.بما إنك خايف، وماشي تردد القيامة قربت، وعمال تقول علامات الساعة هتبدأ، المقال دا هيجاوبك على كل حاجة من نقطة الصفر، وهتعرف لو القيامة قربت تقوم، لازم يحصل قبلها إيه!
بس قبل ما تبدأ، عاوزك تركز جدًا، لأن الموضوع مش سهل، وكبير، ودسم، ومليان، هتخرج منه عارف كل حاجة بالتفصيل.
هبدأ كلامي بحديث مهم جدًا، هفرش لك بيه، علشان اللي بعد كدا هيسحلك.
قال (حذيفة) -رضي الله- عنه:
(اطلع النبي -صلى الله عليه وسلم- علينا ونحن نتذاكر فقال: ما تذكرون؟ قالوا: نذكر الساعة، قال: إنها لن تقوم حتى تروا قبلها عشر آيات فذَكِر:
1) الدخان.
2) الدجال.
3) ظهور دابة تكلم الناس.
4) طلوع الشمس من مغربها.
5) نزول عيسى بن مريم -عليه السلام-.
6) ظهور يأجوج ومأجوج.
7) خسف بالمشرق.
8) خسف بالمغرب.
9) خسف بجزيرة العرب.
10) نار تخرج من اليمن تطرد الناس إلى محشرهم.)
ترتيب العلامات اختلف عليه العلماء، فيه اللي قال إن الدخان الأول، وبعدين المسيح الدجال علشان يكون وقتها باب التوبة لسه مفتوح واللي مش هيتبع الدجال هيدخل الجنة، مش من المنطقي تطلع الشمس من المغرب قبل الدجال لأن طلوعها من المغرب معناه إن باب التوبة اتقفل، وبرضه فيه حديث عن النبي -صلى الله عليه وسلم- بيقول فيه:
(إن أول الآيات خروجًا طلوع الشمس من مغربها وخروج الدابة على الناس ضحى.)
والله أعلى وأعلم.
بص بقى، احنا هناخدهم واحدة واحدة حسب الترتيب اللي ظهر في الحديث، وهنتكلم عنهم بعيدًا عن اختلاف العلماء في ترتيبهم. وبعد كدا في نهاية العلامات ركز معايا كويس علشان هقول لك بعد ظهور العلامات الكبرى هيحصل إيه، ويوم القيامة هيحصل إيه.
ولكن قبل ما اكلمك عن علامات القيامة، خليني اكلمك عن شخص بسرعة كدا وباختصار شديد لازم تكون عارفه، وهو المهدي المنتظر.
(محمد المهدي). شخص هيظهر في نهاية الزمان وهيكون حاكم عادل وعظيم وهيكون سبب في انتهاء الظلم والفساد على وجه الأرض، وهينشر العدل والإسلام الصحيح وهيحارب اليهـ.وd وينتصر عليهم وهيوحد صفوف المؤمنين.
تعالى بقى نعرف مع بعض علامات الساعة الكبرى، اللي كلها من وجهة نظر الإسلام، علشان قبل ما تقرأ تبقى عارف وماتقولش عقيدتي بتنفي الكلام دا.
أولًا: الدخان:
من علامات الساعة الكبرى ظهور دخان عظيم وكثيف جدًا من السما هيغطي الكون كله، وهيحصل ذعر وهلع وخوف بين الناس بسبب رؤيتهم للدخان دا، وهيفتكروا إنه العذاب الأليم، وسبب ظهور الدخان هو ترك الحق وكثرة المعاصي، وهيغطي الأرض كلها وهتبقى كأنها بيت مليان نار.
ثانيًا: ظهور المسيح الدجال:
المسيح الدجال أو الدجال الأعور لقب لرجل ظهوره من علامات الساعة الكبرى، والمقصود بالدجال يعني الكذاب.
