وصلت رانيا للصالة وقعدت شارده طوال الوقت تترجم في كلام معتز ليها( اسف إني عصبت عليك... بس مش عارف ليش نعصب لما نشوفك مع حد... نحس روحي مسؤول عليك... ماتسألي عن السبب لأنه إحساسي)
رانيا:.. (معقوله يكون يحبني... كلامه يوحي أنه يغار عليا)
ابتسمت رانيا وقعده تفكر بينها وبين نفسها:...(ليش يغار... مابيناتنا شي... ولا وضحنا شي لبعض)
بشرى:.. رانيا شن فيك تضحكي مع روحك
انتبهت رانيا:.. تذكرت شي
بشرى:.. هيا قومي... الناس روحت وبابا يراجي برا
وقامت رانيا ولبسن وطلعن للعم محمد يرجعن للحوش
____________
بنص الليل معتز قاعد يتذكر في رانيا
معتز:.. ااااه شن فيك يمعتز... معقوله بنت تقلب حالك... ليش نغار عليها... ليش ما نتحمل نشوفها مع واحد... عمرها ما بينتلي أنها معجبه بيا... بس شكلي طحت... إيه حاس روحي مايل ليها... حاس قلبي يبيها... شكلي بنحب لأول مرا
انقلب على جنب:.. خلاص ... لازم نرقد شوي
وقعد معتز يتقلب من جيهة لجيها لين جاه النوم
____________
طلع معتز الصبح مثل كل يوم للمصرف وبعدها للمستشفى
خش لحجرة أماني
أماني:.. صباح الخير
قدم لعندها باسها:.. صباح الفل والياسمين
أماني:.. وينك ما رجعت أمس
معتز:.. كنت بالفرح وماحسيت بالوقت
أماني:.. حته رانيا ما مرت عليا اليوم
معتز:.. أكيد تعبانه من الفرح
استغربت أماني:.. أي فرح
معتز:.. هههه ماطلعت رانيا اخت صديقي يلي فرحه أمس... عرفت بالصدفه
أماني:.. اها
معتز:.. ليش نحس فيك اليوم غير
أماني:.. ضايق خلقي ونبي نطلع
معتز:.. عشان صحتك يعمري تحملي
نزلت أماني راسها:.. معتز نطلب منك طلب
معتز:.. إنتي تأمري
أماني:.. لو أنا صارلي شي وقت الولادة
معتز:.. بعيد الشر عنك
أماني:.. نبيك تتزوج رانيا... متأكدة أنها بتهتم بولدي كويس
معتز كان مصدوم منها:.. إنتي حتربيه... وبلاش كلام زايد
بدت أماني تنعس:.. هذي وصيتي ليك لو مت
معتز:.. أماني شن فيك
بس ما ردت لأنها رقدت من التعب... واغلب وقتها راقده
غطاها معتز كويس وطلع لبرا وهوا يفكر في كلامها
معتز:..( هوا أنا حطيتها في راسي... وأن شاء لله يطول عمرك يأماني وتربي ولدك... وأنا بناخذ رانيا... ونخبر أهلي عن زواجي)
____________
وقف العم محمد على باب دار البنات
العم(محمد ):.. يبنات الساعه 12 يسد نوم
بشرى:.. جسمي مكسر يبابا... نبي نرقد إلى الليل
العم(محمد ):.. والغذاء
رانيا:.. فيه موالح من أمس بالتلاجه... سخنهم بالمكرويف
العم(محمد ):.. يعني مانتعب روحي معاكن
ماردن لانهن رجعن رقدن... تعبن وهن يرقصن أغلب الوقت
ضحك العم محمد عليهن وطلع
صلح شاهي أخضر وطلع بيه لحديقة الحوش وقعد تحت ظليلة
شوي وسمع الباب يدق ومشا يفتحه
العم محمد:.. السلام عليكم
العم حسن:.. وعليك السلام... كيف صحتك يحاج محمد
العم محمد:... الحمد لله.... تفضل
وخش معاه
العم حسن:.. اااه قعده حلوا والله
العم محمد:.. هههه جيت في وقتك... الشاهي مازال ساخن
قعد هم الاثنين وصب العم محمد شاهي للعم حسن
العم حسن:.. صحيت... انا عارف جيتي ليك بلا موعد مش صحيحه
العم محمد:.. ليش تقول هكي... تشرف في أي وقت
العم حسن:.. تسلم والله... بصراحه كنت ماشي ولقيت روحي قريب منكم... وقلت نخش عليك
العم محمد:.. أهلين بيك
العم حسن:.. بنخش بالموضوع طول... عامر ولدي الكبير يبي بنتك بشرى... وشاد فيا اليوم قبل غدوا نخطبها ليه... انا بنعطيك الموضوع مبدئي تشوف راي البنت وتسأل عن الولد... ولو ربي صخر نجتمعو ونطلبوها قدام الكل وندير حفلت خطوبة.... ايش رايك
العم محمد مبتسم:.. ونعم النسب والله... نعطي البنت خبر ونردلك خبر
العم حسن:.. تمام... وخذ سجل رقمي
تبادلو الأرقام وقعدو يهدرزو في مواضيع واجدة
