من الدوار لافيل قصة ربيعة "باللهجة الجزائرية"

1

#صفحة_هنا_نحكي_حكايتي
#ربيعة
#الحلقة_1
خيرت اسم ربيعة لانو اسم عزيز عليا اسم غيرلي مجرى حياتي ...المهم مناش رايحين نهدرو على معلومات الشخصية باسكو مهيش مهمة بقدر ما هو مهم المضمون تاع قصتي ...احنا عايلة متكونة من 5 ذكورا وزوج بنات انا و بهية ختي لي كبيرة عليا و كاين زوج عمامي يسكنو حذانا باسكو جدة نهار زوجت بابا و عمامي بناتلهم دايرهم كامل حذا بعض نسكنو في قرية ساكنين شوية على برا  ...وزيد كاين عمتي وحدوخرة وسمها لويزة  متزوجة خارج ولايتنا وكانت قليل وين تجي عندنا غي فالحالات الضرورية ومتقعدش بزاف ولا وعيت عليها هي انو جدة متهدرش معاها كيما اي مرا وبنتها كي شغل كاين حاجة بيناتهم بصح هذ الحاجة احنا مكناش عارفينها من غير عمامي و عمتي وجدة .....الحاجة لي تميز العايلات توعنا هوما التنافس فيما بيناتهم على جمع المال و الفلاحة..هي صح ساكنين حذا بعض ونروحو لبعضانا بصح القلب يقول قاع حاجة وحدوخرة ...وزيد فهذاك الوقت معندناش الطفلة لي تروح للجامعة كامل بنات عمي محبسين فالسيام وليسي وكاين حتى لي جابت الباك و حبسوها بحكم انو البنت ما يدمولها غير راجلها و دارها.....على عكس عمتي لويزة عايشة حياتها  بعيدة علينا و مزوجة زوج بناتها في فرنسا و وليدها نتيجي فلاج ...هذاك الوقت نقرى فليسي دوزيام كنت متوسطة فالقراية بصح نبغي نقرا .... انا نرجع سبب عدم تحصلي على نتائج جيدة هو التعب ..تخيلو انتوما كي تجي نيشان من ليكول تروحي تصلحي و لا تغسلي صوف و لا تطحتي شعير اكم تعرف الخدمات تاع بكري ...يتسما معندكش الوقت باه تقراي اصلا هوما يحوسو يتعبوك غير باه تكرهي القراية و تبطلي وحدك ويستغلوك اكثر وقت ممكن ومن بعد يزوجوك ...كنت شيفتها من بهية ختي حبسوها سنة ثالثة متوسط و رجعوها كيما الراجل شكلا و عقلا تعرف غير الخبيز و التسياق والقدام لا خرجات لا والو فلاشاوها ....انا صح كنت صغيرة شوية بصح كنت متفطنة و كنت دايرة في بالي محال ايلا نمشي فطريق بنات عمي و بهية ختي ...كنت نصبر على التعب وومنشتكيش لوكان نشتكي يحبسوني من القراية ...المشكل لي كنت نعاني منو هو انو مكانش واحد يفهمك عندهم كامل نفس العقلية الخدمة ووتهنبير ..معندكش لمن تحكي ابدا ..ايلا روحتي وهدرتي على حاجة مهمش موالفين بيها راكي جنيتي على حالك ....يتسما ايلا درتي مخطط في راسك متقدريش تخبري بيه ولا تشوري واحد لانو بطبع رايح يكون المصير تاع الفضح ...يتسما لازم عليك تريسكي و تنفذي واش راه يدور في راسك بصح يا ترى راح ينجح ولا مينجحش ..هذا لي رايحين نشوفوه فالحلقات القادمة باذن الله...#يتبع......