بارت 3
&
•
•
•
صبرت عله الجرح حد ماخذاني الشيب
وتحملت السنين وضكت ما ضكته
الحنظل و العسل و الزين و الموزين
كلهن جربتهن وانت ذاك انت
ولاء الفرطوسي
•
•
•
&
..........
( نور )
گاعده بالغرفه اللي ابد ماطلعت منها كله اگوم اكل واصلي وارجع انام ..
صافنه وسمعت صوت صياح خوفني گمت اتقربت من الباب صار الصوت واضح ..
وسام :- يمه كافي البنيه صارلها اشهر عدنه حتى بطنها كبرت شنو القضيه .
ام احمد :- شنو السالفه گاعده على راسك تره احنه بغربه مو بالعراق حتى ندور اهلها الله يعلم شصاير للبنيه وخلاها تجي هنا .
وسام :- اي شوفي انتي گلتي الله اعلم شصاير الها يعني يجوز وراها عصابه وتورطنه وياها .
نهى :- تره انت هواي متأثر بالمافيا وهاي السوالف البنيه صارلها اشهر يمنه ماشفنه عليها شي .
وسام :- طبعاً ماتشوفين اذا هي باب الغرفه ماطلعت گوليلي تعرفين اسمها تعرفين منين جايه لو شجابها هنا شو احنه صريحين وياها .
ام احمد :- ولك يمه افهمني البنيه بغربة شلون نعوفها وحدها بين ناس غرب اذا احنه اهل بلدها منوگف وياها لعد منو يوگف وياها ؟!!
وسام :- كلامچ على عيني وراسي بس مو من حقها متحچيلنه شي عنها .
ابتعدت عن الباب ورحت بدلت ملابسي وسفطت ملابس نهى اللي چنت لابستهم على الچربايه ..
لفيت حجابي عدل باوعت على بطني كبرانه اللي عرفته من خالتي ام احمد اني دخلت بشهر السادس ..
حملي ثگيل بس كارهته رغم طفلي وخايفه عليه بس كارهه نفسي احس بالخزي والعار من افكر اني حامل بـ ابن حرام ..
اله بيها اراده رب العالمين رغم اعاقتي ورغم چنت عميه بس بقه الطفل ببطني وحتى من چان يريد ينزله بدون علمي حلمت بصوت يگلي لا ترحين ..
مسحت على بطني :- انت بس ابقه بداخلي ووعد احميك لتشيلني حمل فوگ طاقتي اني بنفسي مااعرف وين اروح اذا اجيت انت وين اروح بيك واني بغربه لا اهل ولا سند .
اتوجهت لباب الغرفه فتحته ببطئ شفتهم منطيني ظهرهم بالصالة ..
اتسحبت من وراهم واني امشي ببطئ نزلت الدرج بهدوء ..
ماادري ليش بهاي اللحظه احسهم كلهم ساكتين ويسمعون خطواتي فجأه سكتو بس ادري بيهم ماانتبهولي ..
