Eyes On Me, Baby (COMPLETED)

Chapter 10

Chapter 10

"Sabi mo naman may shooting sa school niyo, 'di ba?"

"Meron po."

"Doon ka na lang manood," sabi ni Papa. "Naiintindihan mo naman ang Mama mo, 'di ba?"

Tumango ako. Alam ko naman na hindi ako papayagan, pero sumubok lang naman ako. Kahit naman nung bata pa ako, hindi ako pinapayagan na sumama sa mga bata na hindi ko kilala. Kahit kapag may group project na kailangang gawin sa labas nung nasa high school pa ako, tinatanong ni Mama iyong pangalan ng mga kasama ko sa group project isa-isa at icoconfirm pa iyon sa magulang nila.

"Matutulog ka na ba?"

"Hindi pa po," sagot ko dahil manonood pa ako ng movies. Ayoko na ulit bumalik sa mall dahil kahit naglakad lang naman ako ay parang pang isang linggo iyong pagod ko. Nasa Youtube movies naman iyong mga kailangan kong panoorin at may credit card naman.

Habang hinihintay kong magloading iyong rinentahan kong movie sa Youtube ay pumunta muna ako sa Instagram. Naka-follow na rin kasi ako sa mga accounts na pictures ng mga lugar ang naka-lagay—nung huling basahin ni Serj ang script ko ay sinabi niya na mas maganda kung mas magiging descriptive iyong settings ko para mas madaling mag-imagine. Iyon daw kasi ang trabaho ng scriptwriter—i-describe iyong scene pati mga eksena. Mas madadalian ang director kung malinaw ang vision ng scriptwriter.

11:39pm nang magdesisyon ako na bumaba para kumuha ng baso ng gatas. Sabay na napa-tingin sa akin si Kuya Robert at Ate Gina.

"Bakit?" tanong ko dahil may kakaiba sa mga tingin nila.

"Wala naman..." sagot ni Kuya Robert at saka siniko siya ni Ate Gina. Hindi ko na sila pinansin dahil baka nag-aaway na naman sila. Sabi ni Papa ay 'wag akong makiki-Sali kapag may nag-aaway. Hindi rin naman ako interesado sa problema ng ibang tao.

Dumiretso ako sa ref at kukuha sana ako ng gatas doon, pero naagaw nung chocolate milk iyong pansin ko. Naka-tingin ako roon at nag-iisip kung ano ang kukuhanin ko nang marinig ko ang pangalan ko.

"Karma," pagtawag ni Ate Gina.

"Bakit po?"

"May bagong kaibigan ka?"

"Sino po?" tanong ko habang kinu-kuha iyong gatas. Bukas na lang iyong chocolate milk. Nakapagdesisyon na ako.

"Austin Archangel daw," sabi ni Ate Gina.

Tumingin ako kay Kuya Robert. "Masama magchismis," sabi ko sa kanya kasi sila ang nagsabi sa akin na kapag sinabi sa 'yo ng isang tao, bawal mong sabihin sa iba dahil chismis ang tawag doon—unless bigyan ka ng permission na sabihin sa iba.

"Iba ang rule kapag mag-asawa," sabi ni Kuya Robert.

"May ganoon?" tanong ko dahil ngayon ko lang nalaman iyon.

Tumango siya. "Oo—saka kapag boyfriend-girlfriend, ganoon din iyong rule," dugtog niya. Napa-tango ako. So, ganoon pala iyon—pwede mong ichismis sa boyfriend o asawa mo. Bagong kaalaman. May nalalaman talaga ako araw-araw.

"So, sino si Austin Archangel na inspiration mo raw?" tanong ni Ate Gina sa akin.

"Inspiration ko sa script ko."

"Sino ba iyan? Nakaka-curious. May picture ka ba?" tanong niya. Umiling ako. Bakit naman ako magkakaroon ng picture ni Austin Archangel? "May Instagram ba?" tanong ni Ate Gina. Tumango ako. Kinuha niya iyong cellphone niya at pumunta sa Instagram. "Naka-follow sa iyo!"

"Alam ko po," sabi ko.

"Ay, grabe naman, Karma! Paka-gwapong bata naman nito!"

I shrugged. Personally, he looks like a normal human being, but I've seen how the women population looks at him. Alam ko na gwapo siya.