من الدوار لافيل قصة ربيعة "باللهجة الجزائرية"

3

#صفحة_هنا_نحكي_حكايتي
#ربيعة
#الحلقة_3
قتلكم جبنا العروس وصدرنها حتى سمعت بنات عمي يقولو اهي جات لويزة اهي جات ...نهار دخلت هي وحدة من بناتها (حسنة) لي متزوجات في فرنسا  متامنوش عقولكم لزوج سيفليزي وشعور صفر و ضاربين الميني متعرفيش شكون الام و شكون البنت والغاشي كامل يشوف و مخلوع باسكو احنا قاع مكانش من عادتنا لي يلبسو كيما هاك ...انا تكون كنت نبغي نعيش و نبغي نلبس وقاع رحت من الخلعة  نجري ليهم ونسلم عليهم مام نسا عمامي ويما لقولها واستقبلوها بصح غير قدام الناس وباين بلي حشمانين من الجيران وقاع ...ليصونصيال بنتها الهدرة غير بالفرونسي و لادها هذوك تحسب قاع مهمش ولاد دزاير حاجة كارثة دخلناهم لوحد الشومبرة وحدهم وقعدت انا وبنات عمي مداورين بيهم (كنا مخلوعين) ...ليصونصيال انا لي جبتلهم الما و انا لي جبتلهم القهوة و بديت ندور بيهم بغيت نتقرب منهم باه يحكولي ... بصح أماا قاع مدتهاش فيهم باسكو بداو النسا يهدرو في عمتي هذيك الليلة بداو يقولو هذي علاه راهي دايرة لعمرها هاكا الشيب والعيب اكم تعرفو هذيك الهدرة الزايدة ...على هذيك دارنا كرهوها ..بصح انا استغليت الوضع وبديت نتقرب منهم ...وقاع منضتش منعندهم ...وفليل فرشتلهم و فرشت لولاد حسنة وفرشت روحي حذاهم المهم تهليت فيهم ...فليل كي رقدت حسنة ولادها قاتلي واش رايك نخرجو برا نجمعو ...في قلبي قتلها فرصتي ..خرجت انا ويها بدات تحكيلي على فرنسا وكي عايشة هي تحكي وقلبي يرجف سفهت على هذيك المعيشة مع هي قارية وقاع دارتلي وحد لابريصيو في عقلي متامنوش عقولكم فلاشتني  ..وبدات تهدرلي على الحب وتشيكوبي وكيفاش تعرفت برجلها هي تهدر وانا نقلها احوجي سكتي هوما يسمعوك ..المهم طفلة من هذوك لي عايشين حياتهم ومطبقين المبدا تاع كل واحد حر فطريقة عيشو ....مام ختها لوخرا زوجت بنفس طريقة تاعها ...كي قتلها علاه متزوجتوش هنا ..قاتلي يما هي لي زوجتنا في فرنسا خطبونا شعال و مقبلتش ..(عرفت بلي يمها مادية كيما خوتها )....المهم هدرة تجيب هدرة حتى قتلها ..بصح علاه متجوش عندنا بزاف ...قاتلي باسكو خوالي و بويك و حتى جدة يكرهو يما ......قتلها بصح انا على حساب علمي يماك هي لي مجاتش كي مرض جدي على هذيك بقاو كارهينها .......قتلي لالا اكي غالطة مش هذيك هي السبة قاتلي نقولك  بصح بلاك تقولي ..قتلها غير نطقي برك ...قاتلي .....#يتبع.......لسا ما بدينا ......