آسميتها جارية فأصبحت سيدة قلبي

بارت 26

بارت 26

&

•

•

•
‏
أنا هُنا حين تَخونُك ‏الشّوارعُ ‏والطُّرق
حين تفقدُ القُدرةَ على فهم الأشياءِ من حولك
وتغدو ‏بلا وجهةٍ وأصدِقاء
هاكَ كُلّي
و اتّكِئ.

•

•

•

&

...........
( نور )

الألم كل يوم يزيد جسمي كله يتگطع لدرجة گمت مااگدر اتحرك ..

النزيف ماينگطع وهذا الشي مأذيني اكثر من الألم لأن استحي اطلب من احد يساعدني اسبح ..

وبنفس الوقت مااريد اعتمد على احد مااريد اذل نفسي ..

اگوم بيه مابيه للحمام واجبر نفسي اتغاضى الألم واعتمد على نفسي ..

اطفالي انحرمت من شوفتهم اسمع صوتهم خارج غرفتي يبچون يريدوني بس مااگدر اشوفهم واني بهاي الحاله ..

مااطلع من الغرفه اذا مو كمامه وكفوف لأن ماعندي مناعه ووضعي خاص ..

انطويت على نفسي ونفسيتي تعبت حيل حتى كلامي قل واهلي مو هواي احچي وياهم بس امي مرات ارد على اتصالاتها حتى تتطمن ومتخاف عليه ..

حسيت علاء ابتعد عني هاي الفتره بس اشوف احسن التقي بي بس على وقت العلاج ..

گاعده بالحديقه لابسه كمامتي وحجابي اللي ماينزل من راسي بس وقت النوم ..

اراقب اطفالي وهمه يلعبون بعيد عني ويه لورين تنتبه عليهم خاف يلعبون بشي خطر ..

حسيت بي گعد بصفي على الكرسي ..

علاء :- لشوكت راح تبقين هيچ ؟!

نور :- شلون يعني !؟

علاء :- منطوية تره هيچ تتعب نفسيتچ وهي اهم شي بمرضچ النفسيه .

باوعتله وعيوني مليانه دموع :- علاء ندمانه .

علاء :- على شنو ؟!

نور :- لأن اخذت جرعة .

علاء :- لييش ؟!

نور :- هذا المرض مابي شفاء على الأقل چان بقيت اخر ايامي ويه اطفالي وبحيلي ليش هيچ بعيده عنهم واباوع الهم بالحسره .

علاء :- كلشي بيد رب العالمين لا تأيسين من رحمته هذا ابتلاء وامتحان الچ مالازم تگضي بالقنوط واليأس خلي عندچ امل 80‎%‎ من علاج السرطان هو الحاله النفسيه باوعي للحياة بغير نظره اطفالچ يمچ ورجعتي لأهلچ واجاچ مرض يمحي ذنوبچ سوي اي شي يخليچ تنسين الالم مثلاً اقري كتب .

نور :- علاء مااگدر مكسور واهسي بكلشي الله لا يراويك الألم اللي محتل جسمي لا هو الم اسنان واخذ مسكن ويروح ولا الم عيون بالقطرات يطيب الم داخل جسمي وينهش بلحمي اتخيل انت صاحي وواحد يحفر ببطنك لدرجة يگطعها .