شوية حاجات مهمة في السريع كده..
- لو راجل شافِك وأنتِ بتصلي الصلاة مبتبطلش ولا دا حرام، طالما مش متعمدة تقفي قدامهم ودا عند الضرورة
- مفيش مشكلة في لبس الخاتم في السبابة، لبس الخواتم في أي إصبع للنساء مش حرام، مفيش نهي وارد في كده..
- صوت المرأة مش عورة، ومافيش حاجة اسمها كده، النهي هو عن الخضوع في القول..
- الكلام وقت الأذان مش حرام، لكن مستحب الترديد ورا المؤذن، بالتالي بتسكت احترامًا لشعائر الله، لكن مش حرام تكمل كلام، ومفيش حاجة اسمها بنسكت لحد ما يتشاهد..
- إطالة الشعر للرجال مش حرام، ومش تشبه بالنساء..
- الشتايم والألفاظ مش شيء عادي، " وهل يكب الناس في النار على وجوههم إلا حصائد ألسنتهم " ، والرسول جمع بين حفظ اللسان وحفظ الفرج لضمان الجنة! يعني ذنوب اللسان مقرونة بالزنا! تخيل!
- صلاة العشاء وقتها لمنتصف الليل، ومنتصف الليل نص الوقت بين المغرب والفجر، يعني في رينج ١١، فعود نفسك الساعة متجيش ١١ وأنت لسه مصلتش..
( وفي رأي بجواز تأخيرها، لكنه خلاف الأفضل، فلو مش مضطر صلي قبل المنتصف عشان دا الوارد في حديث الرسول )
- لو فاتتك صلاة، سهيت عنها أو نمت، صليها أول ما تفتكرها، دي كفارتها..
- الحلفان بيكون بالله أو بصفة من صفاته غير كده لا..
- كفارة الحلفان اللي متلتزمش بيه، إطعام ١٠ مساكين أو كسوتهم ولو مش معاك دا، يبقى وقتها تصوم ٣ أيام، لكن الصيام مش الكفارة لو معاك..
- زوج الأخت وزوج العمة وزوج الخالة مش من المحارم، هم تحريم مؤقت، يعني مينفعش يجمع ما بينكم في الزواج، بالتالي حكمه في لبس الحجاب قدامه أو الخلوة أو السلام بالإيد زيه زي الغريب..
- الصلاة بالجزمة أو الكوتشي مش غلط ولا حرام، بالعكس سنة، المهم إنه يكون طاهر، والتراب أو الطين طهور بالمناسبة، احنا بس مبندخلش بيه المسجد عشان منتلفش الفرش، فلو في غير المسجد، صلي بيه عادي.
والله أعلم.
