هو ربنا ممكن يغفرلي أي ذنب عملته؟؟
= ايوه
أي ذنب أي ذنب؟؟
= ايوه، مستغرب ليه؟
يعني يغفرلي اني كنت بعمل ذنوب خلوات كتير اوي؟
= يغفرلك إذا تبت وصدقت
يغفرلي اني كنت بكلم بنات كتير اوي اوي؟؟
= يغفرلك إذا تبت وصدقت
طب يغفرلي اني فعلت الكبيرة .. اكيد دي لأ؟؟
= يغفرلك إذا تبت وصدقت
كنت بشرب سجاير ومخدرات كمان .. يغفرلي؟!
= يغفرلك إذا تبت وصدقت !
طب كنت بسب الدين وبقول ألفاظ وحشة !!
= يغفرلك إذا تبت وصدقت
للدرجادي غفور ورحيم؟؟
= وأكثر
طب افرض عملت المعاصي دي تاني بعد ما سبتها؟؟
= يغفرلك إذا تبت وصدقت
ولو كررتها كتيييير اوي؟
= إن الله لا يملّ أن يغفر لك حتى تملّ انت من أن تتوب!
طب التوبة دي تكون ازاي؟؟
= تندم من كل قلبك على الذنب، وتعاهد الله ألا تعود للذنب مرة أخرى، وتعمل أعمال صالحة كتير بعد الذنب وتستغفر كتير
وافرض عاهدته ورجعت للذنب بقى؟؟
= يقبلك إذا عدت إليه مليار مرة .. تُب فقط ولا تقلق
عاوز حاجة اعملها بعد كل ذنب اعمله؟؟
= تتوضأ وتصلي ركعتين بنية التوبة لله من كل ذنوبك
بس انا عندي ذنب بقالي كتير بحاول اسيبه مش عارف، يئست .. اعمل ايه؟
= زاحم المعصية بالطاعة، اعمل طاعات كتير جنب الذنب وازنقه واخنقه بين الطاعات الكتير .. هتتطفي شعلة الذنب جواك
بس انا بعصيه وانا عارف اني بعمل ذنب، دي مش بجاحة؟؟
= البجاحة الأكبر انك تكون عارف انه هيغفرلك وبيحبك وتفضل تعمل الذنوب دي ومتوبش منها!
بس صحاب عمري .. اسيبهم؟؟
= سيبهم .. عشان هم هناك هيسيبوك
وحياتي دي؟؟ اهدها كلها؟؟
= حياتك الحقيقية هناك، مش هنا، فاعمل هنا لتجد ما يسرُّك هناك
انا نفسي أكون إنسان كويس وقريب من ربنا اوي .. ونفسي ابطل الذنوب دي وامشي في طريق ربنا عشان لما اقابله اقوله اني حاولت ع الاقل ..
= وايه اللي يمنع انك تاخد القرار ده وتنفذه دلوقت؟؟
_________________________________________
ايه المانع انك تتوب حالا؟ تقرر تبطل حالا؟ تقرر ترجع حالا؟ بالله عليك مش كفاية؟ مزهقتش؟ مبقتش كل الذنوب شبه بعض؟ مش حاسس ان الايام بتتكرر بنفس الروتين وانت بنفس الشعور وف نفس المكان ومفيش جديد؟ مش حاسس انك فاقد للذة الحياة ومتعتها الحقيقية؟ مش حاسس انك مستهلك من جوه وفاضي؟ مش حاسس بنقص حقيقي جوه روحك؟ طب مش خايف من الموت اللي مش هيخبط عليك قبل ما يدخل؟ طب مش طمعان في سعادة في الدنيا قبل الآخرة؟ معندكش طموح؟ احلام؟ طب ليه مش عاوز تتوب قولي؟ التوبة صعبة؟ الدنيا تستاهل؟؟ الحاجات دي تستاهل تبيع حياتك الدنيا والآخرة عشانها؟
مستني ايه طيب؟ خايف من ايه قولي؟؟ خايف لأنك بعدت اوي ولا خايف انك تبطل؟؟ لو خايف ترجعله ف انت غلطان لأنه هيفرح بيك جداً، ولو خايف انك تبطل ف انت هتكون اكبر ندمان !
النهارده قبل بكره، اوعي تبطل تتوب، اوعي تخاف تتوب، اوعي تتردد تتوب يصاحبي
وعافر لحد ما تبطل .. أو تموت وأنت بتعافر
وحاول لحد ما تستقيم .. أو تموت وأنت بتحاول !
الدنيا تلاهي، اوعي تاكل الطُعم، واوعي تخاف تتوب، واوعي تبطل تتوب .. اوعي ! مهما حصل، اوعي !!
