*تجربة*
القبر ..
واحد قريبي توفى .. مشوفتوش غير مرة واحدة من كام سنة ..
وطبيعي رحنا نعمل الواجب ونحضر الجنازة .. طول الطريق مفكرتش ف حاجة عادي .. اول ما دخلت الجامع .. الصندوق محطوط ف جمب .. قاعد جمبه اتنين بيعيطوا اول مرة اشوفهم .. وكأنهم حاضنين الصندوق .. سلمت ع الموجودين وسلمت ع الاتنين ال بيعيطوا وعذيتهم بعد ما عرفت ان دول اولاده ..
المشهد الأول ..
آذان العصر .. كل الناس اتقدمت للصفوف الأولى تصلي .. وانا بقوم .. لقيت واحد من اولاده واقف جمب الصندوق ورا وبيكبر ..! هيصلي جمبه .. طبعا كمية افكار رهيبة جاتلي وانا باصص للمنظر دا ..
كام مرة الولد دا كان عنده فرصة يقضي وقت كتير مع ابوه وسابه .. وراح اي مكان .. هل اداه حقه وهو عايش !.. هل كان بيصلي جمبه وهو عايش ! هيستفيد ايه الميت بصلاة حد جمبه .. !!
صلينا الجنازة .. ورفعنا الصندوق .. وطلعنا .. مشهد حضرته كتير وشاركت فيه كتير ..
ركب الجمع العريض من القرايب والمعارف عربياتهم واتحركنا كلنا ع المقابر ..
المشهد التاني ..
الصدفة خلتني اوصل من اول كام عربية وصلوا عند المدفن .. بعد طريق ف المقابر عدا التلت ساعة بالعربية .. كمية مدافن رهيبة مشوفتش زيها قبل كدا .. *مدينة مقابر* ..
ركنت العربية ونزلت اشوف لو محتاجين مساعدة .. لقيتهم بيفتحوا العربية وبيقولوا يلا يا جماعة .. انا واولاده وكام واحد ال واقفين .. اتحركت معاهم ..اول مرة ف حياتي ألمس جسم من غير روح .. اول مرة ابقى ف الموقف دا .. الكفن مربوط كويس .. جسمه كان دافي ومش متخشب .. عكس ال كنت بسمعه عن ان الجسم بيبقى بارد ومخشب ..
وع بابا القبر .. سلمناه لاتنين واقفين تحت .. ونزلنا نسند معاهم ..
المشهد التالت .. والأهم ..
القبر ! .. انا جوا القبر .. مكان ضلمة .. جدا ..اول نفس تحت .. اتخنقت .. الريحة ! .. ملقتش وصف ينفع يتقال عنها غير انها ريحة قبر !.. اكتر احساس وحش تحسه .. حالة كاملة .. ريحة .. ضلمة .. اصوات نهنهة ال بيعيطوا .. نفس بتاخده بالعافية .. نبضات قلبك بتعلى وبتسرع ..
*فاصل* نور الموبايلات اشتغل عشان يشوفوا .. ف الوقت دا شوفت الإتنين ال شغالين ف المقابر .. اقل ما يقال عنهم انهم حشاشاين .. وشوشهم مش بشوشة خالص .. اسنانهم السواد واكلها .. هدومهم حاجة قذرة .. بناطيلهم مهرهرة .. وهدومهم الداخلية باينة ..
دول ال بيدفنوا ! .. دول ال هيشيلونا ! ..
بعد ما كان كل همنا واحنا عايشين نتعامل مع الناس بمظاهرهم ونعرف ونتقرب من اصحاب النفوذ والفلوس والسلطان ! ..
رجعت اركز ف القبر .. الراجل ع الأرض .. اولاده صوت عياطهم بقى اعلى .. الباقي بيوحد ربنا .. بدأ الإتنين *الحشاشين* يتكلموا بالكلام المحفوظ .. يلا يا جماعة ننيمه ع جمبه اليمين .. ونفك رباط الكفن .. ونسنده ونرش عليه شوية تراب .. عشان سنة عن الرسول ..طريقتهم وكلامهم يدل انهم حافظين الكلمتين للإتجار مش اكتر ميعرفوش علم دفن ولا سنة ! ..
المكان كل شوية بيتخنق اكتر من وقفة الناس فيه .. والنفس بيبقى اصعب.. لازم نخرج .. خلاص .. هيفضل لواحده .. ابنه مش هيعرف يقف يصلي جمبه تاني ! هنخرج من هنا ويبدأ حياته البرزخية .. ال بدايتها قفلة القبر .. طلعنا كلنا ..
اخدت نفس كبير .. مليت صدري هوا الدنيا .. غير هوا القبر .. كل واحد بيعمل حاجة ال بيعيط وال بيقفل الباب بالحجارة والجبس .. عشان ميبقاش في اي منفز .. مفيش حاجة تدخل ولا تخرج .. خالص .. القبر لو منفس بيطلع ريحة جامدة ..
اتقفل القبر .. وردموا التراب .. وانا متنح .. مبنطقش ..
المشهد الرابع .. والأخير ..
اولاده وقفوا قدام القبر .. ومش عاوزيني يمشوا .. والحقيقة ال هم عارفينها كويس ..وال كلنا عارفينها ومتأكدين منها .. انهم هيمشوا .. كلنا هنمشي .. وهو هيفضل لوحده ..
النهاية ..
القبر .. هو النهاية .. نهاية كل ال بنعمله .. نهاية البداية !
القبر .. أوحش مكان ممكن تشوفه ع وجه الأرض .. واكتر مكان يخوف .. وأصعب حقيقة ..
القبر .. اهواله رهيبة .. عذابه يرعب اي حد .. من اول قفلته عليك .. لضمة القبر .. لسؤال الملك .. من ربك .. ما دينك .. من نبيك .. واول ما يسأل عنه العبد ف قبره .. الصلاة ! .. وعذاب القبر ال اشكال وانواع .. !
القبر .. حاجة كل يوم بنشوف مليون دليل ان دا بيتنا .. ان دا مكانا .. وبرضو مفيش فايدة .. *ع وضعنا لحد ما نقابل ربنا* حرفيا .. بس هنقابل ربنا نقوله ايه .. هنعمل ايه كل سنين الوحدة والضلمة والعذاب دي !
دعاء مبيفارقش دماغي ..
اللهم هون علينا وحدتنا ف القبر .. اللهم مد لنا ف قبورنا مد ابصارنا .. اللهم اجعلها روضة من رياض الجنة ولا تجعلها حفرة من حفر النار .. اللهم ارزقنا الفردوس الأعلى وإجعلنا أهل لذلك ..
