بعد يومين
معتز بين العمل والحوش والمستشفى ومضايقة رانيا بالخشه والطلعه... وهوا نفسه مستغرب سبب تعامله معاها بالطريقه هذي
رانيا متضايقه من معتز واجد بس ما عندها حل... ومش معبرته ومع ذلك قدر يلفت انتباها وتعجبها من زواجه بالسر عن اهله
بشرى تحسنت يدها وكل يوم اتصال مع منال تسلم عليها واتفقت معاها على زيارة قريبه ليها
فيصل حدد موعد الفرح وبدا يشتغل عليه عشان يلحق على السفره بالمره
عامر مع منال وهوا يحن عليها عشان تتصل ببشرى ويسمعها وهي تتكلم... من كثر ما فكر فيها استولت على عقله بالكامل
هناء عايشه في خوف ومع فضول من هذا يلي مراقبها ويعرف تحركاتها... ووصلتها هدية ثانيا وكانت عباره سلسال ذهبي على شكل قلب وناقش حرفها من خلفه... عجباتها وتوا هي لابستها
قاسم محتار من يلي سمعه ويبي يعرف القصه كامله بس ما عنده الإمكانية أنه يسأل
____________
رانيا تلبس عشان بتطلع للعمل ويتصل تلفونها
رفعاته ولقت عمها المتصل فردت:.. السلام عليكم
العم(مصطفى ):.. وعليك السلام... كيف صحتك يبنتي
رانيا:.. الحمد لله يعمي... وانت
العم(مصطفى ):.. الحمد لله... بنقولك في كم عائلة حصلتهم ليك... وتوا نبعتهم ليك برساله
فرحت رانيا:.. شكرا يعمي... ماتعرف كم فرحتني
العم(مصطفي ):.. بس الباقي مش عارف كيف تكمليه... يعني شن بتستفيدي
رانيا:.. حنلقى خطه لوقتها... بس اهم شي توا نعرفهم
العم(مصطفي ):.. إن شاء لله خير... انتبهي لنفسك
رانيا:.. إن شاء لله يعمي
وقفلت منه وشوي ووصلت الرساله
رانيا:..(زاد شوي وقت وتنحل القصه... اصبر شوي يكريم)
وطلعت من الدار وبطريقها للمطبخ
فيصل:.. صباح الخير
ابتسمت رانيا:.. صباح النور يعريس
فيصل:.. ههههه نسيت إني توا في حكم العريس
رانيا:.. بديت تحجز لكل شي
فيصل:.. ايه... بس طبعا لازم من مساعدتنكن ليا في بعض الحاجات... ونفكر يوم العقد نديره عشاء... ايش رايك
رانيا:.. يكون احسن... لأنه دوامي بالعمل للظهر... ونبي ناخذ اجازه بيوم فرحك
فيصل:.. تمام يعني
مع خشت بشرى للمطبخ:.. صباح الخير
ردو عليها:.. صباح النور
وكملو تخطيط لأمور الفرح
____________
نزل معتز مستعجل
العم(حسن):.. وين طاير هكي
وقف معتز لما سمع ابوه:.. صباح الخير يبوي
العم(حسن):.. صباح النور... شن وراك مستعجل هكي
معتز:.. ءااا... متاخر على العمل... وفي نفس الوقت مانبي نعطل واجد وننحط تأخير
العم(حسن):.. به افطر على الأقل
معتز:.. حنفطر بالطريق... توصي على شي
العم(حسن):.. سلامتك.. بس ما تستعجل بالسواقه
معتز وهوا طالع:.. إن شاء لله
ووصل للباب وطلع... ركب بسيارته وشغلها ومشى بطريقه للعمل وبعدها للمستشفى زي كل يوم
____________
وبشرى كانت تضم في المطبخ
بشرى:.. أمس كلمتني منال وقالت اليوم بتزورنا ومعاها هناء
رانيا:.. أهلا وسهلا بيهم... أي وقت
بشرى:.. بعد العصر... بتكوني رجعتي صح
رانيا:.. إن شاء لله ما تطلع عندي حالة طارئة
بشرى:.. تعرفي البنات حبوبات
ابتسمت رانيا على جنب:.. وحته اخوهن حبوب
وتورد وجه بشرى:.. أي اخو قصدك
رانيا:.. إحنا نعرفو واحد بس... ويلي كان بيضربني بوجهي لأني وجعتك بس
بشرى:.. ربي يحفظهم كلهم... وعندهن اخو ثاني يعني ما تحطيهي نقطه عليا
رانيا:.. وانا شن قلت... ولا شي
عقدت بشرى حواجبها:.. ما تأخرتي على العمل
رانيا:.. ههههه به توا نمشي ونخليك
ووقفت وتوجهت لبرا... بس لفت قبل لا تطلع وقالت لبشرى:.. لما أنا ذكرته قدامك خدودك حمرن... فنتبهي ليهن بس
رفعت بشرى وجها بسرعه لرانيا وزاد تلون واجها
وطلعت رانيا وهي تضحك على اختها:.. هههه
