كسارة البندق (الجزء الأول )

((مناقشة بسيطة و تحليل لشخصية آن قبل البدء بالجزء الثاني من الرواية )).

آن زي م كان واضح انها شخصية ثقتها معدومة في الحوالينها وربما أحياناً حتى في نفسها من بعض حواراتها مع نفسها او افكارها مرات بتحس كأنو بتصرفاتها ممكن تدخل نفسها في مشكلة .
مارا بشي صعب جداً عليها ورُبما مسبب ليها صدمة ... بس الكويس فيها انها بتحاول تقاوم وتحمي نفسها حتى لو إنها تظهر نفسها بشخصية صعبة المراس و حادة و جادة جداً .
مفتقدة للعاطفة والحب ف حياتها لدرجة كانت بتستغرب من تعامل عمران وعبد الرحمن معاها وانهم لي بتعاملو معاها كدا ؟
متخبطة واحياناً متناقضة افكارها بتختلف كل شوية ممكن تكون عايزة شي وفجأة رغبتها لي تنعدم و العكس . 
حاسا بذنب ما اتجاه نفسها وكانو هي السبب في المرت بيه .
بس الما معروف هل هي اصلاً كدا من زمان ولا هل شخصيتها اتغيرت بعد الخاضتو واتحولت لشخصية تانية .
عموماً الجزء الثاني حيفهمنا اكتر عنها وحيكون نظرة مُقربة عنها وبتمنى الناس تكون محايدة في حكمها على كل الشخصيات من غير اي تعاطف .
__________________________________________
من هسه حابا اوضح الفاكر انو الرواية دي وردية وناعمة وبتعكس قصة حُب رومانسية ومشاهد عاطفية بين الأبطال ونهايتها عاشو في ثبات ونبات وخلفوا صبيان وبنات م يتمها .
الأحداث الحقيقية حتبدا من الجزء دا ، قد تحسو انو ف تغييرات م اعتدتو عليها ف كتاباتي  السابقة او حتى الجزء الأول .
زي م قلت تمت إضافة بعض الأحداث من عندي وحذف البعض عشان تكون مناسبة للقراءة وكمان لخصوصية اصحابها .
الأبطال تجسيد لعدة اشخاص مع بعض ... يعني الشخصية تجسيد لعدة اشخاص في الواقع .
هدفي منها توعوي بحت ، وبتمنى انو الشباب يقدروا ياخدو اكبر قدر من الفائدة منها .
حيتم طرح عدة قضايا فيها البتتفاوت بين بنقدر نتكلم فيها وبين لا لانو مجتمعنا بيتكتم عليها او بيخاف من الخوض فيها او نظرتو ليها زي العنقاء حاجة اسطورية غير موجودة اصلاً .
الرواية حتحتوي على مشاهد ربما تكون قاسية او عنيفة للبعض او حتى تكون مرهقة نفسياً ف من هسه انا وضحت طبيعتها اذا م حتتناسب معاك م تكملها 🙏🏻.
اسأل الله ان يسددني فيها و أن تصل كما أُريد وتُنشد الفائدة منها.
أخيراً حابا اوضح شي ... لاحظت في الكثير من التعليقات والرسائل الناس بتخاف تنتقد ... وبيبدو دايماً بي جملة م تزعلي مني او خايف/ة يقولو علي حاقد/ة .
انا بتقبل الإنتقادات البناءة بكل صدر رحب ، وبتكون بمثابة توجيه لي احياناً كثيرة ... فلو عندك انتقاد او ملاحظة لي عشان اصلح شي او اصيغو بصورة افضل أو حسيت بخطأ فيه كل اذن صاغية .
الحلقة الجديدة حتنزل السبت ان شاء الله ف نفس المواعيد ونفس ترتيبنا ، سبت ، اتنين ، اربعاء .
اذا في اي يوم م حينزل فيه فصل او اضطررت اني اوقف حنزل توضيح بي كدا  .
نتلاقى السبت ان شاء الله ♥️