بداية الصباح الثاني
قامت رانيا بدري تحط الفطور لابوها... فضى الحوش عليهم ومازاد غيرها مع أبوها
طلعت للصالة بسفرة الفطور:.. صباح الخير بابا
العم محمد:.. صباح النور... كيف اصبحتي
قعدت رانيا:.. الحمد لله وانت
العم محمد:.. الحمد لله
رانيا:.. فضا الحوش ومابقى الا أنا وأنت
العم محمد:.. وأن شاء لله يجي نصيبك ونبقى بروحي
رانيا:... أنا فاهمه درجة حبك لامي... بس لازم يكون فيه حد يهتم بالحوش وانت الأهم... وأنا بصراحه نبيك تتزوج... مانبي أي اعتراض منك
ابتسم العم محمد:.. يعني عندك عروس ليا
رانيا:.. أنت ارضى ونجيبلك أنا العروس
ضحك العم محمد:.. هههه مافي داعي... لأنه عندي وحده
فتحت رانيا فمها مصدومه:.. عندك... يعني متزوج من ورانا
العم محمد:.. ههههه ليش بنتزوج من وراكم... ههههه... بس عندي صديق شفت اخته وهي مطلقه وعندها أولاد... طليقها مايبي يهتم بالصغار... ومرا كان صديقي يشكيلي همه... فقلت نتزوجها... تهتم بالحوش ونتونس بالصغار
رانيا:.. وهذا راي كويس
ابتسمت رانيا:.. مبروك مقدما
العم محمد:.. هههه الله يبارك فيك وعقبه عندك
رانيا:.. تبي تتخلص مني يعني
العم محمد:.. لا والله... بس نتمنالك الخير والراجل الطيب
وقفت رانيا:... إن شاء لله.. انا ماشيا العمل توا
العم محمد:.. انتبهي لنفسك
رانيا:... إن شاء لله
وطلعت رانيا للعمل
____________
قامت بشرى تشوف في روحها وين
شوي وحست أنها بحضن عامر... تحشمت وحاولت تتسحب بحيث ما يحس بيها... لاكن هوا ضغط عليها وهمسلها:.. على وين
بشرى وهي متحشمه:.. نبي نقوم
سحبها عامر ليه اكثر:.. اشششش وخلينا راقدين... لا شغل بنمشيله ولا صغار بتشوفيهم
بشرى:.. نحطلك الفطور
عامر:.. مانبي
بشرى:.. بس
وسكتها عامر بطريقته
____________
وصل معتز للمستشفى وعلى طول للحضانه... بس المرا هذي شاف راينا داخل ورافعه الصغيرة بين يديها وتعطيها الرضاعه
ابتسم وقعد يشوف فيهم
بعد فتره انتبهتله رانيا فقدمت للزجاج عشان يشوفها كويس
حس روحه معاها... يشوف في احمرار بشرتها وجسمها الصغير وكيف تحاول تمسك أصبع رانيا
حس بشعور قوي... شعور الابوة... شعور المسؤولية أنه يحمي الصغيرة
رجعتها رانيا للسرير وطلعت لمعتز
رانيا:.. الحمد لله اليوم أحسن ومناعتها كويسه... يعني بمجرد ماتكمل الشهر الثامن تقدر تاخذها
معتز:.. وين بنمشي بيها
رانيا:.. خذها لأهلك... هم جدودها ومستحيل يرفضوها
رجع معتز يشوف في بنته:.. ومن بيهتم بيها... هناء ومنال مصيرهن يتزوجن
رانيا:.. ربك كريم
معتز:.. شن اسمها
رانيا:.. نور
ابتسم معتز:.. نور... جت ونورت حياتي ثاني
____________
بعد الظهر قعدت هناء بالصالة مع أبوها وامها
العم حسن:.. بعد شهر بيكون الفرح... يعني ماعندك مانع
هناء:.. قلتلك يبابا كيف تبي أنا معاك
الخالة سالمة:.. هذا زواج يهناء... يعني حياتك ومستقبلك
هناء:.. لو تبوني نرفض توا نرفض
العم حسن:.. ليش نحسك مغصوبه عليه... يبنتي أنا خيرتك
وقفت هناء:.. انتم احرار... كيف يرضيكم ديرو... بتفسخو افسخو... بتكملو كملو... أنا مش هامني الموضوع
ومشت وخلتهم مستغربين منها ومن اسلوبها وعصبيتها
العم حسن:.. يمكن البنت تبي واحد
الخالة سالمة:.. شن تبي واحد... افرض مثلا حق... تبي تمشي تخطبه ليها مثلا
ضحك العم حسن:.. هههه مش قصدي هكي... بس لو أنها ببالها واحد ويبيها بلاش ما نغصبوها على حد
الخالة سالمة:.. أكيد مافيه... لو فيه ماوفقت من البداية... ولو فيه شكله يكذب عليها
العم حسن:.. إن شاء لله خير... معناها نعطيهم الموافقه أنه الفرح بعد شهر
الخالة سالمة:.. إيه اعطيهم... وأن شاء لله نكملو كل شي بوقته
العم حسن:.. إن شاء لله
