أول ما رجعن رانيا وبشرى للحوش كان ابوهن بالصاله وشاف يد بشرى ملفوفه
العم(محمد ):.. شن صار
بشرى:.. طحت على يدي بس... بسيطه ما تشغل روحك بيها
رانيا:.. ماصار معاه كسر وهذا أهم شي
العم(محمد ):.. الحمد لله... وأنتي يبنتي ليش ما تنتبهي
بشرى:.. هههه بالسوق يعني بننتبه وين بنمشي أو وين يلي بنشريه
العم(محمد ):.. هذي حاجه مافيها لعب... ويريت تنتبهي على روحك كويس
بشرى:.. إن شاء لله
رانيا:.. خذي تلفوني واتصلي على البنات وخبريهن بيلي صار معاك
وخذت بشرى التلفون وخشت للدار
العم(محمد ):.. كملتن الشري او لا
رانيا:.. ايه كملنا... اممم بنقولك إني بكرا بنمشي حوش عمي مصطفى
العم(محمد ):.. إن شاء لله خير... شن فيه
رانيا:.. مانعرف... بس عمي يبيني
العم(محمد):.. تمام... امشي وشوفيه
وقفت رانيا وخشت للدار
____________
وتم اليوم وماصار شي
معتز يطلع من المستشفى للحوش ويرجع للمستشفى
وبشرى بعد ما كلمت منال وهناء وطمانتهن عن نفسها رقدت لأنه عندها مسكن قوي يخليها ترقد
ورانيا تم يومها عادي
اما عامر ماقدرش يسأل خواته شن صار مع بشرى لأنه بيستلمنه ومش حيخلنه
____________
اليوم الثاني
بحوش العم(مصطفى)
قاسم:.. يعني لازم تبيني نطلع توا... بس أنا مانبي
العم(مصطفى):.. والغنم من بيشوفه به لو عطشان او جيعان
قاسم:.. فيها المزرعه من يخذم... وأكيد بيشوف الغنم
العم(مصطفى):.. حته لو... أنا نبيك أنت تمشي
وقف قاسم:.. إن شاء لله... مع أنه مشي على الفاضي بس مش مشكله... تبي شي ثاني يبوي
العم(مصطفى):.. لا سلامتك... بس انتبه من الطريق
قاسم وهوا طالع:.. إن شاء لله
وخش لداره غير على السريع وطلع وركب بالسيارة بس ما تحرك بيها وقعد يطقطق بتلفونه
شوي شاف سيارة تخش لحوشهم... ونزلت منها رانيا
قاسم:.. (شن عندها جايه بالوقت هذا... اها هذا ليش الحاج يلز فيا... أكيد فيه شي)
____________
نزلت رانيا ودقت على الباب
فتحت جواهر:.. رانيا... شن المفاجأة هذي
رانيا دفعتها وخشت:.. الناس تسلم بالأول... بعديين تقصقص
جواهر:.. هههه... عندك الحق... السلام عليكم
رانيا:.. بعد شن جايا تسلمي
جواهر:.. يووووو... ماسلمنا ماعجبك... وسلمنا وماعجبك.... ماتقولي شن يريحك
رانيا:.. وين عمي
جواهر:.. قصدك جايه عشان بابا بس
رانيا:.. بعدين نقعد معاك... بس توا قولي وين عمي
جواهر:.. بالمربوعه وين يعني
رانيا:.. وعمتي فاطمة وين
جواهر:.. بالمطبخ
خشت رانيا للمطبخ سلمت على عمتها فاطمه وبعدها توجهت للمربوعه عشان تقعد مع عمها وتعرف شن يبي منها
_____________
نزل معتز من شقته لتحت وخش المطبخ
معتز:.. صباح الخير
أم معتز(سالمة):.. صباح النور
معتز:.. فيه فطور على السريع... لأني مستعجل
الخالة(سالمة):.. وين مستعجل... توا الساعه 9
معتز:.. يامي فيه أو نطلع
حطتله كوب شاي على الطاولة:.. توا نعطيك... اصبر شوي
قعد معتز على الكرسي وبدا يشرب من الشاي
وخشت هناء:.. اشرب بشوي علاش العجله
معتز:.. إنتي شن دخلك
هناء:.. تصدق معاك الحق... شن دخلني أنا
الخالة(سالمة):.. تبي من الجبنة أو التن
معتز:.. اعطيني جبنة... اسرع
هناء:.. وليش شقتك مافيها شي
الخالة(سالمة):.. خيرك على اخوك اليوم
هناء:.. ماما انا ماقلت شي خطأ
ومعتز مطنشها
الخالة(سالمة):.. مافيها شي توا شقته... من بيطبخله فيها... وأن شاء لله عن قريب يجيب المراة يلي بيعبي الحوش عشانها
رفعت هناء يديها فوق:.. ياااارب
انصدم معتز منها:.. وعلاش تدعي هكي وكاني مضايقك في الحوش
هناء:.. ههههه مش مضايقني... بس على الأقل تكون معانا وحده نهدرزو معاها... مليت وأنا مقابله منال وبس
ضحك معتز:.. ههههه ما احتمال إنتي تتزوجي قبلي
الخالة(سالمة):.. إن شاء لله يجي نصيبها
هناء بصدمه:.. ماما قصدك ماتبينا في الحوش
الخالة(سالمه):.. هههه لو دعيتلك بالنصيب يعني ما نبيكم... الله يهديك بس
وقف معتز بعد ما كمل الفطور:.. أنا مانبي نتزوج حاليا... فموتي من مللك
الخالة(سالمة):.. ليش يمعتز... ماتبينا نفرحو بيك... حوش وعندك... وشغل الحمد لله عندك... ليش تأجل في الموضوع
معتز وهوا طالع:.. نحكو مرا تانيا... مع السلامه
وطلع معتز توجه للمصرف الأول يكمل اشغاله وبعدها بيطلع للمستشفى لأماني
