بعد يومين كان الوضع هادي بين رانيا ومعتز.... ومافي حد فتح الموضوع الماضي... معتز يرقد بالصالة ورانيا مضايقها الشي هذا... وخايفه أنها تنقلب على نور بسبب معاملت معتز
خش معتز بيرفع مفاتح السيارة
رانيا:.. نبي نمشي لحوش أبوي
معتز عاطيها ظهر:.. به
رانيا:.. بنقعد فتره عنده
لف معتز بسرعه وهوا عاقد حواجبه:.. والسبب
رانيا:.. نخليك تفكر براحتك بدون ما نضايقك
معتز:.. في شن بنفكر
رانيا:.. مافي داعي نكذبو على بعض... معتز أنت مانسيت أماني وهذا من حقك... بس ماتنسى إني مراتك ونحس ونتضايق من الشي هذا... ماتبي صغار من غير نور من حقك... بس ماتمنعني إني نكون أم
معتز:.. هذا رايك فيا يعني
رانيا:.. هذا التفسير الوحيد يلي شايفته... لو عندك تفسير ثاني قولي
كان معتز بيتكلم بس صوت الخبط على الباب كان قوي ومتسارع
خافت رانيا شن ممكن يكون صاير... ومشى معتز بسرعه فتحه
كان عامر
معتز مصدوم وخايف:.. شن فيك
عامر:... قول لرانيا تجي تشوف بشرى... جاها تلفون وبعدها بدت تبكي وداخت... ماعرفة شن اندير
كانت رانيا ورا معتز فطلعت بسرعه بعد ما سمعت عامر
خشت لشقه عامر ومشت لاختها يلي كانت شبه دايخه وتهلوس
بشرى:.. كريم... ليش... ماما وينه... كريم
خافت رانيا لما سمعت إسم اخوها
كان عامر وراها
رانيا:.. عامر شوف اخويا كريم شن صاير فيه
طلع عامر عشان يتصل ورانيا قعدت تحاول تقيم بشرى
بعد فتره وعت بشرى وبدت تبكي بحضن رانيا:.. كريم يرانيا... كريم انقتل.... ءااا... يومين بس شفناها... واليوم قتلوه
انصدمت رانيا ولا عرفت كيف ادير
وبشرى تبكي على اخوها
خش عامر وكان واضح أنه في شي
رانيا:.. كريم كويس صح... قول أنه كويس
عامر:.. البقاء لله... إن لله وأن إليه راجعون
هزت رانيا راسها ماتبي تصدق كلامه... وقفت بعد ما قدم عامر لبشرى وهي طلعت ومشت لشقتها
شافها معتز ومشى حضنها
هنا بدت تبكي:.. ليش يمعتز ليش.... يريت ماقلتلك تطلعه... كان بخير وهوا في السجن... كان أحسن لو ما طلع... ليش يقتلوه ليش
معتز ضاغط عايها:.. هذا يومه يرانيا... ادعيله وترحمي عليه
وقعدت تبكي بحضن معتز وحاسه روحها أنها السبب... لو ما طلبت يطلعوه كان توا قعد عايش حته بالسجن... لاكن العمر لو تم... وين ما كان بيموت
____________
الكل كان حوش العم محمد يعزي على كريم
العم محمد كان زعلان واجد... حاس أنه قطعه من قلبه انقطعت منه
قاعد فيصل بجنبه ويبكي على اخوه
معتز كان قاعد وجا ياسر ولد عمه بجنبه:.. البقاء لله
معتز:.. هذي حال الدنيا
ياسر:.. تعرف كيف صار... لأنه لازم نستعجلو ويمكن نحصلو من قتله
معتز:.. يلي عرفته أنه كان طالع الصبح بدري ومرت سيارة معتمه ضربت عليه الرصاص وهربت... وعمي محمد سمع صوت وطلع... ولقاه طايح غارق بدمه... شايف عمي كبير بالعمر حاول يسعفه بس ما لحق لأنه تاخر على ماوصل للمستشفى
ياسر:.. هوا كان يعرف الجماعة يلي تتاجر بالناس... والحق كنت متفق معاه عشان نشدوهم ويتعاقبو... وأكيد هذا السبب في أنهم قتلوه قبل لا يقول شي
معتز:.. يعني خلاص... المجرم بيفلت من العقاب
ياسر باسف:.. فيه قضايا قتل واجده قعدت بلا حل... شايف كيف الامكانيات قليله وناقصه
معتز:.. يربي ألطف بالعباد
