كم مضى من عمرنا وحنا ننتظر؟
ننتظر اللحظة الي فيها نبكي من سعادتنا،
ونقول لنفسنا اننا بعد كل هالصبر
حصل الي نبيه
.
اصوات ناس كثير، وريحة معقمات
طريق طويل ولوحات ارشادية بكل مكان، صور توعية ونصائح بكل جدار ..
كان يمشي بخطوات ثابته، تبرز طوله الشامخ و تفاصيل عضلاته تحت السكراب.
بيده كوب قهوته المفضلة، سبانش لاتيه.
رغم حبه لجميع انواع القهوة لكن سبانش يكون اكثر خيار يختاره
بين الحلو والمر، دائماً ..
يحب اوساط الأمور
بيده الثانية حاط البالطو على ذراعه، قبل ما يناظر ساعته اول ما شاف صاحبه الي كان جالس يقلب بجواله.
: جاي بدري؟
سأل بنبرة صوته الخشنة والضخمه الي ما كان فيها مزح ..
جلس قدام صاحبه الي نزل جواله وابتسم: كنت قاعد اسوي طلبيه.
حط الاول قهوته على الطاولة وهمهم قبل ما يتكلم: من عرفتك وانت تسوي طلبيات، علمنا وش قاعد تطلب
: اطلب سكراب جديد، هذا مليت منه.. حقك حلو بس ادري انك ما راح تقول لي من وين شاريه
ابتسم الاول بثقة وقال: احب اتميز
قلب الثاني عيونه بعدين رفع حاجبه وقال: وهـاب ! مو انت اوف اليوم؟
تسند وهـاب على الطاولة وهمس بتملل: الا، بس قلت بداوم عشان اشوفك يا النتفه.
تكتف الثاني وقال: مو نتفه
ناظر وهـاب بالشخص الي جاي عندهم، والي كان يمشي بشويش ويأشر لـ وهاب انه ما يقول شي للي جالس قدامه.
وكانت ثواني قبل ما يغطي عيونه ويقول بمزح: النتفه فهيد، خمن مين انا؟
عقد فهد حواجبه وحاول يبعد يد صاحبه وهو يتحلطم: ماجد مالي خلق ترى يكفي مكروف
بعد ماجد يدينه وجلس جنب وهـاب وهو يناظر بوجه فهد الي كان محمر: افا نتفتنا زعلان
فهد: ارجع قول نتفه والله لأخليك مبنج سنة
ابتسم وهاب ونزل عينه يناظر قهوته وهو يفكر.
