الاهل قبل الغير ...فتاة...
