#جرائم مخفية الحلقة 20 ولاخيرة
الكاتبة سيڤانا 💜🔮
وصل طه الاء بعد ما هدرز معاهم شوية وبعدها خطم ع الشركه متعه وخش للمكتب قابله زرف وواضح انه بريد وفي ورقة بيضه زي الرساله ومعاها هدية مكتوب عليها من برا مفاجأة فتح الرساله قعد كل مره تعابير الصدمه تزيد 🔥
كان مكتوب ف الرساله( اكيد الكلام الي بنقوله حيصدمك لكن حنحكيلك القصة وان شاءالله تفهم ونبيك تجي ع العنوان الي ف الهدية وضروري تفتحها
قبل سنين لما جيت انت ع الدنيا عطوك لي حوش امل الي مفكرها امك لكن هيا مش امك هيا تكون عمتك والي مات يكون راجل عمتك وسر قتله كان وراه بوك الي هوا محمد وانت تكون خو مازن ويزن !!!
راجل عمتك زمان كان فاتح صفقه مع محمد السيد جي يوم وتعاركو مع بعض بعدها محمد شرب وزاد تعارك معاه وطيحه من فوق الحوش من غير قصد وهذا علاش عطوك لي عمتك بيش تسكت لانها ما تجيبش في صغار والعيله كلها تعرف انك انت ولد محمد السيد وانا كنت صاحب بوك ف الشركه وحبيت نحكيلك ع كل شي لان هادي تعتبر جريمة مخفيه)
طه:قعد يدلك في راسه وهوا مش عارف شن الي شافه ومش فاهم شي وقعد يكرر...جريمة مخفيه اي صح جريمة مخفية ولا جرائم مخفية هيا💔
طه:ناض من ع الكرسي لبس الجاكه متعه لكن اذكر الهدية قامها وفتحها وكانت فيها صوره لي راجل عمته وورقه موقعه ع انه ياخد نص الحوش !!
طه:بعد ما شافها طلع للعنوان الي لقاه ولقي حوش صغيرون وواضح عليه لي شخص متواضع نزل وهوا مش عارف روحه في حلم ولا في علم💔
طق طق طق طقققق
الراجل:منو
طه:انا طه
الراجل:عرفه وفتح وكانت واضحه عليه علامات الكبر 💜
طه:انت الي حكيتلي ع كل شي ولا
الراجل:اي تفضل ونزيد نفهمك
طه:يزيد فضلك...وخش معاه للحوش الصغير الي جاي وسط مزرعه فيها هلبا غرسات واشجار فواكه والمكان الي كان بسيط وحلو 💜
الراجل:شن تشرب
طه:اميه بس
الراجل:حاظر...وناض
طه:قعد يتفحص ف المكان الهادي الي مقعمز فيه وقعد يقول يا ريتني نعيش معاه من غير مشاكل لا شي لين قاطعه صوت الشخص الي واضح عليه علامات الطيبة 💜
الراجل:تفضل وهادي شوية اعشاب تهدي لاعصاب لانك توا في حالة صعبه 💜
طه:خداه وقعد يشرب والباين انه عجبه !!
الراجل:كيف لقيته
طه:قنين والله شكرآ
الراجل:صحتين💜
طه:سلمك...اي فهمني كيف صار هكي وعلاش
الراجل:وقتها راجل عمتك كان ما يعرفش ف الخدمه هلبا ولي هالسبب هوا الي غلط وخسر الشركه
طه:رشف رشفه من الكوب...باهي وعلاش ما قالوش ان عمتي الي واخدتني وحتى مازن ويزن يعرفو ان انا مش ولد امل !!
طه:لا ما يعرفوش لانهم كانو الصغار الي يعرفو هما الي كانت اعمارهم كبيرة في هذاكا الوقت
طه:وانت كيف عرفت بي هذا كله
الراجل:انا كنت صاحب بوك هلبا وكان يحكيلي في كل شي وانا ما ارتحتش لين كتبتلك الكلام 💜
طه:شكرآ والله انك قلتلي
الراجل:ولو تبي اي حاجه تعالالي وما نبيش تقول ع مكاني ولا حتى تقول انك عرفت مني لان انا نبي ديما نقعد عايش في الهدوء ومن غير مشاكل
طه:حط الكوب...اطمن يا عمي انا مستحيل نعاود عليك ونتمنى ان نعيش معاك وابتسم
الراجل:ابتسم بطيبه...تنورني والله 💜
طه:انا توا عندي عيله ولما يجوني صغار تو نجي نزورك
الراجل:ان شاءالله وربي يحفظك ان شاءالله
طه:ناض...وربي يطول في عمرك حتى انت والله ما عارف كيف نشكرك💜
الراجل:ولا يهمك
طه:هيا بسلامه توا نتلاقو ع خير
الراجل:ان شاءالله وربي يجعل حياتك كلها خير
طه:فتح الباب...ان شاءالله وشكرآ مره تانيه
الراجل:ابتسم...العفو
طه:طلع ومشي لي حوش محمد من غير ما يفكر !!!
__________________
ولما زادت رغد قربت القدام قابلها شخص تعرفه كويس💜
أنت تقرأ
جرائم مخفية(رواية ليبية)
Bí ẩn / Giật gânالقصة حتكون ممزوجة بالواقع والخيال يعني القصة شبه صايرة ف الواقع اليبي وحتكون مختلفه عن باقي الروايات وهادي اول رواية ليا ان شاء الله تعجبكم💜🙏
