السؤال:
انا حاسة اني مبقتش بحب ربنا ولا بقيت عايزة اصلي ..
مصليتش المغرب عمد ومش حاسة بتانيب ضمير..
مانا تعبت من كتر الطاعة والعبادات والفروض والنوافل وصدقات وقيام ودعاء بالسنين وحارمني من كل حاجة نفسي فيها ومش بيستجيب خالص خالص لاي دعوة..
في ايه ؟ ده الاب لما ابنه بيسمع الكلام بيكافاه ويشجعه عشان يكمل
الجواب:
ده الأب... مش (( الرَّب ))
مشكلتك أنك مش مدركة معنى الآية
اللي بتقول " إياك نعبد " يعني أنا عبد، والعبد مش مفروض على سيده شيء، فلو أعطاه يبقى كرم من عنده، ولو منعه فله في ذلك حكمة...
ومع ذلك فواجب على العبد تنفيد الفرائض والامتناع عن المحرمات.
مشكلتك أنك فاهمة العبودية دي غلط،
احنا مش بنصلي ونصوم عشان يدينا حاجات حلوة في الدنيا ولا بنسيب العلاقات المحرمة عشان تيجي لنا على طبق من ذهب في الحلال... لا يا بنتي !
احنا بنصلي ونصوم ونغض بصرنا وبننفذ الفرائض علشان ربنا أمرنا بكده،
علشان يرضى عنا ويوم القيامة يدخلنا الجنة ويبعدنا عن النار، والله لو جت في الدنيا حاجات كويسة فالحمد لله نعمة وفضل، مجتش وتأخرت للآخرة فبرده الحمد لله زيادة درجات في الجنة، واحنا في سكة طاعتنا مكملين.
عندك مشكلة كمان في (( الاغترار بالطاعة ))
عبادة السنين اللي بتقولي عليها دي ممكن بتعمليها رياء أو عشان تعجبي بنفسك أو أصلا بتعمليها غلط أو بتعملي كبائر أكبر منها أو بتعمليها بشكل لا يليق بالله سبحانه وتعالى،
ومع ذلك فالطاعة ثوابها في الأصل أُخروي مش دنيوي، يعني تستني أجر الطاعة حسنات يوم القيامة وجنة، مش لبس وفلوس وعربية في الدنيا.
وعندك مشكلة كمان في مفهوم أن ربنا سبحانه وتعالى خلق فهو يملك والذي يملك لا يُفرض عليه شيء،
يعني مش فرض عليه يستجيب لك بالشكل اللي انتي عاوزاه، ده هو يستجيب الدعاء في الوقت الذي يشاء وعلى الوجه الذي يشاء.
ممكن مثلا بتعملي معصية فهي مانعة من إجابة الدعاء.
وممكن أصلا يكون اللي انتي بتطلبيه شر لك في دينك ودنياك.
وممكن يكون بيرفع به عنك بلاء كبير، وممكن يدخره لك يوم القيامة.
وأنت مثابة في كل الأحوال لأن الدعاء عبادة.
نصيحتي:
تفكري في نعم ربنا عليكي اللي مبتدفعيش لها مقابل، وتفكري في من هم أشد منك بلاء واحتياجا.
قومي صلي عشان انتي اللي محتاجة الصلاة والعبادة كلها، ربنا غني عنها.
صلي عشان نجاتك يوم القيامة.
صلي وظبطي حجابك وبري والديك وحسني خلقك وأكثري من قراءة القرآن وذكر الله سبحانه وتعالى وصاحبي الصالحات واستعيذي بالله من الشيطان الرجيم يذهب عنك كل ذلك بإذن الله.
' منقول
